ޖާއްޓެ ބަލިކޮށް އިޔަން އަށް ތާރީހުގައި ލިޔެވޭ ކާމިޔާބެއް

ގައުމީ ބޮޑީބޯޑިން ލީގުގެ މި އަހަރުގެ ފަހު މުބާރާތް ކަމަށްވާ ބަނޑުފިލާ ޗެލެންޖްގެ ފައިނަލުގައި އަލީ ޖާވިދު (ޖާއްޓެ) ބަލިކޮށް އިޔަން އަހުމަދު ތާރީހީ ކާމިޔާބީއެއް ހޯދައިފި އެވެ.

މި ފަހަރުގެ މެންސް އޯޕަންގެ ފައިނަލުން އިޔަން ޖާގަ ހޯދީ މިދިޔަ އަހަރުގެ ޖޫނިއާ ޗެމްޕިއަން އާމިން އުމަރު މޫސާ ބަލިކޮށްގެންނެވެ. ސެމީގައި އީޔަން ވަނީ ޖުމްލަ 12.84 ސްކޯކޮށްފަ އެވެ. އާމިން އަށް ސްކޯކުރެވުނީ 10.43 އެވެ.

ރާއްޖޭގެ އެންމެ ކާމިޔާބު ބޮޑީބޯޑަރު، އަލީ ހުޝްރުވާން އަހުމަދު (ކުޑައައްޔަ) ކެޓީ ކުއާޓާ ފައިނަލުގައި ޖާއްޓެއާ ވާދަކޮށެވެ. އެ ގޮތުން، ކުއާޓާ ފައިނަލުގައި ކުޑަ އައްޔަގެ ސްކޯ އަކީ، 6.76 އެވެ. ޖާއްޓެ މޮޅުވީ، 9.33 ސްކޯކޮށްގެންނެވެ.

މެންސް އޯޕަން ފައިނަލުން ޖާއްޓެ ފައިނަލުން ޖާގަ ހޯދީ ސެމީގައި އަޝްރަފް ހަސަން ބަލިކޮށްގެންނެވެ. ސެމީގައި ޖާއްޓެ ޖުމްލަ 12.17 ސްކޯކުރިއިރު, އަޝްރަފް އަށް ސްކޯކުރެވުނީ 9.03 އެވެ.

ފައިނަލުގައި ޖާއްޓެ އާއި އިޔަންގެ ކުރިމަތިލުމެއް ފެނިގެންދިޔައިރު, އިޔަންގެ ކޯޗެއްގެ ގޮތުގައި ހަރަކާތްތެރިވަނީ ޖާއްޓެ އެވެ. ފައިނަލުގައި އިޔަން ޖާއްޓެ ބަލިކުރިއިރު، އިޔަން ވެގެން ގޮސްފައިވަނީ ބަނޑުފިލާ ޗެލެންޖް ކާމިޔާބުކުރި އެންމެ ހަގު އެތުލީޓަށެވެ.

ފައިނަލް ހީޓުގައި އިޔަން އެންމެ މަތިން ސްކޯކުރި ދެ ރާޅުން އޭނާ ވަނީ 4.83 އަދި 5.50 ސްކޯކޮށްފަ އެވެ. އިޔަންގެ ޖުމްލަ ސްކޯ އަކީ 10.33 އެވެ. ފައިނަލް ހީޓުގައި ޖާއްޓެ އެންމެ މަތިން ސްކޯކުރި ދެ ރާޅުގައި އޭނާ ވަނީ 4.00 އަދި 3.83 ސްކޯކޮށްފަ އެވެ. ޖާއްޓެ އަށް ޖުމްލަ ސްކޯކުރެވުނީ 7.83 އެވެ.

މީގެ އިތުރުން ބަނޑުފިލާ ޗެލެންޖްގެ ޖޫނިއާ ޗެމްޕިއަންކަން އިޔަން ބަލިކޮށް ހޯދީ އަޒާން އެވެ. ފައިނަލް ހީޓު އަޒާން 0.8 ސްކޯގެ ތަފާތުންނެވެ. ފައިނަލް ހީޓުގައި އީޔަން އެންމެ މަތިން ސްކޯކުރީ 3.00 އަދި 3.60 އެވެ. އަޒާން އެންމެ މަތިން ސްކޯކުރި ދެ ރާޅުން އޭނާ ވަނީ 4.17 އަދި 3.23 ސްކޯކޮށްފަ އެވެ.

މި ފަހަރުގެ ގައުމީ ލީގުގެ ޗެމްޕިއަންކަން ހޯދީ ޖާއްޓެ އެވެ. އަދި ޖޫނިއާ ލީގު ޗެމްޕިއަން އަކީ އަޒާން އެވެ.

ބަނޑުފިލާ ޗެލެންޖްގެ ޑްރޮޕްނީ ކެޓަގަރީގެ ޗެމްޕިއަންކަން، މި ފަހަރު ވެސް ހޯދީ ކުޑައައްޔަ އެވެ. ފައިނަލުގައި އާމިން އުމަރު މޫސާ ބަލިކޮށް ކުޑައައްޔަ ޗެމްޕިއަންކަން ހޯދި ސްކޯ އަކީ، 12.34 އެވެ. އާމިން އަށް ސްކޯކުރެވުނީ، 4.03 އެވެ.