ކަންސަސް ސިޓީ، ޔުނައިޓެޑް ސްޓޭޓްސް (ޖޫން 21) - ފީފާ ވޯލްޑް ކަޕް ފުޓްބޯޅަ މުބާރާތުގައި، ކީޕަރު އެލޯއި ރޫމްގެ އާދަޔާހިލާފު މޮޅު ކުޅުމާ އެކު، ކިއުރުސާއޯ އިން 0-0 އިން އެކުއެޑޯއާ އެއްވަަރުކޮށް ތާރީހީ ފުރަތަމަ ޕޮއިންޓް ހޯދައިފި އެވެ.
ވޯލްޑް ކަޕެއްގައި ވާދަކުރާ އެންމެ ކުޑަ ގައުމު ކަމަށްވާ ކިއުރުސާއޯ އިން ވަނީ ފުރަތަމަ މެޗުގައި ޖަރުމަނާ ދެކޮޅަށް ކުޅެ، 7-1 އިން ބަލިވެފަ އެވެ. އެހެންކަމުން، ދެ ވަނަ މެޗުގައި އެކުއެޑޯއާ ދެކޮޅަށް ނުކުތްއިރު އޮތީ ކޮންމެ ވެސް ވަރެއްގެ ޕްރެޝަރެއްގަ އެވެ.
އެކަމަކު، ކިއުރުސާއޯގެ ގޯލްކީޕަރު، އުމުރުން 37 އަހަރުގެ ރޫމް ވަނީ އެކުއެޑޯ އިން ފޮނުވާލި 15 ހަމަލާއެއް ހުއްޓުވައިފަ އެވެ. މިއީ، 2014 ވަނަ އަހަރު އެމެރިކާގެ ކީޕަރު، ޓިމް ހޮވާޑް، އެއް މެޗެއްގެ 90 މިނިޓް ތެރޭ، 15 ސޭވް ކޮށްގެން ހަދާފައިވާ ރެކޯޑާ އެއްވަރުގެ އަދަދެކެެވެ.
ރޫމް ވަނީ މި މެޗުގައި އެކުއެޑޯ އިން ފުރަތަމަ ހާފުގައި ފޮނުވާލި ހަ ޝޮޓެއް ދިފާއުކޮށްފަ އެވެ. އޭގެ ތެރެއިން އެންމެ ރަނގަޅު ހަމަލާތައް ފޮނުވާލީ އެނާ ވެލެންސިއާ އާއި ޔޮއާން ޔެބޯއާ އަދި ކެވިން ރޮޑްރިގޭޒް އަދި ނިލްސަން އެންގޯލޯ އެވެ. މީގެ އިތުރުން މި މެޗުގައި ގޮންޒާލޯ ޕްލާޓާގެ ހަމަލާ ވެސް ރޫމް ވަނީ ދިފާއުކޮށްފަ އެވެ.
އެކުއެޑޯ އިން ޖުމްލަ އެކު، 27 އެޓޭކްކުރިއިރު ގޯލެއް ނުޖެހުމަކީ އެ ޓީމުން މުބާރާތުގައި ކުރިއަށްދިއުމަށް ބަލާއިރު ގޮންޖެހުމެކެވެ.
ގްރޫޕް އީގެ ކޮންމެ ޓީމަކުން ދެ މެޗު ކުޅެފައިވާއިރު، ޖަރުމަނުން ވަނީ ހަ ޕޮއިންޓާ އެކު، އަނެއް ބުރުގެ ޖާގައެއް ހޯދައިފަ އެވެ. ދެ ވަނައިގައި އޮތީ ދެ މެޗުން ތިން ޕޮއިންޓާ އެކު އައިވަރީ ކޯސްޓެވެ. ތިން ވަނައިގައި އޮތް އެކުއެޑޯ އާއި ހަތަރެއްގައި އޮތް ކިއުރުސާއޯ އަށް ވަނީ ޕޮއިންޓެއް ލިބިފަ އެވެ. ގްރޫޕްގެ ފަހު މެޗުގައި، ކިއުރުސާއޯ އިން އައިވަރީ ކޯސްޓާ ކުޅޭއިރު، ޖަރުމަނުން ބައްދަލުކުރާނީ އެކުއެޑޯއާ އެވެ.
