ޓައިވާނުގައި މިދިޔަ ހުކުރު ދުވަހު ހިނގި ނުރައްކާތެރި ރޭލު އެކްސިޑެންޓުގެ ޒިންމާ ނަންގަވާ ކަމަށް ވިދާޅުވެ، ޓްރާންސްޕޯޓް މިނިސްޓަރު އިސްތިއުފާ ދެއްވަން ހުށަހަޅުއްވައިފި އެވެ.
ފަންސާހަށް ވުރެ ގިނަ މީހުން މަރުވި އެ ހާދިސާ ދިމާވީ ރޭލު ނިޒާމުގެ ސަލާމަތީ ކަންކަމުގައި ފަރުވާ ކުޑަ ކުރުމުން ކަމަށް ބުނެ މިނިސްޓަރު ލިން ޗިއަ ލުންގްއަށް ވަނީ ފާޑުކިޔުން އަމާޒުވެފަ އެވެ.
އެ ހާދިސާ ހިނގި ސަރަހައްދަށް ވަޑައިގެން ނޫސްވެރިންނަށް މައުލޫމާތު ދެއްވަމުން ޗިއަ ލުންގް ވިދާޅުވީ "ޒިންމާއިން ބަރީއަވާން" ނޫޅޭނެ ކަމަށެވެ.
"މި ހާދިސާގެ ސަބަބުން ލިބުނު ގެއްލުން ކުޑަ ކުރުމުގެ މަސްއޫލިއްޔަތު ވެސް އުފުލަން ޖެހެނީ އަޅުގަނޑު. އެ މަސައްކަތް ނިމުމާއެކު ހާދިސާ ދިމާވުމުން އުފުލަން ޖެހޭ ޒިންމާ އަޅުގަނޑު އުފުލާން،" އޭނާ ވިދާޅުވި ކަމަށް ރޮއިޓާޒްގައި ވެއެވެ.
ޗިއަ ލުންގް އިސްތިއުފާ ދެއްވަން ނިންމާ އެކަން ވަނީ ބޮޑުވަޒީރު ސު ސެންގް ޗަންގްގެ އޮފީހަށް އަންގަވާފަ އެވެ. ނަމަވެސް އެ އިސްތިއުފާ ބަލައިގަނެފައެއް ނުވެ އެވެ. ބޮޑުވަޒީރު ސެންގް ޗަންގް ވިދާޅުވީ މި ވަގުތު ސަމާލުކަން ދޭންވީ ލިބުނު ގެއްލުމުން އަރައިގަތުމަށް ކަމަށެވެ.
މިދިޔަ ހުކުރު ދުވަހު އެ ހާދިސާ ހިނގިީ އޮޅިގެން ރޭލު ދަގަނޑު މައްޗަށް އަރާފައި އޮތް ކޮންސްޓްރަކްޝަން އުޅަނދެއްގައި ރޭލު ޖެހުމުންނެވެ. ކޮންސްޓްރަކްޝަން އުޅަނދު ނިސްބަތްވާ ސައިޓުގެ މެނޭޖަރު، ލީ ޔީ ސިއާންގެ ތަހުގީގު މިހާރު ވަނީ ފަށާފަ އެވެ.
ތުހުމަތު ކުރެވޭ ގޮތުގައި ހާދިސާ ހިނގަން މެދުވެރިވީ ކޮންސްޓްރަކްޝަން އުޅަނދުގެ ބްރޭކް ރަނގަޅަށް މަސައްކަތް ނުކުރުމުންނެވެ. އިއްޔެ ޔީ ސިއާން ހައްޔަރު ކުރުމަށް ފަހު ވަނީ ކަފާލާތުގެ ދަށުން ދޫކޮށްފަ އެވެ.
