ނޭޕާލުގައި މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕްގެ ފޭވަރިޓުންނަކީ އިންޑިއާ ކަމަށާއި މުބާރާތަށް ތައްޔާރުވާން ރާއްޖޭގެ ޓީމުގެ ކުޅުންތެރިން ކުރާ މަސައްކަތް ފާހަގަކުރާ ކަމަށް ޓީމުގެ ކޯޗު އަހުމަދު ޝާކިރު (ޝާކިއްޓެ) ބުނެފި އެވެ.
ސާފް ޗެމްޕިއަންޝިޕް އިއްޔެ ފެށިއިރު، މުބާރާތުގެ ހޯސްޓް، ނޭޕާލުން ވަނީ 1-0 އިން ސްރީ ލަންކާ ބަލިކޮށްފަ އެވެ.
ރާއްޖެ ހިމެނޭ ގްރޫޕްގެ ފުރަތަަމަ މެޗުގައި ބޫޓާނާއި އިންޑިއާ މިއަދު ބައްދަލުކުރާނެ އެވެ. ރާއްޖޭގެ ފުރަތަމަ މެޗު އޮތީ ބުދަ ދުވަހު ބޫޓާނާ ދެކޮޅަށެވެ. އަދި ދެ ވަނަ މެޗުގައި އޭގެ އެއް ދުވަސް ފަހުން، އިންޑިއާއާ ކުޅޭނެ އެވެ.
މުބާރާތުގެ ކުރިން ބޭއްވި ނޫސްވެރިންގެ ބައްދަލުވުމުގައި ޝާކިއްޓެ ބުނީ، ޖުމްލަކޮށް ބަލާއިރު، ތައްޔާރީތަކާ މެދު ހިތްހަމަޖެހޭ ކަމަށެވެ. އަދި ފަސް ވަރަކަށް ދުވަސް ކުރިން ނޭޕާލަށް ދިއުމަށް ފަހު، އެ މާހައުލަށް ހޭނުމުގެ މަސައްކަތް ކުރަމުން އަންނަ ކަމަށް ޝާކިއްޓެގެ ވާހަކައިގައި ފާހަގަކުރި އެވެ.
"އަހަރެމެންގެ ކުޅުންތެރިން އެކުރާ ހިތްވަރު ފާހަގަކުރަން. ކުރިއެެރުން ވެސް އެބަފެނޭ. މުބާރާތުގެ ފޭވަރިޓަކީ އިންޑިއާ، ދެން، ބޫޓާނުގައި ވެސް ރަނގަޅު ޒުވާން ކުޅުންތެރިންތަކެއް އެބަތިބި،" ކުރިން ވެސް ޒުވާން ގައުމީ ޓީމަށް ކޯޗުކޮށްދިން ޝާކިއްޓެ ބުންޏެވެ.
"އަހަރެމެންނަށް ވެސް އެބަހުރި އަމިއްލަ ޗެެލެންޖްތަކެއް. މަސައްކަތް މި ކުރަނީ އެ ޗެލެންޖްތަކުން އަރައިގަނެގެން ކަންކަން ރަނގަޅުކުރަން. ޕްލޭނަކީ ބޫޓާނާ ދެކޮޅަށް ކުޅޭ މެޗު، އެ މެޗުން ކުރިހޯދައި ކުރިއަށް ދިއުން،"
މުބާރާތަށް ފުރުމުގެ ކުރިން ރާއްޖޭގެ މީޑިއާ އަށް ދިން އިންޓަވިއުގައި ޝާކިއްޓެ ވަނީ، މި މުބާރާތުގެ ފައިނަލުގައި ކުޅުމަކީ ޓާގެޓެއް ކަމަށް ބުނެފަ އެވެ.
ސާފް 20 އަހަރުން ދަށުގެ މުބާރާތުގެ ގްރޫޕް ސްޓޭޖުގެ މެޗުތައް ކުޅޭ ދަނޑު އޯލް ނޭޕާލް ފުޓްބޯލް އެސޯސިއޭޝަން (އަންފާ) އިން ވަނީ ބަދަލުކޮށްފަ އެވެ. ހަ ގައުމުގެ މެދުގައި ކުރިއަށްދާ 20 އަަހަރުން ދަށުގެ ސާފް ޗެމްޕިއަންޝިޕް، މި މަހުގެ 28 ވަނަ ދުވަހުގެ ނިޔަލަށް ކުޅެން ހަމަޖެހިފައި އޮތީ، ހުރިހާ މެޗެއް، ދަސަރަތު ރަންގްސާލާ ސްޓޭޑިއަމްގައި ކުޅޭ ގޮތަށެވެ.
އެކަމަކު، ދަސަަރަތު ސްޓޭޑިއަމްގެ ޕިޗުގެ ހާލަތު ގޯސްވެފައި އޮތުމުން، އަންފާ އިން ވަނީ އަންފާ ކޮމްޕްލެކްސް ދަނޑަށް ގްރޫޕް ސްޓޭޖުގެ ހުރިހާ މެޗެއް ބަދަލުކޮށްފަ އެެވެ.
މިއީ، 19 ނޫނީ 20 އަހަރުން ދަށަށް ބޭއްވޭ ސާފްގެ ހަ ވަނަ މުބާރާތެވެ. ފުރަތަމަ ދެ މުބާރާތް ކާމިޔާބުކުރީ ނޭޕާލުންނެވެ. އެކަމަކު، ދެން ކުޅުނު ތިން މުބާރާތުގެ ތަށި އުފުލާލީ ވެސް އިންޑިއާ އިންނެވެ. މި ފަހަރުގެ މުބާރާތަށް ތައްޔާރުވުމަށް އިންޑިއާ އިން ވަނީ، ގޯއާގައި ދެ މަސް ދުވަހުގެ ކޭމްޕެއް ކުރިއަށްގެންގޮސްފަ އެވެ. އަދި މުބާރާތުގައި ކުޅޭ އިންޑިއާ ސްކޮޑުގައި، ޔޫރަޕްގެ ޔޫތު މުބާރާތްތަކުގައި ކުޅެފައިވާ ކުޅުންތެރިން ހިމެނެ އެވެ.
