ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ބިސް ބުރު ސްޕޯޓްސް ކްލަބް 3-0 އިން ބަލިކޮށް ވިކްޓަރީ ސްޕޯޓްސް ކްލަބުން ލީގު ތާވަލުގެ އެއް ވަަނަ އަށް ޖެހިލައިފި އެވެ.
ވިކްޓަރީން ވަނީ ކުޅުނު ހަތަރު މެޗުން 10 ޕޮއިންޓް ހޯދައިފަ އެވެ. ކުރިން އެއް ވަނައިގައި އޮތް ކްލަބް އީގަލްސް އަށް ވަނީ ތިން މެޗުން ނުވަ ޕޮއިންޓް ލިބިފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި، ވިކްޓަރީން ވަނީ 27 ވަނަ މިނިޓްގައި ލީޑުނަގައިފަ އެވެ. މި ލަނޑު ޖެހީ އަހުމަދު ރިޒްވާން (ރިޒޭ) އެވެ. ވިކްޓަރީގެ ނައިޖީރިއާ ފޯވާޑް، އަލް ހާޖީ ގޭރޯ ބޮލުން ޖައްސާލި ބޯޅައަކަށް އޭރިއާތެރެއިން އަރައި، ރިޒޭ ވަނީ ބިސްބުރުގެ ކީޕަރު، ޕީޓާ ސާކޯޑީ އަށް އެއްވެސް ފުރުސަތެއް ނުދީ ގޯލަށް ބޯޅަ ފޮނުވާލައިފަ އެވެ. މި ހާފުގައި އިތުރު ގޯލެއް ޖަހަން ވިކްޓަރީން ކުރި މަސައްކަތް ކާމިޔާބެއްނުވި އެވެ.
އަނެއްކޮޅުން، ބިސް ބުރުން އެޓޭކަށް ޖެހިގެން ފުރުސަތެއް ލިބޭތޯ ކުރި މަސައްކަތްތައް ވެސް ކާމިޔާބުވާގޮތެއްނުވި އެވެ.
ވިކްޓަރީން ވަނީ ދެ ވަނަ ހާފު ފެށިގެން ތިން މިނިޓް ތެރޭ އެ ޓީމުން މެޗުގައި ޖެހި ދެ ވަނަ ލަނޑު ކާމިޔާބުކޮށްފަ އެވެ. މި ލަނޑު ޖެހީ، އޭރިއާތެރެއަށް ހުރަސްވި ބޯޅައަކުން، ރަވްޝަންބެކް އުގްލީ އެވެ. ކީޕަރު ޕީޓާ ކުރިއަށް އެރިވަގުތު އޭނާ އަށް ބޯޅަ ލިބުމުގެ ކުރިން، ރަވްޝަންބެކް ވަނީ ބޮލުން ގޯލަށް ބޯޅަ ފޮނުވާލައިފަ އެވެ.
ދެ ވަނަ ހާފުގެ ބޮޑުބައި ބޯ ވިއްސާރައިގެ ތެރޭގައި ކުުޅުނުއިރު، މެޗުގެ 54 ވަނަ މިނިޓްގައި ވިކްޓަރީގެ ތިން ވަނަ ލަނޑު ޖެހި އެވެ. މިއީ، ވިކްޓަރީގެ ހަސަން ނަޒީމް ގާސިމް (ޗޯޓު) އޭރިއާތެރެއަށް ބޯޅަ ހިފައިގެން ވަދެ، ގޯލު ކުރިމަތީގައި ހުސްކޮށް ހުރި ގޭރޯ އަށް ދީގެން ކާމިޔާބުކުރި ލަނޑެކެވެ.
އޭގެ ފަހުން، ވިކްޓަރީން އިތުރު ލަނޑެއް ޖަހަން ކުރި މަސައްކަތް ކާމިޔާބުވާގޮތެއްނުވީ، ކީޕަރު ޕީޓާ ރަނގަޅު ބޯޅަތަކެއް ހުއްޓުވުމުންނެނެވެ. އަނެއްކޮޅުން، ބިސް ބުރުގެ އެޓޭކްތައް ހުއްޓުވުމުގައި ވިކްޓަރީގެ ޑިފެންސް ލައިނުން ވަނީ ޖުމްލަކޮށް ރަނގަޅު މަސައްކަތްތަކެއް މި މެޗުގައި ކޮށްފަ އެވެ.
މާލެ ރީޖަން (ދެ ވަނަ ޑިވިޝަން ފުޓްބޯޅަ މުބާރާތް) ގެ ޗެމްޕިއަންކަން ހޯދައިދިގެން މި ފަހަރުގެ ދިވެހި ޕްރިމިއާ ލީގުގައި މުޅިން އަލަށް ކުޅޭ ބިސް ބުރުން ވަނީ ފުރަތަމަ ހަތަރު މެޗުގެ ތެރެއިން ދެ މެޗުން މޮޅުވެ، ދެ މެޗުން ބަލިވެފަ އެވެ. ލިބުނު ހަ ޕޮއިންޓާ އެކު، ބިސް ބުރު މި ވަގުތު އޮތީ ލީގުގެ ފަސް ވަަނައިގަ އެވެ.
