ޓައިވާނުގައި މިދިޔަ ހުކުރު ދުވަހު ހިނގި ނުރައްކާތެރި އެކްސިޑެންޓުގައި ރޭލު ދަގަނޑު މައްޗަށް އެރި ކޮންސްޓްރަކްޝަން އުޅަނދު ނިސްބަތްވާ ސައިޓުގެ މެނޭޖަރު މައާފަށް އެދިއްޖެ އެވެ.
އުމުރުން 49 އަހަރުގެ ލީ ޔީ ސިއާންގް ބުނީ އެ ހާދިސާއާ ގުޅިގެން ހިތާމަ ކުރާ ކަމަށާއި އިހްލާސްތެރިކަމާއެކު މައާފަށް އެދެން ބޭނުންވާ ކަމަށެވެ.
ސިއާންގްގެ ކޮންސްޓްރަކްޝަން ސައިޓުގައި ދުއްވާ އުޅަނދު ރޭލު ދަގަނޑު ކައިރީގައި ޕާކުކޮށްފައި އޮތް އިރު، ދަގަނޑު މައްޗަށް އަރަން މެދުވެރިވީ އުޅަނދުގެ ބްރޭކް ޗެކުނުކޮށް ހުރުމުން ކަމަށް ބީބީސީގައި ވެއެވެ.
ފާއިތުވި ދިހަ އަހަރުގެ ތެރޭގައި ޓައިވާނުގައި ހިނގި އެންމެ ނުރައްކާތެރި ރޭލު ހާދިސާގައި 51 މީހުން މަރުވެ، 200 އަށް ވުރެ ގިނަ މީހުން ޒަހަމްވި އެވެ.
ހާދިސާ ހިނގި މަންޒަރު ފެންނަ ސީސީޓީވީ ފުޓޭޖުން ދައްކާ ގޮތުގައި އުޅަނދު ދަގަނޑު މައްޗަށް އެރުމުން ރޭލު ދުއްވަން އިން މީހާއަށް ގޮތެއް ނިންމަން ލިބުނީ އެންމެ 6.9 ސިކުންތެވެ.
ރޭލާއި އުޅަނދާ ދެމެދު އޮތީ 250 މީޓަރުގެ ދުރުމިނެއް ކަމުން އެހާ ކުޑަ ވަގުތުކޮޅެއްގެ ތެރޭގައި ރޭލު ހުއްޓުވާނެ ފުރުސަތެއް ޑްރައިވަރެއް ލިބިފައެއް ނުވެ އެވެ.
ފުލުހުންގެ ތަހުގީގުން ބަލަމުން ދަނީ އުޅަނދުގެ ބްރޭކް މަސައްކަތް ނުކުރި ސަބަބެވެ. އެގޮތުން އެއީ އުޅަނދުގެ ވެރިފަރާތުގެ އިހުމާލު އޮތް ކަމެއްތޯ ބަލާނެ އެވެ.
ނިމުނު ހަފްތާ ބަންދުގައި އުޅަނދު ނިސްބަތްވާ ސައިޓުގެ ސިއާންގް ހައްޔަރުކޮށް ސުވާލު ކުރުމަށް ފަހު މިހާރު ވަނީ ކަފާލާތުގެ ދަށުން ދޫކޮށްފަ އެވެ.
ހާދިސާއާ ގުޅިގެން ޓްރާންސްޕޯޓް މިނިސްޓަރު ވަނީ އެކަމުގެ ޒިންމާ ނަންގަވާ އިސްތިއުފާ ހުށަހަޅުއްވާފަ އެވެ. ނަމަވެސް ބޮޑުވަޒީރުގެ އޮފީހުން އިސްތިއުފާ ބަލައިގަނެފައެއް ނުވެ އެވެ.
އެ އޮފީހުން ބުނީ މިއީ ލިބުނު ގެއްލުން ކުޑަކުރަން މަސައްކަތް ކުރަންވީ ވަގުތު ކަމަށެވެ. އެހެންކަމުން ޓްރާންސްޕޯޓް މިނިސްޓަރު ވިދާޅުވީ އެ މަސައްކަތަށް ފަހު އޭނާ ޒިންމާ ނަންގަވާނެ ކަމަށެވެ.
