ކޮރަޕްޝަންގެ ވާހަކައިން ފައްޔާޒާއި ނަޝީދު އަނެއްކާ ހޫނުވެއްޖެ

ނަޝީދާއި ފައްޔާޒު އިވެންޓެއްގައި އެކުގައި ބައިވެރިވަޑައިގަންނަވަނީ: ދެ ބޭފުޅުންގެ މެދުގައި އޮތް ނުތަނަވަސްކަން ދަނީ ބޮޑުވަމުން --

ނަޝީދާއި ފައްޔާޒު އިވެންޓެއްގައި އެކުގައި ބައިވެރިވަޑައިގަންނަވަނީ: ދެ ބޭފުޅުންގެ މެދުގައި އޮތް ނުތަނަވަސްކަން ދަނީ ބޮޑުވަމުން --

ސިޔާސީ މަޝްރަހުގައި މިވަގުތު އެންމެ ބޮޑު ނުތަނަވަސްކަމެއް ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި އިކޮނޮމިކް މިނިސްޓަރު ފައްޒާރު އިސްމާއިލްއާ ދެމެދު ވަނީ އުފެދިފަ އެވެ. ދެ ބޭފުޅުންނަކީ ވެސް ޕާޓީގެ ތެރޭގައި ނުފޫޒުގަދަ ދެ ބޭފުޅުންނަށްވާއިރު، އުފެދިފައި އޮތް ނުތަނަވަސްކަން އަނެއްކާވެސް ވަނީ ހޫނުވެފަ އެވެ.

މިފަހަރު ދެ ބޭފުޅުންގެ މެދުގައި ވަނީ ހޫނު ބަހުގެ ހަމަލާތަކެއް ބަދަލު ކުރައްވާފަ އެވެ. މިކަން ފެށިގެން ދިޔައީ އެމްޑީޕީގެ ގައުމީ މަޖިލީހުގެ މެންބަރުން ތިއްބަވާ ވަޓްސްއަޕް ގްރޫޕްގައި ފައްޔާޒަށް އަމާޒު ކުރައްވައި ނަޝީދު ކުރެއްވި މެސެޖާ ހަމައިންނެވެ.

"ފަޔާ ފޮރުވަން އުޅެން ހަދައިން ރައިސުލްޖުމްހޫރިއްޔާ ހަލާކު ވާނީ،" ވެންޓިލޭޓަރުތަކުގެ މައްސަލާގައި ދައުވާ ނުކުރަން ނިންމާފައިވާތީ ހިތްހަމަނުޖެހިވަޑައިގެން ހުންނެވި ނަޝީދު ލިޔުއްވާފައިވެ އެވެ.

ނަޝީދު އަމާޒު ކުރެއްވި ހަމަލާއަށް ފައްޔާޒު ވަގުތުން ރައްދު ދެއްވި އެވެ.

"ސާފުކޮށްލައްވާ! އަޅުގަނޑު ފޮރުވާކަށް ނުޖެހޭނެ، އެހެން މީހުންނާ ދިމާލަށް އެއްޗެހި ބުނަންޏާ އެހެން މީހުން ވެސް އެއްޗެހި ބުނާނެކަން ގަބޫލު ކުރަން ވާނެ، މިއީ ހަމަ އަސްލު ވެސް ނޯތުކޮރެއާއެއް ނޫން، ނޯ މޯ ރޫމް ފޯ ޑިކްޓޭޓަޝިޕް،" ފައްޔާޒު ފޮނުއްވި މެސެޖްގައިވެ އެވެ.

ފައްޔާޒު އިތުރަށް ފޮނުއްވި މެސެޖްގައި ވިދާޅުވީ މީހަކު ހަމަ އެއްޗެއް ބުނާއިރަށް ނަޝީދު ފުންމައިގެން ޖެހިވަޑައިގަންނަން ނުޖެހޭ ކަމަށެވެ.

