ލަންޑަން (އޮގަސްޓް 21) - ޕްރޮފެޝަނަލް ފުޓްބޯލް އެސޯސިއޭޝަން (ޕީއެފްއޭ) އިން ހޮވި މިދިޔަ ސީޒަނުގެ އެންމެ މޮޅު ކުޅުންތެރިޔާގެ މަގާމު މެންޗެސްޓާ ސިޓީގެ ފިލް ފޯޑެން ހޯދިއިރު، އެންމެ މޮޅު ޒުވާން ކުޅުންތެރިޔާގެ މަގާމު ޗެލްސީގެ ކޯލް ޕާމާ އަށް ލިބިއްޖެ އެވެ.
މިއީ، 2010 ވަަނަ އަހަރުގެ ފަހުން، އިނގިރޭސި ދެ ކުޅުންތެރިންނަށް މި ދެ އެވޯޑް ލިބުނު ފުރަތަމަ ފަހަރެވެ. މޮޅު ކުޅުންތެރިޔާގެ އެވޯޑް، އެ ފަހަރު ހޯދީ ޖޭމްސް މިލްނާ އެވެ. އަދި ޒުވާން ކުޅުންތެރިއާގެ އެވޯޑް، ވޭން ރޫނީ ހޯދި އެވެ.
ޕީއެފްއޭގެ ޒުވާން ކުޅުންތެރިޔާގެ މަގާމު ދެ ފަހަރު ހޯދި ފޯޑެން އަށް އެންމެ މޮޅު ކުޅުންތެރިޔާގެ މަގާމު ލިބުނުއިރު، މިދިޔަ ސީޒަނުގައި ލީގުގައި އޭނާ ވަނީ، 35 މެޗުން 19 ލަނޑު ޖަހައިފަ އެވެ. ފޯޑެން އަކީ، މިދިޔަ ސީޒަނުގައި ސިޓީން ޖެހިޖެހިގެން ހަތަރު ފަަހަރު ލީގު ހޯދިއިރު، މޮޅު ކުޅުމެއް ދެއްކި ކުޅުންތެރިޔާ އެވެ. މޮޅު ކުޅުންތެރިޔާގެ މަގާމަށް ފޯޑެންއާ ވާދަކުރީ ސިޓީގެ ރޮޑްރީ އާއި އާލިން ބްރައުޓް ހާލަންޑް އެވެ.
ފޯޑެން، 23، އަކީ އެ އުމުރުގައި، ހަ ލީގު ތަށި ހޯދި ފުރަތަމަ ކުޅުންތެރިޔާ އެެވެ.
ސިޓީ ދޫކޮށް، ފުރަތަމަ ސީޒަނުގައި، ޗެލްސީ އަށް މޮޅު ކުޅުމެއް ދެއްކި ޕާމާ ވަނީ ލީގުގައި ކުޅުނު 34 މެޗުން 22 ލަނޑު ޖަހައިފަ އެވެ. ޕާމާއާ މި އެވޯޑަށް ވާދަކުރީ، އާސެނަލްގެ ބުކާޔޯ ސަކާ އާއި މެންޗެސްޓާ ޔުނައިޓެޑްގެ ކޯބީ މައިނޫ އެވެ.
