ނިއުދިއްލީ (އޭޕްރީލް 3) - މިދިޔަ ހަފްތާގައި ކޮވިޑް-19 އަށް ޕޮޒިޓިވްވި އިންޑިއާގެ ކްރިކެޓް ލެޖެންޑް ސަޗިން ޓެންޑުލްކާ, އޭނާގެ އާއިލާ ޑޮކްޓަރުގެ ލަފާގެ މަތިން ހޮސްޕިޓަލްގައި އެޑްމިޓްކޮށްފި އެވެ.
އުމުރުން 47 އަހަރުގެ ޓެންޑުލްކާ ކޮވިޑަށް ޕޮޒިޓިވްވީ މީގެ ހަފްތާއެއް ކުރިންނެވެ. ކޮވިޑް ޖެހިގެން މާ ބޮޑަށް ހާލަތު ގޯސްނުވި ނަމަވެސް ޓެންޑުލްކާގެ އާއިލީ ޑޮކްޓަރު ލަފާދިނީ އޭނާ ހޮސްޕިޓަލްގައި އެޑްމިޓްވުމަށެވެ. ޓެންޑުލްކާ ކުރި ޓްވީޓެއްގައި ބުނެފައިވަނީ ރައްކާތެރިކަމުގެ ފިޔަވަޅެއްގެ ގޮތުން ހޮސްޕިޓަލްގައި އެޑްމިޓްވި ނަމަވެސް އުއްމީދުކުރަނީ ވީ އެންމެ އަވަހަށް ގެއަށް ދިއުމަށް ކަމަށެވެ.
ފަހަކަށް އައިސް އިންޑިއާގައި ކޮވިޑްގެ ޕޮޒިޓިވް ކޭސްތައް ފެންނަ އަދަދު ވަނީ އިތުރުވެފަ އެވެ. މިދިޔަ ބުރާސްފަތި ދުވަހު އިންޑިއާ އިން ވަނީ 81,466 ކޮވިޑް ކޭސް ރިޕޯޓްކޮށްފަ އެވެ. އެ ދުވަހު ކޮވިޑް ޖެހިގެން 469 މީހުން މަރުވިއިރު, މިއީ މިދިޔަ ޑިސެމްބަރު މަހަށް ފަހު އެއް ދުވަހެއްގައި އިންޑިއާ އިން ޕޮޒިޓިވް ކޭސް ފެނުނު ދުވަހެވެ.
އިންޑިއާ އިން މި ފަހުން އެންމެ ގިނައިން ޕޮޒިޓިވް ކޭސް ފެންނަނީ ޓެންޑުލްކާ ދިރިއުޅޭ މުމްބާއީ މަހަރާޝްތުރާ ސްޓޭޓުންނެވެ.
ޓެންޑުލްކާ ކްރިކެޓް ކުޅުން ހުއްޓާލީ 2013 ވަނަ އަހަރު އެވެ. އިންޑިއާގެ އިތުރުން މުޅި ދުނިޔޭގެ ކްރިކެޓްގެ އިތުރުން ކުޅިވަރު ދުނިޔޭގައި މަޝްހޫރު ޓެންޑުލްކާ ދާދި ފަހުން ވަނީ އިންޑިއާގެ ވެޓަރަންސް ކްރިކެޓް މެޗެއްގައި ކުޅެފަ އެވެ. އުމުރުން 16 އަހަރުގައި ބައިނަލްއަގުވާމީ ކްރިކެޓަށް 1986 ވަނަ އަހަރު ނުކުތް ޓެންޑުލްކާ އަތުގައި ކްރިކެޓްގެ ބޮޑެތި ރެކޯޑްތަކެއް އެބަހުއްޓެވެ. އޭގެ ތެރެއިން އެންމެ ހާއްސަ ރެކޯޑަކީ ޓެސްޓް މެޗުތަކުގައި ޖުމްލަ 15,921 ލަނޑު ހެދުމެވެ. އޭނާ އަކީ ކްރިކެޓް ތާރީހުގައި ޓެސްޓް މެޗުތަކުގައި އެންމެ ގިނަ ލަނޑު ހެދި ކުޅުންތެރިޔާ އެވެ.
