ޓޮރޮންޓޯ، ޔުނައިޓެޑް ސްޓޭޓްސް (މެއި 10) - އިންޓަ މިއާމީގެ ކެޕްޓަން، އާޖެންޓީނާގެ ތަރި، ލިއޮނަލް މެސީ، އެމެރިކާގެ ފުޓްބޯޅަ ލީގު، މޭޖަ ލީގު ސޮކާ (އެމްއެލްއެސް)ގައި ހާއްސަ ރެކޯޑެއް ގާއިމްކޮށްފި އެވެ.
އެ ގޮތުން، މެސީ އަކީ އެންމެ އަަވަހަށް އޭނާ ހިއްސާވެގެން، އެންމެ މަދު މެޗުން 100 ގޯލު ހަމަކުރި ކުޅުންތެރިޔާ އެވެ.
ޓޮރޮންޓޯ އަތުން 4-2 އިން އިންޓަ މިއާމީ މޮޅުވި މެޗުގައި މެސީ ވަނީ ސާޖިއޯ ރެގީއޯން އާއި ލުއިސް ސުއަރޭޒް ޖެހި ލަނޑަށް ފުރުސަތު ތަނަވަސްކޮށްދިނުމުގެ އިތުރުން ރޮޑްރީގޯ ޑެ ޕޯލް ދިން ބޯޅައަކުން ލަނޑެއް ވެސް ޖަހައިފަ އެވެ. މި މެޗުގައި އިންޓަ މިއާމީގެ އަނެއް ލަނޑު ޖެހީ ޑެ ޕޯލް އެވެ. މި މެޗުގައި ޓޮރޮންޓޯގެ ދެ ލަނޑު ވެސް ޖެހީ އެމީލިއޯ އަރިސްޓިޒަބާލް އެވެ.
ރޭގެ ލަނޑާއި ދެ އެސިސްޓާ އެކު، މެސީ ވަނީ އެމްއެލްއެސްގައި ކުޅުނު 64 މެޗުން 100 ގޯލުގައި ހިއްސާ އަދާކޮށްފަ އެވެ. މިއީ، ރެކޯޑެކެވެ. މީގެ ކުރިން އެންމެ އަވަހަށް 100 ގޯލުގައި ހިއްސާ އަދާކުރި ޓޮރޮންޓޯގެ ސަބެސްޓިއަން ޖިއޮވިންކޯ އަށް އެކަން ހާސިލްވީ 95 މެޗުންނެވެ.
ޕީއެސްޖީ ދޫކޮށް، 2023 ވަަނަަ އަހަރު އިންޓަ މިއާމީ އަށް ބަދަލުވެ، މިހާތަނަށް މެސީ ވަނީ ކުޅުނު މެޗުތަކުގައި 59 ގޯލު ޖަހައި، 41 ގޯލު ޖަަހަން ފުރުސަތު ތަނަވަސްކޮށްދީފަ އެވެ. އިންޓަ މިއާމީއާ އެކު މެސީ ވަނީ އެމްއެލްއެސް ކަޕާއި ލީގްސް ކަޕާއި ސަޕޯޓާސް ޝީލްޑް ހޯދައިފަ އެވެ. އަދި، އޭނާ އަކީ މިދިޔަ ދެ އަހަރު ވެސް އެމްއެލްއެސްގެ އެންމެ މޮޅު ކުޅުންތެރިޔާ އެވެ.
ރޭގެ ނަތީޖާއާ އެކު، އެމްއެލްއެސް އީސްޓާން ކޮންފަަރެންސް ލީގު ތާވަލުގައި އިންޓަ މިއާމީ އޮތީ ތިން ވަނައިގަ އެވެ. އެއީ، ނޭޝްވިލް އެފްސީ އާއި ނިއު އިންގްލެންޑް ރިވޮލިއުޝަން ފަަހަތުންނެވެ. ނޭޝްވިލް އަށް 11 މެޗުން ވަނީ 24 ޕޮއިންޓް ލިބިފަ އެވެ، ދެ ވަނައިގައި އޮތް ނިއު އިންގްލެންޑް ރިވޮލިއުޝަން އަށް 11 މެޗުން 22 ޕޮއިންޓް ލިބިފައިވާއިރު، އިންޓަ މިއާމީ އަށް ވެސް ވަނީ އެ އަދަދަށް މެޗު ކުޅެގެން އެ ވަރަށް ޕޮއިންޓް ލިބިފަ އެވެ. އެކަމަކު، ލަނޑުގެ ތަފާތުން ކުރި ލިބެނީ ނިއު އިންގްލެންޑް ރިވޮލިއުޝަން އަށެވެ.