"އަޅުގަނޑުމެންނާ ދިމާއަށް ހިތު ހުރިހާ އެއްޗެއް ކިޔާއިރު އަޅުގަނޑުމެން ލައިގެން ތިބެވޭނީ ވަކި ވަރަކަށް، އެހެން ގޮތަކަށް އެކްސްޕެކްޓް ނުކުރައްވާ، މި ސިކުންތައްވުރެ ދުރަށް އަމިއްލަ ސަލާމަތަށް ނުބަލަން،" ފައްޔާޒު ވިދާޅުވި އެވެ.

ރައްދުގައި ނަޝީދު ވިދާޅުވީ ފައްޔާޒާ އިދިކޮޅުވާން ލަދުގަންނާނެ ކަމަށާއި ނަމަވެސް ނުކުމެ ހުންނެވީ އެމްޑީޕީގެ ތެރޭގައި ކޮރަޕްޝަން ހުއްޓުވަން ކަމަށެވެ.

"ކޮރަޕްޝަންގެ ވާހަކަ ހިނގާ ރަނގަޅަށް ދައްކާލަން!" ކޮރަޕްޝަންގެ ވާހަކަ ޕަބްލިކްގައި ދެއްކުމަށް ދައުވަތު ދެއްވަމުން ފައްޔާޒު ވިދާޅުވި އެވެ.

"ހިންގަވާ! މާދަމާ! އަވަސް ކުރައްވާ!" ނަޝީދު ލިޔުއްވި އެވެ.

ނަޝީދު ވަނީ ޓީވީ ޗެނަލްތަކުން ލައިވް ކުރާ ގޮތަށް އެމަނިކުފާނާއި ފައްޔާޒު، ކޮރަޕްޝަންގެ ވާހަކަ ދެއްކޭނެ އިންތިޒާމް ހަމަޖައްސައިދެއްވުމަށް އެމްޑީޕީގެ ޗެއާޕާސަން ހަސަން ލަތީފަށް ދަންނަވާފަ އެވެ.

"ލެޓް މީ ނޯ ޓައިމް އެންޑް ޕްލޭސް، ހަސަން ލަތީފް،" ފައްޔާޒު ލިޔުއްވި އެވެ.

ނަޝީދު މި ވާހަކަތައް ނިންމާލެއްވީ "ފައިސާ ނަގާ ގޮތާއި އެކަން ކުރި މީހުން" އަތުގައި އެބަހުރި ކަމާއި އަދި އެ ކަންކަން ފައްޔާޒު ވެސް ހާމަ ކުރައްވާނެ ކަމަށް ވިދާޅުވަމުންނެވެ.

"ހަމަ ހުރިހާ އެއްޗަކާއެކު، އާދެ! އަވަސް ކުރައްވާ!" ފައްޔާޒު ވެސް ވާހަކަތައް ނިންމާލެއްވި އެވެ.

ސަރުކާރުގެ އެންމެ ނުފޫޒު ގަދަ މިނިސްޓަރެއްގެ ގޮތުގައި ފައްޔާޒު ފާހަގަ ކުރެވިފައިވާއިރު ނަޝީދު ވަނީ މި ސަރުކާރުގެ "ބްރޯ"އަކަށް ފައްޔާޒު ވެފައިވާ ކަމަށް ވިދާޅުވެފަ އެވެ. ކަންކަމުގެ ތެރެއަށް ނުފޫޒު ފޯރުވައި ކޮރަޕްޝަން އިންތިހާއަށް ފައްޔާޒު ހިންގަމުންދާ ކަމަށް ނަޝީދު ތުހުމަތު ކުރައްވަ އެވެ.

ނަޝީދު ވަނީ ފައްޔާޒުގެ އިތުބާރު ނެތް ކަމުގެ މައްސަލަ ވެއްދުމަށް ވެސް މަސައްކަތްޕުޅު ކުރައްވާފަ އެވެ. ނަމަވެސް އެކަމަށް އެމްޑީޕީ މެންބަރުންގެ ތާއިދު ލިބިފައެއް ނުވެ އެވެ. ރައީސް އިބްރާހިމް މުހައްމަދު ސޯލިހު ވެސް ވަނީ ފައްޔާޒު ދިފާއު ކުރައްވާނެ ކަމަށް ވިދާޅުވެފަ އެވެ. މިކަމާ ގުޅިގެން ނަޝީދާއި ރައީސް އިބްރާހިމް މުހައްމަދު ސޯލިހާ ދެމެދު ވެސް ނުތަނަވަސްކަން އުފެދިގެން ދިޔަ އެވެ.

