އިންޑިއާގައި ކުރިއަށްދިޔަ ދި ކޮމަންވެލްތު ކިއު ސްޕޯޓްސް ޗެމްޕިއަންޝިޕް 2026 ގައި ވާދަކޮށް ރާއްޖޭގެ ގައުމީ ޕޫލް ބިލިއާޑް ޓީމުގެ ހަސަން ޝާޒް މުހައްމަދު އާއި ދީނާ އަހުމަދު ބޮޑު ކާމިޔާބީއެއް ހޯދައި، ރާއްޖޭގެ ޕޫލް ބިލިއާޑްގެ ތާރީޙުން ހާއްސަ ޖާގައެއް ހޯދައިފި އެވެ.
ކޮމަންވެލްތު ކިއު ސްޕޯޓްސް ޗެމްޕިއަންޝިޕް ކުރިއަށްދިޔައީ، އިންޑިއާގެ އަހުމަދުއާބާދުގައި، މި މަހު 7-10 އަށެވެ. މި މުބާރާތުގައި 42 ގައުމަކުން 144 ކުޅުންތެރިން ވާދަކޮށްފައިވެ އެވެ.
ތަފްސީލަށް ބަލާއިރު، އެއީ، ފިރިހެން 72 ކުޅުންތެރިންނާއި 72 އަންހެން ކުޅުންތެރިންނެވެ. ތަފާތު ޑިސިޕްލިންތަކަށް ބަލާއިރު، މި ފަހަރުގެ ކޮމަންވެލްތު ކިއު ސްޕޯޓްސް ޗެމްޕިއަންޝިޕްގައި ސްނޫކާ، އިންގްލިޝް ބިލިއާޑްސްގެ އިތުރުން 10-ބޯލް ޕޫލް، ހޭބޯލް އަދި ބްލެކްބޯލް ޑިސިޕްލިންތައް ވަނީ ބާއްވައިފަ އެވެ.
އެ މުބާރާތުގައި ވާދަކުރި ރާއްޖޭގެ ގައުމީ ފިރިހެން ޓީމުގެ ޝާޒް ވަނީ ކުއާޓާ ފައިނަލާ ހަމައަށް ދަތުރުކޮށް ގަދަ އަށް ކުޅުންތެރިންގެ ތެރޭގައި ހިމެނިފަ އެވެ. މިއީ، ރާއްޖޭގެ ޕޫލް ބިލިއާޑް ކުޅުންތެރިއަކު، މި ލެވަލްގެ މުބާރާތެއްގެ ކުއާޓާގައި ވާދަކުރި ފުރަތަމަ ފަހަރެެވެ. ގައުމީ ލެވަލްގެ ޕޫލް ބިލިއާޑް އެކި މުބާރާތްތަކުގައި ގިނަ ކާމިޔާބީތަކެއް ހޯދި ޝާޒް ވަނީ ކުއާޓާ ފައިނަލާ ހަމައަށް ދިޔައިރު، މުބާރާތުގެ އެންމެ ފަހުގެ ޗެމްޕިއަން ކްރެއިގް ބްރޯވާގެ މައްޗަށް ވެސް ކުރިހޯދައިފަ އެވެ. މިއީ، ހުރިހާ ގޮތަކުން ބެލިޔަސް ތައުރީފު ހައްގު ނަތީޖާ އެކެވެ.
އަންހެން ކެޓަގަރީ އަށް ބަލާއިރު، ދީނާ ވެސް ވަނީ ކުއާޓާ ފައިނަލުގައި ވާދަކޮށް، މި ލެވަލްގެ މުބާރާތެއްގެ ގަދަ އަށެއްގެ ތެރޭގައި ހިމެނިފަ އެވެ. އޭނާ ވެފައިވަނީ، ބައިނަލް އަގުވާމީ ލެވަލްގައި، އަންހެން ބިލިއާޑްގައި މެޗަކުން ކާމިޔާބު ހޯދި ދިވެހި ފުރަތަމަ ކުޅުންތެރިޔާ އަށެވެ.
ޕޫލް ބިލިއާޑުން ދެކޭގޮތުގައި، މިއީ، މި ކުޅިވަރު ކުރިއަރުވައި އާލާ ކުރުމަށްޓަކައި ކުރާ މަސައްކަތަށް ބަލާއިރު ލިބިގެންދިޔަ ވަރަށް ބޮޑު ކުރިއެރުމެއް ކަމަށެވެ. އަދި، މި ފަހަރުގެ މުބާރާތުގައި ހާސިލްކުރެވުނު ކަންކަމަށް ބަލައި، މުސްތަގުބަލުގައި ޕޫލް ބިލިއާޑް ކުޅުންތެރިން ބިނާކުރަން ގިނަ މަސައްކަތްތަކެއް ކުރަން ޕޫލް ބިލިއާޑް އެސޯސިއޭޝަނުން އޮތީ ތައްޔާރަށެވެ.
އަންނަ ޑިސެމްބަރު މަހު، ރިޔާދުގައި ކުރިއަށްދާ އޭޝިއަން އިންޑޯ މާޝަލް އާޓްސް ގޭމްސްގައި ގައުމީ ޕޫލް ބިލިއާޑް ޓީމުން ވާދަކުރާނެ އެވެ. އެހެންކަމުން، ކޮމަންވެލްތު މުބާރާތުގައި ލިބުނު ކާމިޔާބަކީ، އޭޝިއަން އިންޑޯ މާޝަލް އާޓްސް ގޭމްސްގައި ވާދަކުރަން ދާއިރު ލިބިގެންދިޔަ ހިތްވަރެކެވެ.
