އަންނަ ބުދަ ދުވަހު ހަވީރު އޭއެފްސީ ކަޕްގެ ކޮލިފައިން ފުރަތަމަ މެޗުގައި ރާއްޖޭގެ ކްލަބް އީގަލްސްއާ ދެކޮޅަށް ކުޅެން ބޫޓާނުގެ ތިމްޕޫ ސިޓީން އިންޑިއާގެ އެހީގައި ތަމްރީންތައް ފުރިހަމަކޮށްފި އެވެ.
މީގެ ދެ ދުވަސް ކުރިން އިންޑިއާގެ ކަލްކަތާ އަށް ތިމްޕޫ ސިޓީ ދިޔައީ އޯލްއިންޑިއާ ފުޓްބޯލް ފެޑެރޭޝަން (އޭއައިއެފްއެފް)އާ މަޝްވަރާކުރުމަށް ފަހު ރާއްޖެ އައުމުގެ ކުރިން ރަނގަޅު ފެސިލިޓީއެއްގައި ތަމްރީންތައް ފުރިހަމަކުރުމުގެ ގޮތުންނެވެ. އިއްޔެ އެންމެ ފަހު ޓްރެއިނިން ސެޝަންތައް ނިންމާލުމަށް ފަހު ތިމްޕޫ މިއަދު މެންދުރު ފަހު ރާއްޖެ އަންނާނެ އެވެ.
ތިމްޕޫގެ ކޯޗަކަށް ހުރީ ކުރިން ބޫޓާން ގައުމީ ޓީމަށް ކުޅެފައިވާ ތަޖުރިބާކާރު ކުޅުންތެރިޔާ ނަވަން ދެންޑަޕް އެވެ. ތިމްޕޫ އިން މިދިޔަ ސީޒަނުގައި ބޫޓާނުގެ ޗެމްޕިއަންކަން ހޯދި ޓީމުގައި ހިމެނޭ ބައެއް ކުޅުންތެރިން ވަނީ އެ ކްލަބް ދޫކޮށްލައިފަ އެވެ. އެކަމަކު ތިމްޕޫ އިން ވަނީ އޭއެފްސީ ކަޕަށް ޓީމު ވަރުގަދަކުރުމުގެ ގޮތުން ކުރު ކޮންޓްރެކްޓްތަކެއްގައި ބޫޓާން ގައުމީ ޓީމުގެ ކުޅުންތެރިން އެ ޓީމަށް ގެނެސްފަ އެވެ. އެ ޓީމުން އީގަލްސްއާ ދެކޮޅަށް ނުކުންނައިރު, ޓީމުގައި އެއްވެސް ބިދޭސީ ކުޅުންތެރިއެއް ނުހިމެނޭނެ އެވެ.
ބޫޓާންގެ ކޯޗު ދެންޑަޕް އެ ގައުމުގެ މީޑިއާ އަށް ދިން އިންޓަވިއުއެއްގައި ބުނީ އިންޑިއާގައި ޓްރެއިނިން ކޭމްޕް ކުރިއަށްގެންދަން ލިބުމަކީ ހިތްހަމަޖެހުމެއް ކަމަށާއި އީގަލްސް މެޗަށް އޭގެ ފައިދާކުރާނެ ކަމަށެވެ.
މީގެ ކުރިން ތިމްޕޫ އިން ވަނީ ރާއްޖޭގެ ވެލެންސިއާއާ ދެކޮޅަށް އޭއެފްސީ ކަޕް ކޮލިފައިންގައި ކުޅެފަ އެވެ. އެގޮތުން 2017 ވަނަ އަހަރުގެ ކޮލިފައިންގައި ބޫޓާންގައި ކުޅުނު ފުރަތަމަ ލެގު ނިމުނީ 0-0 އިން އެއްވަރުވެގެންނެވެ. އެކަމަކު މާލޭގައި ކުޅުނު ދެ ވަނަ ލެގުން ވެލެންސިއާ އިން ވަނީ 3-0 އިން ތިމްޕޫ ބަލިކޮށްފަ އެވެ.
އެ މެޗުގެ ހާލަތާއި މި ފަހަރު މެޗު ކުޅެން ޖެހޭ ގޮތް ތަފާތެވެ. ކުރިން އޭއެފްސީ ކަޕް ކޮލިފައިންގައި ދެ ލެގު އޮންނައިރު, މި ފަހަރު މެޗު ކުޅެނީ އެއް ލެގަށެވެ. އެއީ ކޮވިޑް-19ގެ ސަބަބުން ދަތުރު ފަތުރުކޮށްގެން މި ވަގުތު މެޗުތައް ކުޅެވެން ނެތުމުންނެވެ.
