އައްޑޫ ސިޓީ ކައުންސިލްގެ ހުރިހާ ގޮނޑިއެއް ފަސޭހަ ކަމާއެކު އެމްޑީޕީން ކާމިޔާބު ކުރައްވާނެ ކަމަށް، އެމްޑީޕީގެ ރައީސް، ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.
އޮންލައިންކޮށް ބޭއްވި އައްޑޫ ކެމްޕެއިން ޖަލްސާގައި ނަޝީދު ވިދާޅުވީ އެމްޑީޕީން އެ ސިޓީ ކައުންސިލްގެ ހުރިހާ ގޮނޑިއެއް ކާމިޔާބު ކުރުން ގުޅިފައި އޮތީ އައްޑޫގެ ތަސައްވަރާ ކަމަށެވެ. އައްޑޫ ތަރައްގީގެ ތަސައްވަރު ގުޅިފައި އޮތީ އެމްޑީޕީއާ ކަމަށް ވެސް ނަޝީދު ވިދާޅުވި އެވެ.
"މި ކައުންސިލް މެދުވެރިކޮށް އައްޑޫގެ ތަރައްގީ ހައްގު މިންވަރުގައި އިންޑިއާ ކަނޑުގެ މެދުގައި އައްޑޫ ރައްޔިތުންނަށް ހޯދައި ދޭނެ،" އައްޑޫގައި އޮންލައިންކޮށް ގިނަ ބަޔަކު ބެލި ޖަލްސާގައި ނަޝީދު ވިދާޅުވި އެވެ.
ރައްޔިތުންގެ މަޖިލީހުގެ ރައީސް، ނަޝީދު ވިދާޅުވީ އައްޑޫ ރައްޔިތުން ބޭނުން ވަނީ ލާމަރުކަޒީ ނިޒާމެއް ކަމަށާއި ރާއްޖޭގެ ރަށްތަކުގެ ތެރެއިން ރަށްވެހިކަމެއް އެންމެ ބޮޑަށް ފައްކާ ކޮށްފައި އޮތީ އެ ސިޓީގައި ކަމަށެވެ. ގަން އިންޓަނޭޝަނަލް އެއާޕޯޓާއި ސީޕޯޓް ހިންގުމާއި އެތަންތަނުގެ ހިއްސާ އައްޑޫގެ ރައްޔިތުންނަށް ދޭން ޖެހޭ ކަމަށް ވެސް ނަޝީދު ވިދާޅުވި އެވެ.
"އައްޑޫގެ ބިމު އަޑީގައިވާ ހުރިހާ ނަރަކާއި ހުރިހާ ހޮޅިއަކާއި ބިމުމަތީގައިވާ ހުރިހާ ތާރަކާއި ހުރިހާ ގަލަކާއި ހުރިހާ މަގެއް. ހުރިހާ ޔޫޓިލިޓީއެއްގެ ހިދުމަތެއް އެއީ ކައުންސިލްގެ އެއްޗިއްސަށް ތަކެއްޗަށް ވުމަށް ލާމަރުކަޒީ ގާނޫނު މިވަނީ މާބޮޑަށް މާ ފުރިހަމައަށް ޖާގަ ދީފައި،" ނަޝީދު ވިދާޅުވި އެވެ.
އައްޑޫ ސިޓީއަކީ އިންޑިއާ ކަނޑުގެ މެދު ކަމަށާއި އޭގެ ބޭނުން އައްޑޫ ރައްޔިތުން ހިފާނެ ކަމަށް ވެސް ނަޝީދު ވިދާޅުވި އެވެ. އެކަން ކުރަން އައްޑޫ މުޅި ދުނިޔެއަށް ހުޅުވެން ޖެހޭ ކަމަށާއި އެކަން ކުރުމަށް އިލްތިމާސް ކުރައްވާ ކަމަށް ވެސް ނަޝީދު ވިދާޅުވި އެވެ.
"އިރުމަތީ އެފްރިކާއަށް ދަތުރު ފައްޓަވާށޭ މޮމްބާސާއަށް އަނެއްކާ ވެސް ވަޑައިގަންނަވާށޭ އައްޑޫއާ އީސްޓް އެފްރިކާއާ ގުޅާލަދެއްވާށޭ. އެއީއޭ އައްޑޫގެ މުއްސަދިކަން އޮތް ތަނަކީ،" ނަޝީދު ވިދާޅުވި އެވެ.
ނަޝީދު ވިދާޅުވީ، އިންޑިއާގެ އެހީގައި އައްޑޫގައި ހަދާފައިވާ ފުލުހުންގެ ޓްރެއިނިން ސެންޓަރަކީ ސްޓްރެޓިޖިކް ޑިޕާޓްމަންޓަކަށް ހަދަން ޖެހޭ ކަމަށެވެ. އިންޑިއާ ކަނޑުގެ ސަލާމަތަށް ފަންނީ ލަފާ ދޭ ތަނަކަށް އެތަން ވާން ޖެހޭ ކަމަށް ވެސް ނަޝީދު ވިދާޅުވި އެވެ.
