ޓިއުރިން، އިޓަލީ (ސެޕްޓެމްބަރު 25) - ފުޓްބޯޅަ ކެރިއަރުގައި އެންމެ އުނދަގުލުން ކުރި އެއް ކަމަކީ މެންޗެސްޓާ ސިޓީގެ ކޯޗަކަށް ހުރެފައި ޕެޕް ގާޑިއޯލާ އެ ކްލަބަށް އަންނަން ދިން އޮފާ ގަބޫލުނުކޮށް ދޫކޮށްލަން ޖެހުން ކަަމަށް އިޓަލީގެ ޑިފެންޑަރު، ލިއޮނާޑޯ ބޮނޫޗީ ބުނެފި އެވެ.
ވޯލްޑް ސޮކާ އެޖެންސީ އަށް ދިން އިންޓަވިއުއެއްގައި، އުމުރުން 39 އަހަރުގެ ބޮނޫޗީ ވަނީ 2016 ވަނަ އަހަރު ސިޓީ އަށް ދިއުމަށް ލިބުނު އޮފާއާ ބެހޭގޮތުން ވާހަކަ ދައްކައިފަ އެވެ. ސިޓީ އަށް ގާޑިއޯލާ ބަދަލުވުމަށް ފަހު، އޭނާ ބޭނުންވީ އެ ޓީމުގެ ޑިފެންސް ބައްޓަންކުރަން ބޮނޫޗީ ލީޑުކުރާ ގޮތަށެވެ.
"އަހަރެން ކުޅޭ ސްޓައިލްގެ ފުޓްބޯޅަ އަކީ ގާޑިއޯލާ އެންމެ ގަޔާވާ ގޮތް. އެކަން ގާޑިއޯލާ ވެސް ފާހަގަކުރި. އެހެންވެ، ގިނަ ހަފްތާތަކެއް ވަންދެން އޭރު ގާޑިއޯލާ ވަނީ ވާހަކަ ދައްކާފައި. އަހަރެން މި ބުނަނީ ގާޑިއޯލާ އެ ގޮތަށް ވާހަކަ ދެއްކުމަކީ މުޅިން އެހެން ކަހަލަ ތަޖުރިބާއެއް،" ބޮނޫޗީ ބުންޏެވެ.
އޭނާ ބުނީ، އެ ފަހަރުގެ ޔޫރޯ ފުޓްބޯޅަ މުބާރާތުގެ ތެރެއިން އިޓަލީގެ މެޗުތަކަށް ތައްޔާރުވަމުންދިޔައިރު ވެސް ގާޑިއޯލާގެ އެ އޮފާގެ ކަންތައްތަކާ މެދު ވިސްނެމުންދިޔަ ކަމަށެވެ. އަދި، މުބާރާތުގެ ތެރެއިން ވެސް ބައެއް މަޝްވަަރާތައް ކުރިއަށްދިޔަ ކަމަށް ބޮނޫޗީ ވަނީ ބުނެފަ އެވެ.
"ހަގީގަތަކީ އަހަންނަށް ބޮޑު ހިތްދަތި ކަމަކަށްވީ އޭރު ޔުވެންޓަސް ދޫކޮށްލަން ވިސްނުން ވެސް. ބައެއް ދުވަސްތަކުގައި ހިތައް އެރި ކިހާ ބޮޑު ފުރުސަތެއް ހޭ މިއީ، ޕްރިމިއާ ލީގުގައި ގާޑިއޯލާގެ ކޯޗުކަމުގައި ކުޅެލަން ލިބުމަކީ އެކަމަކު، އެ ހުރިހާ ކަމަަކަށް ވުރެން ޔުވެންޓަސްއާ އެކު އަހަރެންގެ ހުވަފެންތައް މާ ބޮޑު،" ބޮނޫޗީ ބުންޏެވެ.
ސީނިއާ ކެރިއަރުގައި ބަރީ، އިންޓަ މިލާން އަދި ޖެނޯއާ އަށް ކުޅުމަށް ފަހު، ބޮނޫޗީ، ޔުވެންޓަސް އަށް ބަދަލުވީ 2010 ވަނަ އަހަރު އެވެ. އެ ޓީމަށް ހަތް އަހަރު ކުޅެދިނުމަށް ފަަހު، ބޮނޫޗީ ވަނީ 2017-2018 ސީޒަނުގައި އޭސީ މިލާނަށް ކުޅެފަ އެވެ. އަލުން، 2018 ވަަނަ އަހަރުގެ މެދުތެރެއިން ޔުވެންޓަސް އަށް ގޮސް، 2023 ގެ ސީޒަނުގެ ނިޔަލަށް އެ ޓީމަށް ކުޅުމަށް ފަހު، ބޮނޫޗީ ފަހުން ވަނީ ޔޫނިއަން ބާލިން އާއި ފެނަބާޗޭ އަށް ކުޅެފަ އެވެ. އޭނާ ފުޓްބޯޅަ ކެރިއަރު ނިންމާލީ 2024 ގެ މެއި މަހު ފެނަބާޗޭގައި ހުރެފަ އެވެ.
ޔުއެފާ ބީ ކޯޗިން ލައިސަންސް ހާސިލްކޮށްފައިވާ ބޮނޫޗީ ވަނީ އިޓަލީގެ 20 އަހަރުން ދަށުގެ އެސިސްޓަންޓް ކޯޗުކަމާއި އިޓަލީ ސީނިއާ ޓީމުގެ ޓެކްނިކަލް އެސިސްޓަންޓް ކޯޗުގެ ޒިންމާ އަދާކޮށްފަ އެވެ.
