ކައުންސިލް އިންތިހާބު އޮންނަ ދުވަހު ކަރަންޓީންގައި ތިބޭ މީހުން ވޯޓުލާން ނަގަން ޖެހޭ ހުއްދަތައް ނެގުމާއި ވޯޓުލާން ދިއުމުގެ އިންތިޒާމު ހަމަޖައްސަން ޖެހޭނީ އަމިއްލައަށް ކަމަށް އިލެކްޝަންސް ކޮމިޝަން (އީސީ)ގެ އުސޫލުގައި ބުނެފި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މި އިންތިހާބަށް ނެރުނު ގައިޑްލައިންގައިވާ ގޮތުން ކޮވިޑް-19 އަށް ޕޮޒިޓިވް މީހުންނާއި ކަރަންޓީންގައި ތިބޭ މީހުން ވޯޓުލާން ގެންދިއުމަކީ އިލެކްޝަންސް ކޮމިޝަނުގެ ޒިންމާއެކެވެ. މިއީ, އިލެކްޝަނަށް ކުރެވޭނެ ކަމެއް ނޫން ކަމަށް ބުނެ އެ ކޮމިޝަނުން ކަންބޮޑުވުން ވެސް ފާޅުކުރި އެވެ.
ކޮވިޑް-19އާ ގުޅިގެން އައިސޮލޭޝަންގައި ތިބޭ މީހުންނާއި ކަރަންޓީންގައި ތިބޭ މީހުން ވޯޓުލުމުގައި އަމަލު ކުރާނެ އުސޫލު މިއަދު އާއްމު ކޮށްފައިވާއިރު އޭގައި ބުނަނީ ވޯޓުލާ ދުވަހު ކަރަންޓީންގައި ނުވަތަ އައިސޮލޭޝަންގައި ތިބޭނެ މީހުންގެ މައުލޫމާތު އަންނަ ބުދަ ދުވަހުގެ ކުރިން އެޗްޕީއޭން އީސީއަށް އަންގަން ޖެހޭނެ ކަމަށެވެ.
އެ އުސޫލު ބުނާގޮތުން ކަރަންޓީންގައި ތިބޭ މީހުންގެ ތެރެއިން ވޯޓުލާން ބޭނުންވާ މީހުން ވޯޓުލައި ނިންމުމަށް ކަނޑައަޅާފައިވާ ގަޑީގެ ފަސް ގަޑިއިރު ކުރިން އެޗްޕީއޭ މެދުވެރިކޮށް އީސީގެ ޓާސްކް ފޯހަށް އެކަން އަންގަން ވާނެ ކަމަށެވެ.
ކަރަންޓީންގައި ތިބޭ މީހުންނަށް ވެސް ވޯޓް ލެވޭނީ އެ މީހަކު ވޯޓްލުމަށް ރަޖިސްޓްރީ ކޮށްފައިވާ ފޮއްޓަކަށް ކަމަށް އުސޫލުގައި ބުނެ އެވެ. އެ މީހުންނަށް ހާއްސަކޮށްފައިވާ ގަޑިއަކީ އެ ދުވަހުގެ ހަވީރު ފަހަކުން ހައަކަށެވެ. އަދި އެ މީހުންނަށް ވޯޓުލެވޭނީ އެ ފޮއްޓަކަށް ވޯޓުލާން ކިޔޫގައި ތިބި މީހުން ވޯޓުލައި ނިމުމުން ކަމަށް ވެސް އުސޫލުގައި ބުނެ އެވެ.
އުސޫލުގައި އެހެން ބުނި ނަމަވެސް ކަރަންޓީންގައި ތިބޭ މީހުން ވޯޓުލުމަށް ވަގުތު ހާއްސަ ކުރުމަށް އެހެން އިންތިޒާމުތަކެއް އެޗްޕީއޭގެ ލަފާގެ މަތީން އީސީއަށް ހަމަޖެއްސޭނެ ކަމަށް ވެސް ބުނެފައިވެ އެވެ.
އުސޫލު ބުނާ ގޮތުން ވޯޓުލުމަށް ކަރަންޓީންގައި ތިބޭ މީހުން ވައްދަން ޖެހޭނީ ސެނިޓައިޒް ކުރުމަށްފަހުގަ އެވެ. އަދި އެ މީހުން ވޯޓްލާން ވައްދާއިރު މަރުކަޒުތަކުގައި ތިބޭ އޮފިޝަލުން ތިބެން ޖެހޭނީ ހަ ފޫޓް ދުރުގަ އެވެ.
އީސީން އަންނަނީ އަންނަ ހޮނިހިރު ދުވަހު ބާއްވާ އިންތިހާބުގައި ވޯޓް ލުމަށް ހާއްސަ އިންތިޒާމުތަކެއް ހަމަޖެއްސުމަށް މަސައްކަތް ކުރަމުންނެވެ. ކޮވިޑްގެ ޕޮޒިޓިވް ކޭސްތައް ފެނިގެން މޮނީޓަރިންގެ ހާލަތަށް ގެނެސް، އަރައިފޭބުން މަނާކޮށްފައިވާ ރަށްތަކަށް، ވޯޓުލާ ދުވަހު ދަތުރުކުރެވޭ ގޮތް ހަދަން ވަނީ މަޝްވަރާ ފަށައިފަ އެވެ.
މިދިޔަ އަހަރުގެ އޭޕްރީލް މަހުގެ ކުރީކޮޅު ބާއްވަން އުޅުނު ލޯކަލް ކައުންސިލްތަކުގެ އިންތިހާބު ފަސް ކުރަން ޖެހުނީ ކޮވިޑްގެ ސަބަބުންނެވެ. އަންނަ ހޮނިހިރު ދުވަހު ހާއްސަ އިންތިޒާމުތަކެއްގެ ދަށުން އިންތިހާބު ބާއްވަނީ އެތައް ތާރީހެއް ކުރިން ކަނޑައަޅައި ފަސްކުރުމަށް ފަހުގަ އެވެ.
މި އިންތިހާބުގައި 273،128 މީހުންނަށް ވޯޓްލުމުގެ ހައްގު ލިބިގެންވެ އެވެ. އޭގެ ތެރެއިން 5،134 މީހުންނަކީ އިންތިހާބު އަހަރަކަށް ފަސްކުރުމުން އެ މުއްދަތުގެ ތެރޭގައި 18 އަހަރު ފުރުނު މީހުންނެވެ.