ނަޝީދު ކުރައްވާ ތުހުމަތުތަކަށް ފައްޔާޒު އަބަދުވެސް އިންކާރު ކުރައްވަ އެވެ. ނަމަވެސް މަޖިލިސް މެންބަރުން އެކިއެކި ކަންކަމުގައި އޭނާ އަރިހަށް އަންނަ ކަމާއި އެހެން މިނިސްޓަރުން ވެސް ހިޔާލު ހޯދައްވާ ކަމަށް ވަނީ ވިދާޅުވެފަ އެވެ. އޭނާއަކީ ވަރަށް ކޮލިޓީކޮށް މަސައްކަތް ކުރާ މީހެއް ކަމާއި ކޮރަޕްޝަން ހިންގިޔަސް އެއްވެސް މީހަކަށް ނޭނގޭނެ ކަަމަށް ވެސް ފައްޔާޒު ވިދާޅުވެފައިވެ އެވެ.

ކޮމެންޓް

ފަހުގެ ޚަބަރު

ލޯ ޑިގްރީ އިމްތިހާނަށް މާލެ އަންނާކަށް ނުޖެހޭނެ: ބާ ކައުންސިލް

ލޯ ޑިގްރީގެ އިމްތިހާނުތައް ހެދުމަށް މާލެއަށް ނުވަތަ ވަކި ހާއްސަ ރަށަކަށް ހާޒިރުވުން ލާޒިމު ނޫން ކަމަށާއި، ދަރިވަރުން ދިރިއުޅޭ ރަށެއްގެ ސްކޫލް ނުވަތަ ކައުންސިލް މެދުވެރިކޮށް އިމްތިހާނު ހެދޭނެ މަގު ބާ ކައުންސިލުން ފަހިކޮށްދީފިއެވެ. އަންނަ އަހަރުން ފެށިގެން އަމަލުކުރާ މި އުސޫލުގެ ދަށުން އިމްތިހާނު ހަދާ ގޮތަށް ބަދަލު އައި ނަމަވެސް، ކޯހުގެ މަންހަޖާއި ކިޔަވައިދޭ މުއްދަތަށް އެއްވެސް ބަދަލެއް ނާންނާނެއެވެ.

ތަރައްގީގެ އެއްވެސް ކަމެއް ކުރުމަށް ލާރިއެއް ނެތް: ޝާކިރު

އަންނަ އަހަރުގެ ބަޖެޓުގައި ރިކަރަންޓް ހަރަދަށް ކެނޑުމަށްފަހު ތަރައްގީގެ މަޝްރޫއުތަކަށް ފައިސާ ނެތް ކަމަށް ވިދާޅުވެ މެންބަރު އަހުމަދު ޝާކިރު ކަންބޮޑުވުން ފާޅުކުރައްވައިފިއެވެ. އޭނާ ވިދާޅުވީ ދައުލަތުގެ އާމްދަނީގެ ބޮޑުބައެއް ހަރަދުވަނީ ރިކަރަންޓް ކަންކަމަށް ކަމަށާއި، މަޝްރޫއުތައް ހިންގަން ޖެހެނީ އިތުރަށް ދަރަނި ނަގައިގެން ކަމަށެވެ. މީގެ އިތުރުން ސަރުކާރު ކުންފުނިތަކުން ބޮޑެތި ގެއްލުންވަމުންދާ ދިއުމަށްވެސް އޭނާ ވަނީ ފާޑުވިދާޅުވެފައެވެ.

