ރައްޔިތުންގެ މަޖިލީހުގެ މިއަދުގެ ޖަލްސާ އަށް ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) ހާޒިރުވެވަޑައިގެން، މަޖިލީސް މެމްބަރުންގެ ސުވާލުތަކަށް ޖަވާބުދެއްވިއިރު، އެއްވެސް މެމްބަރަކު، މި ވަގުތު ރާއްޖޭގެ ކުޅިވަރުގެ ހާލަތު ހުރި ގޮތާއި މައިގަނޑު މައްސަލަތަކާ ގުޅޭ ސުވާލެއް ކުރައްވާފައިނުވެ އެވެ.
މިއަދުގެ ކުރިން، އެންމެ ފަހުން، ސްޕޯޓްސް މިނިސްޓަރު، ރާފިއު، އެންމެ ފަހުން، މަޖީލީހަށް ހާޒިރުވެ، މެމްބަރުންގެ ސުވާލުތަކަށް ޖަވާބު ދެއްވީ މިދިޔަ މަަހު 17 ވަނަ ދުވަހު އެވެ.
އެ ދުވަހު، މިނިސްޓަރު ވަނީ، ކުޅިވަރު ގާނޫނަށް ގެންނަ އިސްލާހުތަކާ ގުޅޭ ޑްރާފްޓް، ދެ ދުވަހެއްގެ ތެރޭގައި އެޓާނީ ޖެނެރަލް އޮފީހަށް ހުށަހަޅާނެ ކަމަށް ވިދާޅުވެފަ އެެވެ. މިހާރު، ސްޕޯޓްސް މިނިސްޓްރީން އޮތީ، އެ ޑްރާފްޓް އެޓާނީ ޖެނެރަލް އޮފީހަށް ފޮނުވައިފަ އެވެ.
މިނިސްޓަރު ރާފިއު، މިއަދު މަޖިލީހަށް ހާޒިރުވެވަޑައިގެންނެވީ، ކެންދޫ ދާއިރާގެ މެމްބަރު، މައުރޫފް ޒާކިރު ކުރައްވާ ސުވާލަށް ޖަވާބު ދެއްވުމަށެވެ. އެއީ، މިދިޔަ ސަރުކާރުން ލައިޓް ޖަހަން ނިންމާފައިވާ، ބ. ކެންދޫ ފުޓްބޯޅަ ދަނޑުގެ ލައިޓް ޖެހުމުގެ އިތުރުން، އެ ރަށުގެ ފުޓްސަލް ދަނޑާއި ހޭންޑްބޯލް ކޯޓު އެޅޭނެ އިރެއް ސާފުކުރުމަށެވެ.
އެ ސުވާލަށް މިނިސްޓަރު، ރާފިއު ޖަވާބު ދެއްވުމުން، މަޖިލީހުގެ ރައީސް އަބްދުއްރަހީމް އަބްދުﷲ ވަނީ، މެމްބަރުން އިތުރު ސުވާލުކުރެއްވުމަށް 30 މިނިޓްގެ ވަގުތެއް ދެއްވައިފަ އެވެ.
މިއާ އެކު، މިއަދު މަޖިލީހުގައި ސްޕޯޓްސް މިނިސްޓަރު، ރާފިއު، ސާޅީހަކަށް މިނިޓް ހޭދަކުރިއިރު، އެއްވެސް މެމްބަރެއްގެ ސުވާލެއް ކުޅިވަރުގެ މައިގަނޑު މައްސަލަތަކާ އަމާޒުކޮށްފައިނުވެ އެވެ.
އެ ގޮތުން ބަލާއިރު، ކުޅިވަރު ގާނޫނުގެ އިސްލާހާ ގުޅޭ ސުވާލުތަކަކީ މި ވަގުތު ގިނަ ބަަޔަކު ޖަވާބު ބޭނުންވާ ކަންތައްތަކެއް ހުރި ކަމެކެވެ.
އެ ގޮތުން، ކުޅިވަރު ގާނޫނުގެ އިސްލާހުގެ ތެރެއިން، ސްޕޯޓްސް ކޯޕަރޭޝަން އުވާލަން ނިންމާއިރު، އެ ތަނުގެ މުވައްޒަފުންނާ މެދު އަމަލުކުރެވޭނެ ގޮތަކާ ގުޅޭ ސުވާލުތައް އަމާޒުވާއިރު، ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ހިންގާ ކޮމިޓީގެ މުއްދަތު ހަމަވެފައި އޮންނަތާ ފަސް މަސް ވެފައިވާއިރު، މައްސަލަ އަށް ހައްލެއް ލިބިފައިނުވުމަކީ ވެސް އެ ކުޅިވަރު ކޮމިއުނިޓީގެ ކަންބޮޑުވުމެކެވެ.
ރާއްޖޭގެ އެއް ވަނަ ކުޅިވަރު، ފުޓްބޯޅައިގެ ބެލެނިވެރިފަރާތް، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ހިންގުން ނޯމަލައިޒް ކުރަން ދުނިޔޭގެ މައި ފުޓްބޯޅަ އިދާރާ ފީފާ އިން ނިންމާފައިވެ އެވެ.
ރާއްޖޭގެ ސަރުކާރުގެ ވެސް ލަފާ ހޯދައިގެން އެކުލަވާލާ، އެފްއޭއެމްގެ ނޯމަލައިޒިން ކޮމިޓީ ނަގާ ގޮތާ މެދު ގިނަ ބަޔެއް މައުލޫމާތު އެގެން ބޭނުންވާ ގިނަ ކަންތައްތަކެއް ހުރި ނަމަވެސް، ސްޕޯޓްސް މިނިސްޓަރާ އޭގެއިން ވެސް އެއްވެސް ސުވާލެއް، މިއަދުގެ ޖަލްސާގައި މެމްބަރަކު އަމާޒެއް ނުކުރެ އެވެ.
މިއަދު މެމްބަރުންގެ ސުވާލުތައް އަމާޒުވެފައި ހުރީ ހަމައެކަނި، އެ މެމްބަރަކު ތަމްސީލްކުރާ ދާއިރާތަކުގެ ރަށްތަކުގައި އަޅާ ފުޓްސަލް ދަނޑާއި ޓާފް ދަނޑާއި ޒުވާނުންގެ މަރުކަޒާއި އެ ފަދަ ކަންކަމަށެވެ. ރާއްޖޭގެ ކުޅިވަރުގެ މިހާރުގެ ހާލަތާ ގުޅޭ މައިގަނޑު މައްސަލަތަކާ ގުޅޭ ކަންކަމާ މެދު ވިސްނާ ފިކުރުކުރާ މަންޒަރެއް ނުފެނުނެވެ.
