ލޮސް އެންޖެލްސް، ޔުނައިޓެޑް ސްޓޭޓްސް (އޮގަސްޓް 31) - މިހާރު ކުރިއަށްދާ ޔޫއެސް އޯޕަން ޓެނިސް މުބާރާތުގެ ތިން ވަނަ ބުރުން ކަޓައި ސާބިއާގެ ލެޖެންޑް، ނޯވަކް ޖޮކޮވިޗަށް ކެރިއަރުގައި ވެސް ބޮޑު ވެއްޓުމަކާ ކުރިމަތިލާން ޖެހިއްޖެ އެވެ.
އޮލިމްޕިކްްސްގެ ރަން މެޑަލް ހޯދައި، ކެރިއަރުގައި ބޭނުންވާ ބޮޑު ހުރިހާ ކާމިޔާބެއް ފުރިހަަމަ ކުރި، ޖޮކޮވިޗް، 37، ޔޫއެސް އޯޕަންގެ ތިން ވަނަ ބުރުން ކެޓީ، އޮސްޓްރޭލިއާގެ އަލެކްސޭއި ޕޮޕީރިން އަތުންނެވެ. ޕޮޕީރިން ސެޓުތައް ގެންދިޔައީ، 6-4، 6-4، 2-6 އަދި 6-4 އިންނެވެ.
މި ނަތީޖާއާ އެކު، 2017 ވަނަ އަހަރަށް ފަހު، ފުރަތަމަ ފަހަރަށް ޖޮކޮވިޗް ޓެނިސް ސީޒަނެއް ނިންމާލާނީ، ގްރޭންޑް ސްލޭމް ހަތަރު މުބާރާތުގެ ތެެރެއިން އެއްވެސް މުބާރާތެއް ކާމިޔާބު ނުކުރެވި އެވެ. އަދި ޔޫއެސް އޯޕަންގެ ތިން ވަނަ ބުރުން، ޖޮކޮވިޗް ބަލިވެ، މުބާރާތުން ވަކިވާން ޖެހުނުއިރު، މިއީ، މިދިޔަ 18 އަހަރު ތެރޭގައި، ޔޫއެސް އޯޕަންގެ ފުރަތަމަ ބުރުތަކުން، ޖޮކޮވިޗް ކެޓި ފުރަތަަމަ ފަހަރެވެ.
އެންމެ ގިނަ ގްރޭންޑް ސްލޭމް ކާމިޔާބުކުރުމުގެ ރެކޯޑް އޮތް ޖޮކޮވިޗް، 25 ވަނަ ގްރޭންޑް ސްލޭމް ކާމިޔާބުކުރަން އިތުރު އިންތިޒާރެއް ކުރަން ޖެހުނީ އެވެ.
"މިއީ އަހަރެންގެ ކެރިއަރުގައި ވެސް އެންމެ ދަށްކޮށް ކުޅެވުނު މުބާރާތޭ ބުންޏަސް ދޮގަކަށް ނުވާނެ. ތެދަށް ބުނާނަމަ ކުޅެވުނު ފެންވަރަށް ބަލާއިރު، ތިން ވަނަ ބުރުގައި ވާދަކުރެވުމަކީ ވެސް ކާމިޔާބެއް،" ހަތަރު ފަހަރު ޔޫއެސް އޯޕަން ކާމިޔާބުކުރި ޖޮކޮވިޗް ބުންޏެވެ.
ޔޫއެސް އޯޕަން ޓެނިސް މުބާރާތުގެ ދެ ވަނަ ބުރުން ކަޓައި، ސްޕެއިނުގެ ކާލޯސް އަލްކަރާޒް، ޓެނިހުގެ ބޮޑު ރެކޯޑަކާ ހަމަކުރަން ކުރި އުންމީދު ފުރިހަމަ ނުވި އެވެ. މި ފަހަރުގެ ފްރެންޗް އޯޕަން، ވިމްބަލްޑަން ކާމިޔާބުކުރި އަލްކަރާޒް އަށް ޔޫއެސް އޯޕަން ކާމިޔާބުކޮށް ޓެނިހުގެ ލެޖެންޑުން ކަމަށްވާ ރޮޑް ލޭވާ، ރަފަައެލް ނަޑާލް ހަދާފައި އޮތް ރެކޯޑާ ހަމަކުރުމުގެ ފުރުސަތު އޮތެެވެ. އެކަމަކު، ޔޫއެސް އޯޕަންގެ ދެ ވަނަ ބުރުން، ނެދަލެންޑްސްގެ ބޮޓިކް ވެން ޑެ ޒަންޑްޝަލްޕް އަތުން އަލްކަރާޒް ވަނީ ބަަލިވެ، މުބާރާތުން ކަޓައިފަ އެވެ.
