މިލާން (އޮކްޓޫބަރު 24) - މެންޗެސްޓާ ޔުނައިޓެޑްގެ ކޯޗުކަމާ ހަވާލުވާން އެންޓޯނިއޯ ކޮންޓޭއާ މަޝްވަރާކުރާ ކަމަށް ދެކެވޭ ވާހަކަތައް އޭނާ ދޮގުކޮށްފި އެވެ.
އިޓަލީގެ ނޫހެއް ކަމަށްވާ، "ލަ ރިޕަބްލިކާ" އިން މިދިޔަ ބުރާސްފަތި ދުވަހު ރިޕޯޓްކޮށްފައިވާ ގޮތުގައި، ޔުނައިޓެޑުން ވަނީ ކޮންޓޭއާ އެކު މަޝްވަރާތަކެއް ކުރިއަށްގެންގޮސްފަ އެވެ. އަދި، ބީބީސީން ރިޕޯޓްކުރާގޮތުގައި، ޔުނައިޓެޑާ ހަވާލުވާން ކުރިން ޗެލްސީ އަދި ޓޮޓެންހަމް ހޮޓްސްޕާސް އަށް ކޯޗުކޮށްދިން ކޮންޓޭ ބޭނުންވެ އެވެ.
އެކަމަކު، އިންސްޓަގްރާމްގައި ކުރި ޕޯސްޓެއްގައި ކޮންޓޭ ބުނެފައިވަނީ، އެއްވެސް ކްލަބަކާ އެކު މަޝްވަރާތައް ކުރިއަށް ގޮސްފައިނުވާ ކަމަށެވެ.
"އަހަރެންގެ ނަން ވަރަށް ގިނަ ކްލަބްތަކާ ގުޅުވައިގެން ވާހަަކަ އެބަދެކެވޭ. އެކަަމަކު، މި ވަގުތާ ހަމަ އަށް ބުނަންޏާ މަޝްވަރާއެއް ނުކުރަން. އެކަން ކުރިއަށް ވެސް ގޮސްފައި ނެތް،" ކޮންޓޭ ބުންޏެވެ.
ކޮންޓޭ ބުނީ، މީޑިއާގައި ލިޔެފައިވާ ހަބަރުތަކުގައި އޭނާ ކޮށްފައިވާ ފައިނޭންޝިއަލް ޑިމާންޑްތަކާއި އެހެނިހެން ކަންކަމުގެ ވާހަކަ ހިމަނާފައިވީ ނަމަވެސް އެއީ ވެސް އެއްވެސް ހަގީގަތެއް ނެތް ވާހަަކަތަކެއް ކަމަށެވެ. އެއްވެސް ކްލަބަކުން އޭނާ އަށް ގަބޫލުކުރެވޭ އަދި މަޝްވަރާ ކުރަން ޖެހޭ ވަރުގެ އޮފާއެއް އައިސްފިނަމަ ވާހަކަ ދައްކާނެ ކަމަށާއި ބޭނުންވަނީ، ހުރިހާ ފަރާތެއްގެ އިހުތިރާމާ އެކު ކުރިއަށްދެވޭ ޕްރޮޖެކްޓެއްގައި މަސައްކަތް ކުރުމަށް ކަމަށް ކޮންޓޭ ބުނެފައިވެ އެވެ.
މިދިޔަ ސީޒަނަށް ފަހު، ނަޕޯލީގެ ކޯޗުކަމުން ވަކިވި ކޮންޓޭ މި ވަގުުތުު ހުރީ ހުސްކޮށެވެ. ނަޕޯލީ އަށް ފުރަަތަމަ ސީޒަނުގައި އިޓާލިއަން ލީގު ކާމިޔާބު ކޮށްދިން ކޮންޓޭ ވަނީ އިނގިރޭސި ޕްރިމިއާ ލީގު ޗެލްސީ އަށް ހޯދައިދީފަ އެވެ. އަދި، ޗެލްސީގައި ހުރެ، ޔުނައިޓެޑް ބަލިކޮށް އެފްއޭ ކަޕް ވެސް ކާމިޔާބުކުރި އެވެ.
ޔުނައިޓެޑްގެ ކޯޗުގެ މަގާމުގައި ދެމިހުންނަށް މައިކަލް ކެރިކަށް އަންނަނީ ޕްރެޝަރު ބޮޑުވަމުންނެވެ. ޔުނައިޓެޑުން ފާރަލަމުން އަންނަ ކޯޗުންގެ ތެރޭގައި ކޮންޓޭގެ އިތުރުން، ޖަރުމަނު ގައުމީ ޓީމުން މިދިޔަ ޖުލައި މަހު ވަކިކުރި ހޫލިއަން ނާގަލްސްމަން އަދި ނިއުކާސަލް ޔުނައިޓެޑާއި ބޯންމައުތަށް ކުރިން އިރުޝާދުދިން އެޑީ ހޯވް ހިމެނެ އެވެ.
