ސުޕަ ޔުނައިޓެޑް ސްޕޯޓްސް (ސަސް) ދޫކޮށް، ހުނަރުވެރި މިޑްފިލްޑަރު އަހުމަދު އައިހަމް (ފަތޯ)، ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނާ ގުޅިއްޖެ އެވެ.
ކުރިއަށް އޮތް އޭއެފްސީ ޗެލެންޖާސް ކަޕަށް މާޒިޔާ އިން އަންނަނީ އެ ޓީމުގެ ސްކޮޑް ވަރުގަދަ ކުރުމަށް މަސައްކަތް ކުރަމުންނެވެ.
އެ ގޮތުން މިހާރު މާޒިޔާގައި ތިބި ކުޅުންތެރިންގެ ތެރެއިން އެ ޓީމުން ދޫކޮށްލާފައިވާ ފާހަގަކޮށްލެވޭ ކުޅުންތެރިންނަކީ، މިޑްފިލްޑަރު ހުސެއިން ނިހާން (ނިހާޓް) އާއި އަހުމަދު ނޫމާން (ހެލްމެޓް) އެވެ. މާޒިޔާ އިން ބުނީ ކުރިން ތިބި ކުޅުންތެރިން އެ ޓީމުގައި މަޑުކުރާނެ ކަމަށެވެ.
މީގެ އިތުރުން މާޒިޔާ އިން އިއްޔެ ވަނީ އެ ޓީމުގެ އައު ކޯޗެއްގެ ގޮތުގައި ސާބިއާގެ ޔުއެފާ ޕްރޯ ލައިސަންސް ކޯޗު ޑްރަގަން ޑުކަނޯވިޗް ހަމަޖައްސައިފަ އެވެ. މީގެ އިތުރުން މާޒިޔާ އިން ވަނީ މިއަދު ހއ. އުތީމުގެ އައިހަމް އާއެކު ކުރިއަށް އޮތް ތިން ސީޒަނަށް ސޮއިކޮށްފަ އެވެ.
މީގެ ދެ އަހަރު ކުރިން ސަސް އަށް ކުޅެން ފެށި އައިހަމް ވަނީ އެ ޓީމުގެ ފުރަތަމަ އެގާރައިގައި ހިމެނިގެން މިދިޔަ ސީޒަނުގައި މޮޅު ކުޅުމެއް ދައްކައިފަ އެވެ. ނަތީޖާ އެއްގެ ގޮތުން ގައުމީ ފުޓުބޯޅަ ޓީމުން ވެސް އައިހަމް ވަނީ ޖާގަ ހޯދައިފަ އެވެ.
އޭއެފްސީ ޗެލެންޖާސް ލީގުގައި މާޒިޔާ ހިމެނޭ ގްރޫޕްގެ މެޗުތައް ސެންޓްރަލައިޒްކޮށް ކުޅޭނީ ކުވެއިތުގަ އެވެ. މާޒިޔާގެ ގްރޫޕްގައި ހިމެނޭ ކުވެއިތުގެ އަލް އަރަބި އަކީ އެ ގައުމުގެ ޕްރިިމިއާ ލީގުގެ ރަނަރަޕް އެވެ. އަކްރަޑަގް އަކީ ތުރުކުމެނިސްތާންގެ ލީގާއި ކަޕް ޗެމްޕިއަންކަން އެންމެ ފަހުން ހޯދި ޓީމެވެ. އަދި ޕްލޭއޮފް ބުރުން އައި ކިރްގިސްތާންގެ އަބްދީޝް އާޓާ އަކީ އެ ގައުމުގެ އެންމެ ފަހުން ދެ ފަހަރު ވެސް ލީގު ޗެމްޕިއަން ހޯދި ޓީމެވެ.
