ޒިއުރިކް (އޮކްޓޫބަރު 16) - އިއްޔެ ނިމިގެންދިޔަ ފީފާ ކައުންސިލް ބައްދަލުވުމުގައި، ފުޓްބޯޅައިގެ ހަރަކާތްތަކުން ސަސްޕެންޑްކޮށްފައި އޮތް ނޭޕާލްގެ މައްސަލަ އަށް ލުޔެއް ނުލިބި، ހާލަތު އިތުރަށް ގޯސްވުމުގެ ފުރުސަތު ބޮޑުވެއްޖެ އެވެ.
ފީފާ ކައުންސިލް ބައްދަލުވުމަށް ފަހު، އެ ފެޑެރޭޝަނުން އާންމުކުރި އެއްވެސް މީޑިއާ ބަޔާނެއްގައި ނޭޕާލްގެ ވާހަކަ މިހާތަނަށް ހިމަނާފައިނުވެ އެެވެ.
މިދިޔަ ޖޫން މަހުގެ 24 ވަނަ ދުވަހު، ފީފާ އިން ނޭޕާލް ސަސްޕެންޑްކުރީ، އޭގެ ކުރިން ހިނގައިދިޔަ ހަމަ މަހުގެ ތެރޭގައި، އެ ގަައުމުގެ ފުޓްބޯޅަ ފެޑެރޭޝަން، އަންފާގައި ހުރި މައްސަލަތައް ނޭޕާލް ސަރުކާރާ ގުޅިގެން ހައްލުކުރަން ދިން އެއްވެސް ފުރުސަތެއްގައި ފީފާގެ އެންގުންތަކަށް ފުރިހަމަ އަށް ބޯލަނބާފައިނުވާތީ އެވެ.
ފީފާ އިން އަދިވެސް ނޭޕާލަށް އަންގާފައި އޮތީ، ފީފާ އިން ދީފައިވާ އިރުޝާދާ އެއްގޮތަށް، އޯލް ނޭޕާލް ފުޓްބޯލް ފެޑެރޭޝަން (އަަންފާ)ގެ ކަންކަން ހަމަމަގަށް ގެނައުމަށެވެ. އަދި، އަންފާގެ އަސާސީ ގަވާއިދާ އެއްގޮތަށް، ސަރުކާރުގެ ނުފޫޒެއް ފޯރުވުމެއް ނެތި، ހުރި މައްސަލަތަކަށް ހައްލެއް ގެނެސްގެން މެނުވީ، ފީފާ އިން ނޭޕާލްގެ ސަސްޕެންޝަން އުވާލުމުގެ ފުރުސަތެއް ނެތެވެ.
އަންނަ މަހު، ބަންގްލަދޭޝްގައި ބާއްވާ ސާފް ޗެމްޕިއަންޝިޕްގައި ކުޅުމުުގެ ފުރުސަތު ނޭޕާލަށް ދޭން ނިންމީ، މިދިޔަ މަހުގެ ނިޔަލަށް ފީފާ ސަސްޕެންޝަނުން ސަލާމަތްވެގެންނެވެ. އެކަމަކު، ނޭޕަލަށް ދިން މުއްދަތުގެ ތެރޭގައި، އެ ގައުމަށް ސަސްޕެންޝަނުގެ މައްސަލައިގައި ހައްލެއް ނުހޯދި، 15 ވަަނަ ސާފް ޗެމްޕިއަންޝިޕްގައި އެ ޓީމުގެ ބައިވެރިވުމެއް ނޯންނާނެ އެވެ.
މިއީ، ސާފް ޗެމްޕިއަންޝިޕްގެ ތާރީހުގައި ވެސް ނޭޕާލް ނުލައި މުބާރާތް ބާއްވާ ފުރަތަމަ ފަހަރެވެ. ރާއްޖޭގައި 2021 ވަނަ އަހަރު ބޭއްވި ސާފް ޗެމްޕިއަންޝިޕްގެ ފައިނަލުގައި ކުުޅުނު ނޭޕާލް، އެންމެ ފަހުން 2023 ވަނަ އަހަރު ބޭއްވި ސާފް ޗެމްޕިއަންޝިޕްގައި ކެޓީ ގްރޫޕް ސްޓޭޖުންނެވެ.
ފީފާގެ ސަސްޕެންޝަނުގައި އޮތް ނޭޕާލުން ޑޮމެސްޓިކް ފުޓްބޯޅަ ކުރިއަށްގެންދިއުމަށް އެ ގައުމުގެ ސަރުކާރުން އަންނަނީ ބާރު އަޅަމުންނެވެ. އެކަމަކު، ފީފާގެ ސަސްޕެންޝަން އޮއްވައި، ނޭޕާލް ފުޓްބޯޅަ އަށް ފަންޑުކުރުމާއި އެކި އެކި ހަރަދުތައް ހަމަޖެއްސުމުގައި މި ވަގުތު ހުރި ގޮންޖެހުން ބޮޑެވެ.
މިދިޔަ އަހަރުތަކުގައި ދެކުނު އޭޝިއާގެ ގިނަ ގައުމުތަކެއް ވަނީ ފީފާގެ ސަސްޕެންޝަނާ ކުރިމަތިލާން ޖެހިފަ އެވެ. އެ ގޮތުން، އިންޑިއާ، ހަފްތާއެއްހާ ދުވަހަށް ފީފާގެ ސަސްޕެންޝަންގައި އޮތްއިރު، ސްރީ ލަންކާ އަށް ސަސްޕެންޝަން ހާލަތުން އަރައިގަނެވުނީ، ހަތް މަހަށް ފަހު އެވެ. އަދި، ޕާކިސްތާނަކީ މި ސަަރަހައްދުގައި އެކި ފަހަރު މަތިން ފީފާގެ ސަސްޕެންޝަން އަތުވެފައިވާ ގައުމެކެވެ. އެކަމަކު، އެ ގައުމުގެ ފުޓްބޯޅައިގެ ހާލަތު ވެސް މިހާރު އަންނަނީ މަޑުމަޑުން ރަނގަޅުވަމުންނެވެ.
