ޝަންހާއީ، ޗައިނާ (އޮކްޓޫބަރު 12) - ޗައިނާގައި މިހާރު ކުރިއަށްދާ ޝަންހާއީ މާސްޓާސްގެ ދެ ވަނަ ބުރުން ސްޕެއިނުގެ ކާލޯސް އަލްކަރާޒް ބަލިވުމާ އެކު، ޖަރުމަނުގެ އަލެކްސަންޑަ ޒްވެރެވް އަށް މި އަހަރުގެ ޓެނިސް ސީޒަން ނިމޭއިރު ދުނިޔޭގެ ރޭންކިން އެއް ވަނަ ޔަގީންވެއްޖެ އެވެ.
އުމުރުން 29 އަހަރުގެ ޒްވެރެވް އަށް ދުނިޔޭގެ ރޭންކިން އެއް ވަަނައިގެ ފުރުސަތު އެންމެ ފުރަތަމަ ފަހިވީ، އެ މަގާމުގައި އޮތް އިޓަލީގެ ޖަނިކް ސިނާ އަށް އަނިޔާވެ، މި ފަހަރުގެ ޓެނިސް ސީޒަނުގެ ބާކީބައިގައި ނުކުޅެވޭ ގޮތްވުމުންނެވެ. ދެން، އެއް ވަނަ އަށް އަރަން ރޭހުގައި އޮތީ ސްޕެއިނުގެ އަލްކަރާޒް އާއި ޒްވެރެވް އެވެ. އޭގެ ތެރެއިން، އަަލްކަރާޒް ވަނީ ޝަންހާއީ މާސްޓާސްގެ ތިން ވަނަ ބުރުގައި ބެލްޖިއަމްގެ ޒިޒޫ ބާގްސް އަތުން ބަލިވެފަ އެވެ. އެ ނަތީޖާއާ އެކު، އަލްކަރާޒްގެ ރޭންކިން ޕޮއިންޓް ރޭންކިން އެއް ވަނަ އަށް އަރާ ވަރަށް ދެން މި ސީޒަނުގައި ނުލިބޭނެކަން ޔަގީންވީ އެވެ.
"ދުނިޔޭގެ ރޭންކިން އެއް ވަނަ އަށް އެރޭނެކަން ޔަގީންވުމަކީ ހުވަފެނެއް ހަގީގަތަކަަށް ވުން،" ހަކުރުގެ ސީރިއަސް ބައްޔަކަށް ފަރުވާ ހޯދަމުން ޓެނިހުގައި ޕްރޮފެޝަނަލް ކެރިއަރެއް ބިނާކުރި ޒްވެރެވް ބުންޏެވެ.
ޒްވެރެވް ވަނީ މި ފަހަރުގެ ޓެނިސް ސީޒަނުގައި، ފްރެންޗް އޯޕަން އާއި ޔޫއެސް އޯޕަން ކާމިޔާބުކޮށްފަ އެވެ. ޓެނިސް ސީޒަން ނިމޭއިރު، އެއް ވަނަ އަށް ޒްވެރެވް އަރާނެކަން ޔަގީންވާއިރު، އޭނާ އަކީ އެކަން ހާސިލްކުރާ ޖަރުމަނުގެ ފުރަތަމަ ކުޅުންތެރިޔާ އެވެ. އަދި، މުޅިން އަލަށް އެންމެ ދޮށީ އުމުރުގައި ރޭންކިން އެއް ވަނަ އަށް އަރާނެ ކުޅުންތެރިޔާ އެވެ.
އެންމެ އަަވަހަށް ޒްވެރެެވް އަށް ރޭންކިން އެއް ވަނަ އަށް އެރޭނީ އަންނަ މަހުގެ ދެ ވަނަ ދުވަހު އެވެ.
މީގެ ހަަތަރު އަހަރު ކުރިން، 2022 ވަނަ އަހަރުގެ ފްރެންްޗް އޯޕަންގައި ކަކުލަށް ސީރިއަސް އަނިޔާއެއްވީ ނަމަވެސް އަލުން އެނބުރި އައިސް ޒްވެރެވް ފެންނަނީ ވަރުގަދަކޮށެވެ. އަދި، މީގެ ދެ އަހަރު ކުރިން، 2024 ވަނަ އަހަރުގެ މާޗް މަހުގެ ފަހުން، ޒްވެރެވް އައީ ފޯމު ރަނގަޅު ކުރަމުންނެވެ.
