ރާއްޖޭގެ ފުޓްބޯޅަ މި ވަގުތު އޮތް ހާލަތަށް ބަލާއިރު، 20 އަހަރުން ދަށުގެ ގައުމީ ފުޓްބޯޅަ ޓީމުން ކުރިއަށް އޮތް ސާފް 20 އަހަރުން ދަށުގެ މުބާރާތަށް ވެފައިވާ ތައްޔާރީތައް ރަނގަޅު ކަމަށް ޓީމުގެ ކޯޗު އަހުމަދު ޝާކިރު (ޝާކިއްޓެ) ބުނެފި އެވެ.
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ އެންމެ ފަހުން، އޮތް ހިންގާ ބޯޑުގެ މުއްދަތު ހަަމަވެ، ރާއްޖޭގެ ފުޓްބޯޅައިގެ ހާލަތު އިންތިހާ އަށް ގޯސްވެފައި އޮތުމުން، ދުނިޔޭގެ ފުޓްބޯޅައިގެ މައި ޖަމިއްޔާ، ފީފާ އިން ވަނީ އެފްއޭއެމްގެ ހިންގުން ނޯމަލައިޒިން ކޮމިޓީ އަކާ ހަވާލުކުރަން ނިންމައިފަ އެވެ.
އެ ފަދަ ހާލަތެއްގައި، ފުޓްބޯޅައިގެ ހިންގުމުގެ ކަންކަން އޮއްވައި، ބުރަ މަސައްކަތްތަކެއްކޮށް، ޝާކިއްޓެ އާއި 20 އަހަރުން ދަށުގެ ޓީމުގެ މެނޭޖްމަންޓުން ވަނީ ޓީމެއް އެކުލަވާލައި، މުބާރާތަށް ގޮސްފަ އެވެ.
ސާފް 20 އަހަރުން ދަށުގެ މުބާރާތް އޮތީ އޮގަސްޓް މަހު، 18-28 އަށް ނޭޕާލުގެ ކަތުމަންޑޫގަ އެވެ.
"ޓީމު މި ފަހަރު މި ދަނީ އެއް މަހާއި 15 ވަރަކަށް ދުވަހުގެ ޓްރެއިނިން އަށް ފަހު. ދެން ހަަމަ، މިހާރު ފުޓްބޯޅަ މި އޮތް ހާލަތަށް ބަލާފައި ޓީމު ރަނގަޅަށް ތައްޔާރުވެފައި އޮތް ކަމަށް އަޅުގަނޑު ގަބޫލުކުރަނީ،" ނޭޕާލަށް ފުރުމުގެ ކުރިން، ބަސް ޓާމިނަލްގައި ހުރެ، "އަދަދު ސްޕޯޓްސް" އަށް ދިން އިންޓަވިއުއެއްގައި ޝާކިއްޓެ ބުންޏެވެ.
ނޭޕާލަށް ފުރި، 20 އަހަރުން ދަށުގެ ގައުމީ ޓީމުގެ ކުޅުންތެރިންނާއި އޮފިޝަލުން.--- ފޮޓޯ: އަދަދު
"ހަމަ ކުޅެލަން މުބާރާތަށް ދިއުމުގެ ވިސްނުމެއް ނޫން އޮތީ، ޓާގެޓެއް އެބައޮތް، ފައިނަލް ކުޅުން އެއީ،"
މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި، މި މަހު 21 ގައި ބޫޓާނާ ދެކޮޅަށް ކުޅުމަށް ފަހު، އޭގެ އެއް ދުވަސް ފަހުން އިންޑިއާއާ ބައްދަލުކުރާނެ އެވެ.
"ނޭޕާލް މި ދުވަސްކޮޅު ތަންކޮޅެއް ފިނިކޮށް އޮތީ، އަޅުގަނޑުމެންނަށް މި ދެވެނީ، މެޗުގެ ހަތަރު ވަރަކަށް ނޫނީ ފަސް ވަރަކަށް ދުވަސް ކުރިން، ދެން ހަަމަ، އެ އެންވާރްމަންޓަށް (މޫސުމަށް) ހޭނެން ދުވަސް ކޮޅެއް ލިބޭ އެބަ. ގަބޫލުކުރާ ގޮތުގައި އެއީ ޕޮޒިޓިވް ކަމެއްގެ ގޮތުގައި ދެކެނީ،" ޝާކިއްޓެ ބުންޏެވެ.
ޒުވާން ގައުމީ ޓީމުގެ ސްކޮޑަށް ބަލާއިރު، މީގެ ކުރިން ސާފް އާއި އޭއެފްސީ މުބާރާތްތަކުގައި ކުޅެފައިވާ ކުޅުންތެރިން އެބަތިބި އެވެ. މީގެ އިތުރުން، ރާއްޖޭގެ ފުރަތަމަ ޑިވިޝަނުގައި ކުޅެފައިވާ ކުޅުންތެރިން ވެސް ހިމެނެ އެވެ. މީގެ ތެރެެއިން ބައެއް ކުޅުންތެރިންނަކީ ޝާކިއްޓެގެ އިރުޝާދުގެ ދަށުން، ޔުނައިޓެޑް ވިކްޓަރީ (ޔޫވީ) ގައި ވެސް ކުޅެފައިވާ ކުޅުންތެރިންނެވެ.
"މީގެ ތެރޭގައި، ފުރަތަމަ ޑިވިޝަން ކުޅެފައި ތިބި އެކްސްޕީރިއަންސް ހުރި ކުދިންނާ، އެއާ އެކު ހަމަ، މި އަހަރު ޓީމާ ގުޅުނު ކުޅުންތެރިން އެއްކޮށްލައިގެން އަޅުގަނޑުމެން ޓީމެއް ނަގައިގެން މި ދަނީ. މިދިޔަ އަހަރު ފުރަތަމަ ޑިވިޝަންގައި ކުޅެފައި، އަޅުގަނޑުމެންނާ އެކު ބޭރަށް ގޮސްފައި ތިބި ކުޅުންތެރިންގެ، އެ ތަޖުރިބާގެ ބޭނުން އަލަށް މި ޖޮއިން ކުރި ކުޅުންތެރިންނަށް ކުރެވޭނެ ކަމަށް މި ގަބޫލުކުރަނީ،" ޝާކިއްޓެ ބުންޏެވެ.
ޝާކިއްޓެ، ޓީމު ތައްޔާރުކުރުމުގެ މަސައްކަތްކޮށްފައިވަނީ، އޭޝިއަން ކަޕް ކޮލިފައިންއާ ވެސް އެކުގަ އެވެ.
އަންނަ އަހަރު ބާއްވާ 20 އަހަރުން ދަށުގެ އޭޝިއަން ކަޕްގެ ކޮލިފައިން ބުރު މި އަހަރު ކުރިއަށްދާއިރު، ކޮލިފައިން މެޗުތައް ކުޅެން ޖެހެނީ ސެޕްޓެމްބަރު 21-29 އަށް އިންޑޮނޭޝިއާގެ ޖަކާޓާގަ އެވެ. އެ ގޮތުން ރާއްޖެ ހިމެނިފައިވަނީ، ގްރޫޕް އެފްގަ އެވެ. އެ ގްރޫޕްގައި ދެން ހިމެނެނީ، އިންޑޮނޭޝިއާ، ޓިމޯ ލެސްޓޭ އަދި ޔަމަން އެވެ.
