މެންޗެސްޓާ (އޭޕްރީލް 5) - ފީފާ އާއި ޔުއެފާ އިން ކުޅުންތެރިންގެ ސިއްހަތަށް މާ ބޮޑު ބެލުމެއް ނެތި މެޗުތަކުގެ ޝެޑިއުލް އެކުލަވާލާތީ މެންޗެސްޓާ ސިޓީގެ ކޯޗު ޕެޕް ގާޑިއޯލާ ވަރަށް ބޮޑަށް ހިތްހަމަނުޖެހުން ފާޅުކޮށްފި އެވެ.
ކޮވިޑް-19ގެ ކޭސްތައް މުޅި ދުނިޔޭގައި ފެތުރި އޭގެ ނުރައްކާ ބޮޑުވެ, މިދިޔަ އަހަރުގެ މާޗް މަހުން ފެށިގެން ތިން މަހެއްހާ ދުވަހު ފުޓްބޯޅަ ލީގުތައް ހުއްޓުނެވެ. އަލުން މެއި އާއި ޖޫން މަހު ލީގުތަކުގެ ކުޅުން ފެށިއިރު, މެޗުތަކުގެ ޝެޑިއުލް އެކުލަވާލީ ތިން ދުވަހުން ކަހަލަ ގޮތަކަށް މެޗު ކުޅެން ޖެހޭ ކަހަލަ ގޮތަކަށެވެ. މި އަހަރު ޔޫރޯ ފުޓްބޯޅަ މުބާރާތާއި ކޮޕަ އެމެރިކާ އަދި އޮލިމްޕިކްސް އޮތުމުން މާ ބޮޑު ބްރޭކެއް ނުދީ ގައުމުތަކުން އާ ސީޒަން ފެށި އެވެ.
ރަނގަޅު ޕްރީ ސީޒަނެއް ވެސް ނުލިބި މި ސީޒަން ފަށަން ޖެހުމުން ކްލަބްތަކުގެ ކޯޗުންގެ އެންމެ ބޮޑު ބޮލުގެ ރިހުމަކަށްވީ ގާތްގާތުގައި މެޗުތައް ކުޅެން ޖެހޭ ގޮތަށް ޝެޑިއުލް އޮތްއިރު, ކުޅުންތެރިންގެ ރިކަވަރީ އަށް އެކަށީގެންވާ ވަގުތު ނުލިބޭ މައްސަލަ އެވެ. ސީޒަން ފެށިގެން ގިނަ ކޯޗުން އައީ އެ ޝަކުވާތައް ކުރަމުންނެވެ. ވަކި ހިސާބަކުން އެ ވާހަކަތައް މަޑުޖެހިފައި އޮތުމަށް ފަހު އަނެއްކާ އެ ވާހަކަތައް ދައްކަން ފެށީ މިދިޔަ މަހު ވޯލްޑް ކަޕް ކޮލިފައިންގެ މެޗުތައް ކުޅެން ފަށައި ކުޅުންތެރިންނަށް ލޯޑު ބޮޑުވާން ފެށުމުންނެވެ.
"ޔުއެފާ އާާއި ފީފާ އިން ހަދާފައިމިވާ ޝެޑިއުލާ ހެދި ކުޅުންތެރިން މަރުވުން ކަހަލަ ކަމެއް މި ވަނީ. ފިޒިކަލީ މި ކުޅުންތެރިން ބޭނުންވާ ވަރަށް ނުކުޅެވޭތީ އަމާޒުވާ ފާޑުކިޔުންތަކާ ހެދި މި ކުޅުންތެރިންނަށް މެންޓަލީ ވެސް އަސަރުކުރޭ. މިއީ ކުޅުންތެރިންނާ މެދު ވަރަށް ބޭއިންސާފުން ކުރާ ކަމެއް," ލީގުގައި ހޮނިހިރު ދުވަހުގެރޭ ލެސްޓާ ސިޓީއާ ދެކޮޅަށް ކުޅުނު މެޗަށް ފަހު ގާޑިއޯލާ ބުންޏެވެ.
ކުރިން ބާސެލޯނާ އާއި ބަޔާން މިއުނިކަށް ކޯޗުކޮށްދިން ގާޑިއޯލާ ބުނީ އޭނާ މި ސީޒަނުގެ މެޗުތަކުގައި ހަތަރު ކުޅުންތެރިން ނޫނީ ފަސް ކުޅުންތެރިން މެޗުތަކުގައި ނެރޭ ފުރަތަމަ އެގާރަ އަށް ބަދަލު ގެންނާތީ ގިނަ ބަޔަކު ސުވާލުކުރާކަމަށާއި ހަގީގަތަކީ އެއީ ކުޅުންތެރިންގެ ސިއްހަތަށް ބަލާފައި ކުރާ ކަމެއް ކަމަށެވެ.
"މި ސީޒަން ފެށި ދުވަހުން މިއަދާ ހަމައަށް ވެސް ބައިނަލްއަގުވާމީ މެޗެއް ނެތިއްޔާ އަހަރެމެން މި އަންނަނީ ކޮންމެ ހަފްތާއާ އެކު ތިން މެޗު ނޫނީ ދެ މެޗު ކުޅެމުން. މި ހާލަތުގައި ޓީމު ބަދަލުނުކޮށް އަހަންނަށް ކުޅުންތެރިން ނުރައްކަލުގެ ތެރެއަށް ހުށަނޭޅޭނެ. ކުޅުންތެރިންގެ ހިތްހަމަނުޖެހުން ވެސް ހުންނާނެ ކުޅުމުގެ ފުރުސަތު ގިނައިން ނުލިބޭތީ. އެކަމަކު އެ ހިތްހަމަނުޖެހުމަށް ވުރެ ރަނގަޅުވާނެ ބޮޑު އިންޖަރީއެއް ނުވެ ސީޒަން ނިންމާލައިފިނަމަ," ގާޑިއޯލާ ބުންޏެވެ.
ގާޑިއޯލާ ބުނީ ސިޓީ މި ވަގުތު ހަތަރު މުބާރާތުގައި ރަނގަޅު ހިސާބެއްގައި ވާދަކުރަމުން އަންނަ ސަބަބަކީ އޭނާ އަމިއްލަ އަށް އިސްނަގައިގެން ކުޅުންތެރިންގެ ހައްގުގައި ރަނގަޅު ނިންމުންތަކެއް ނިންމާފައިވާތީ އެވެ.