އީގަލްސް އިން ވަނީ އޭއެފްސީ ކަޕަށް ޓީމު ވަރުގަދަ ކޮށްފަ އެވެ. މިދިޔަ މަހުގެ ޓްރާންސްފާ މާކެޓްގައި އީގަލްސް އިން ވަނީ ލެބަނަން ޒުވާން ގައުމީ ޓީމަށް ކުޅެފައިވާ ގޯލްކީޕަރު މުހައްމަދު ތޯހާ އާއި ގްރީން ސްޓްރީޓްސް އަށް ކުރިން ކުޅުނު މިސްރުގެ ޑިފެންޑަރު އެލްސައީދުގެ އިތުރުން ރަޝިއާގެ ކްލަބްތަކަށް ކުޅެފައިވާ ފޯވާޑް ވްލަޑިސްލާވް ކޮރްމިޝިން އެވެ. މީގެ އިތުރުން ޔޫތު މިނިސްޓްރީގެ ސްޓޭޓް މިނިސްޓަރު އަދި ތަޖުރިބާކާރު މިޑްފީލްޑަރު އަސްހަދު އަލީ (އަޑުބަރޭ) ވެސް ވަނީ އީގަލްސްއާ ގުޅިފަ އެވެ.
އޭއެފްސީ ކަޕަށް ތައްޔާރުވުމުގެ ގޮތުން އީގަލްސް އިން އިއްޔެ ފަރިތަކުރުންތައް ކުރިއަށްގެންދިޔައީ ގަލޮޅު ދަނޑުގަ އެވެ. އީގަލްސް އިން އެ ކްލަބްގެ ތާރީހުގައި ފުރަތަމަ ފަހަރަށް އޭއެފްސީ ކަޕްގައި މި ފަހަރު ކުޅޭއިރު, އެ ޓީމު މި މުބާރާތަށް ކޮލިފައިވީ މިދިޔަ އަހަރު ދިވެހި ޕްރިމިއާ ލީގުގެ ރަނަރަޕްގެ ހައިސިއްޔަތުންނެވެ. ތިމްޕޫ މެޗަށް އީގަލްސް އިން ވަނީ މިއަދު ހޮޓެލް ޖެންގައި ކޭމްޕްކޮށްފަ އެވެ.
މީގެ ކުރިން ރާއްޖޭގެ ދެ ކްލަބް ވެސް މުބާރާތުގެ ގްރޫޕް ސްޓޭޖުން ފުރުސަތު ލިބެ އެވެ. އެކަމަކު ފަހުން އޭއެފްސީން މުބާރާތުގެ ފޯމެޓަށް ގެނައި ބަދަލާ އެކު ގްރޫޕް ސްޓޭޖުން ފުރުސަތު ލިބެނީ ރާއްޖޭގެ ޗެމްޕިއަނަށެވެ. އެ ހައިސިއްޔަތުން ގްރޫޕް ސްޓޭޖުގެ ފުރުސަތު ރާއްޖޭން ލިބުނީ މާޒިޔާ އަށެވެ. ދެން އޮތީ އިންޑިއާގެ ޗެމްޕިއަން އޭޓީކޭ މޯހަން ބަގާން އާއި ބަންގްލަދޭޝްގެ ޗެމްޕިއަން ބަޝުންދުރާ ކިންގްސް އެވެ.
ގްރޫޕް ސްޓޭޖުގެ ފަހު ޖާގަ ލިބޭނީ ކޮލިފައިން ކާމިޔާބުކުރާ ޓީމަކަށެވެ. ކޮލިފައިންގައި އީގަލްސްގެ އިތުރުން ދެން ވަރުގަދަކޮށް އޮތީ މީގެ ކުރިން ގްރޫޕް ސްޓޭޖުގައި ކުޅުނު ބަންގްލަދޭޝްގެ ޑާކާ އަބަހާނީ އާއި އޭއެފްސީ ކަޕްގެ ފައިނަލުގައި ވެސް ކުޅެފައިވާ އިންޑިއާގެ ބެންގަލޫރު އެވެ. ތިމްޕޫ އަތުން އީގަލްސް މޮޅުވެއްޖެނަމަ މި މަހު 14 ވަނަ ދުވަހު އަބަހާނީއާ ކުޅެން ޖެހޭނެ އެވެ.
ގްރޫޕް ސްޓޭޖުގެ މެޗުތައް ހޯސްޓްކުރުމުގެ ބިޑް ރާއްޖޭން ވަނީ ކާމިޔާބުކޮށްފަ އެވެ. މެޗުތައް ބާއްވާނީ އަންނަ މަހު 14 އިން 21 ގެ ނިޔަލަށެވެ.
