މިލާން (އޮކްޓޫބަރު 29) - އިޓާލިއަން ލީގުގައި ރޭ ކުޅުނު މެޗުތަކުން، އިންޓަ މިލާނާއި ނަޕޯލީ މޮޅުވިއިރު، އޭސީ މިލާނާއި ޔުވެންޓަސް ބަލިވެއްޖެ އެވެ.
ވެނެޒިއާ އަތުން 2-0 އިން އިންޓަ މޮޅުވިއިރު، ނަޕޯލީން 4-1 އިން މޮންޒާގެ މައްޗަށް ކުރިހޯދި އެވެ. ބޯލޯނިއާ ކައިރިން 4-2 އިން ބަލިވެ، މިލާން ވަނީ ފުރަތަމަ ފަހަރަށް މި ފަހަރުގެ ލީގުގައި ބަލިވެފަ އެވެ. އަދި، ޔުވެންޓަސް އަތުން ޖެނޯއާ ވަނީ 2-0 އިން ކާމިޔާބު ހޯދައިފަ އެވެ. އަދި، މި ހަފްތާގައި ލާޒިއޯ އިން ވަނީ 6-2 އިން ސަސުއޯލޯ ބަލިކޮށްފަ އެވެ.
އިޓާލިއަަން ލީގުގެ ތާވަލަށް ބަލާއިރު، އެއް ވަނައިގައި އޮތް އިންޓަ އާއި ދެ ވަނައިގައި އޮތް ލާޒިއޯ އަށް 9 މެޗުން ވަނީ 25 ޕޮއިންޓް ލިބިފަ އެވެ. ތިން ވަނައިގައި އޮތް ރޯމާ އަށް ނުވަ މެޗުން 21 ޕޮއިންޓް އަދި ހަތަރެއްގައި އޮތް ކޯމޯ އަށް ނުވަ މެޗުން 20 ޕޮއިންޓް ލިބިފައިވާއިރު، ފަސް ވަނައިގައި އޮތް މިލާނަށް ނުވަ މެޗުން 18 ޕޮއިންޓް ވަނީ ލިބިފަ އެވެ. އަދި، ހަ ވަނައިގައި އޮތް ނަޕޯލީ، ހަތް ވަނައިގައި އޮތް ފްރޮސިނޯނޭ އަދި އަށް ވަނައިގައި އޮތް ޔުވެންޓަސްގެ އޮތީ ނުވަ މެޗުން 14 ޕޮއިންޓެވެ.
އަމިއްލަ ދަނޑުގައި ކުޅުނު ވެެނެޒިއާ އިން އިންޓަ އަތުން ބަލިވީ މެޗުގެ ފަހު 10 މިނިޓް ތެރޭ ބައިކޮޅަށް ދެ ގޯލު ވަދެގެންނެވެ. އިންޓަ މޮޅުވި ލަނޑުތަކަކީ، ވެނެޒިއާގެ ރަޑުއޯން ހަލްހަލް އާއި މަޓިއަސް މޮރޭނޯ އަތުން ބައިކޮޅަށް ވަން ގޯލުތަކެކެެވެ.
ނަޕޯލީ އަށް ރޭގެ މެޗުގައި ލަނޑުތައް ޖަހައިދިނީ ކެވިން ޑި ބްރޭނާ، ރަފާ މަރީން، މަޓެއޯ ޕޮލިޓާނޯ އަދި ރަސްމުސް ހޮއިލުންޑް އެވެ. އަދި، މޮންޒާގެ ހަމައެކަނި ލަނޑު ޖެހީ، ގުސްޓާވޯ ވަރޭލާ އެވެ. ޖެނޯއާ އިން ޔުވެންޓަސް ބަލިކުރިއިރު، ލަނޑުތައް ޖެހީ، ކިންގްސްލީ އެހިޒީބޭ އާއި ޓޮމާސޯ ބަލްޑަންޒީ އެވެ.
ރުބެން އަމޮރިމްގެ މިލާންގެ މައްޗަށް ބޮލޯނިއާ އިން ކުރިހޯދިއިރު، ލަނޑުތައް ޖެހީ، ސެމުއެލް އެމްބަންގޫލާ ހެޓްރިކެއްގެ އިތުރުުން، މިލާންގެ ޑާވިޑޭ ބާޓެސާޖީ އަތުން ބައިކޮޅަށް ވަން ގޯލެކެވެ. މިލާންގެ ދެ ލަނޑު ވެސް ޖެހީ މި ވަގުތު ތަފާތު ފޯމެއްގައި ކުޅެމުން އަންނަ ފޯވާޑް، އަލްފަޑްޖޯ ސީސޭ އެވެ.