"ސިޓިޒަންސް ކޮމްޕްލެއިންޓްސް" ލައުންޖުތަކެއް ގާއިމުކޮށްފި

ރައްޔިތުންގެ ޝަކުވާތަކާއި ކަންބޮޑުވުންތައް ސަރުކާރަށް ހުށަހެޅުމަށްޓަކައި މާލެ އާއި ހުޅުމާލޭގައި "ސިޓިޒަންސް ކޮމްޕްލެއިންޓްސް" ބިއުރޯގެ ދެ ލައުންޖެއް މިއަދު ވަނީ ހުޅުވައިފައެވެ. ސަރުކާރު ބަންދު ނޫން ކޮންމެ ދުވަހަކު ޚިދުމަތް ދޭ މި އޮފީސްތަކަކީ ރައީސުލްޖުމްހޫރިއްޔާގެ އޮފީހުގެ ދަށުން ހިންގާ، ރައްޔިތުންގެ މައްސަލަތަކަށް ހައްލު ހޯދައިދިނުމަށް ގާއިމުކުރި ތަންތަނެވެ.

ރިއަލް އެސްޓޭޓު ބިލު މަޖިލީހަށް ބަލައިގަނެފި

މި ބިލު ބަލައިގަންނަން ވޯޓު ދިނީ 42 މެންބަރުން. ބިލާ ދެކޮޅަށް ވޯޓު ދެއްވީ އެމްޑީޕީގެ 13 މެންބަރުން. މި ބިލު ދިރާސާކުރާނީ ގައުމީ ތަރައްގީ އާއި ތަރިކައިގެ ކޮމިޓީން. މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް އިންތިޒާމުތަކެއް ހިމަނާފައިވާ ބިލެއް

ބޮޑެތި ޖޫރިމަނާތަކެއް ހިމަނާފައިވާ އަބުރުގެ ބިލު ކޮމިޓީއަށް

ސޯޝަލް މީޑިއާގައި މީހެއްގެ އަބުރާ ބެހޭ ފަދަ ޕޯސްޓެއް ހިއްސާކޮށްފިނަމަ 5 ލައްކަ ރުފިޔާއާ ހަމައަށް ޖޫރިމަނާ ކުރެވޭ ގޮތަށް ހުށަހެޅި އަބުރުގެ ބިލު މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ. މި ބިލުގައި ބަހާއި، ފޮޓޯއާއި، އިޝާރާތް އަދި ފިލްމު ފަދަ ވަސީލަތްތައް މެދުވެރިކޮށް އަބުރާ ބެހުމުގެ ދައުވާ ކުރެވޭނެ ގޮތްތައް ބަޔާންކޮށްފައިވެއެވެ.

މަރުގެ އަދަބު ތަންފީޒު ކުރާ ބިލު ބަލައިގެންފި

ދަންޖައްސައިގެން މަރުގެ އަދަބު ތަންފީޒުކުރާ ގޮތަށް ސަރުކާރުން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފިއެވެ. މި ބިލުގައި މަރުގެ އަދަބު ތަންފީޒުކުރާނެ ގޮތާއި، އެކަން ހިންގާނެ ޕެނަލެއް އެކުލަވާލުމުގެ އިތުރުން، ބަލިވެއިނުމާއި ދަރިފުޅަށް ދެ އަހަރު ފުރުން ފަދަ އަދަބު ތަންފީޒުނުކުރެވޭނެ ހާލަތްތައް ބަޔާންކޮށްފައިވެއެވެ.

ތިން ކުންފުންޏެއްގެ މަނީ އެކްސްޗޭންޖު ލައިސަންސް ބާތިލްކޮށްފި

މަނީ ޗޭންޖިން ގަވާއިދާ ތަކުރާރުކޮށް ހިލާފުވި ތިން ކުންފުންޏެއްގެ ލައިސަންސް އެމްއެމްއޭ އިން ބާތިލުކޮށް، އެ ކުންފުނިތައް ބޮޑެތި އަދަދުތަކުން ޖޫރިމަނާކޮށްފިއެވެ. މި ފިޔަވަޅަކީ ބޭރު ފައިސާގެ ބާޒާރު ކޮންޓްރޯލްކޮށް، ގަވާއިދާ ހިލާފު މުއާމަލާތްތައް ހުއްޓުވުމަށް އެމްއެމްއޭ އިން ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.

Newsletter

Get the latest news delivered straight to your inbox