އަންނަ ހޮނިހިރު ދުވަހު، ކ. ތުލުސްދޫގައި ފަށާ އޭޝިއަން ސާފިން ޗެމްޕިއަންޝިޕުގައި ވާދަކުރާ ރާއްޖޭގެ ގައުމީ ޓީމުގެ ސާފަރުން މިއަދު އިއުލާނުކުރިއިރު، ޓީމުގެ އެތުލީޓުންނަށް ކުޅިވަރާ ބެހޭ ވަޒީރު، އަބްދުﷲ ރާފިއު (ރާއްޕެ) ޖާޒީ ހަވާލުކޮށްދެއްވައިފި އެވެ.
މިއަދު ހެނދުނު ޒުވާނުންގެ މަރުކަޒު ހަރުގޭގައި ކުރިއަށްދިޔަ ހާއްސަ ރަސްމިއްޔާތެއްގައި މި ފަހަރުގެ މުބާރާތުގައި ވާދަކުރާ ގައުމީ ސާފިން ޓީމުން ބޭނުންކުރާ ޖާޒީ އާއި ސާފިން ޓީމުގެ މާޗަންޑައިސް ވަނީ ދައްކާލައިފަ އެވެ.
މި ރަސްމިއްޔާތުގައި ކުޅިވަރާ ބެހޭ ވަޒީރު އަބްދުالله ރާފިއުގެ އިތުރުން ސާފިން އެސޯސިއޭޝަނުގެ އިސްވެރިން ވަނީ ބައިވެރިވެފަ އެވެ.
ގައުމީ ސާފިން ޓީމާ މުހާތަބުކޮށް، ސްޕޯޓްސް މިނިސްޓަރު ރާފިއު ވިދާޅުވީ، މި ފަހަރުގެ އޭޝިއަން ސާފިން ޗެމްޕިއަންޝިޕަކީ ވަރަށް ހާއްސަ މުބާރާތެއް ކަމަށެވެ. މި މުބާރާތް ތާރީހީ ވާ އެންމެ ބޮޑު ސަބަބަކީ، މިއީ ރާއްޖޭގައި ހޯސްޓްކުރާ އޭޝިއަން ގޭމްސްގެ ފުރަތަމަ ކޮލިފައިން އިވެންޓް ކަމަށް ވުން ކަމަށް މިނިސްޓަރު ފާހަގަކުރެއްވި އެވެ.
އެ ގޮތުން، 20 ގައުމުން 100 އަށް ވުރެ ގިނަ އެތުލީޓުންނާ ވާދަކޮށް، ދިވެހި އެތުލީޓުންނަށް ޖަޕާނުގައި، 2026 ވަނަ އަހަރު ބާއްވާ އޭޝިއަން ގޭމްސް އިން ފުރުސަތު ލިބުމަށް އެދޭ ކަމަށް މިނިސްޓަރު ރާފިއު ވިދާޅުވި އެވެ.
"މިދިޔަ އަހަރުގެ މުބާރާތުން ހޯދި ސިލްވާ މެޑަލާއި ދެ ބްރޯންޒް މެޑަލަށް ވުރެ ބޮޑު ކާމިޔާބީ އަކަށް އަޅުގަނޑުމެން މި ފަހަރު އަމާޒުކަނޑައަޅަންވީ، ލިބިފައި މި އޮތް ތާރީހީ ފުރުސަތުގެ ބޭނުންހިފުމަށް،" ރާފިއު ވިދާޅުވި އެވެ.
އޭޝިއަން ސާފިން ޗެމްޕިއަންޝިޕްގައި މި ފަހަރު ވާދަކުރާ ގައުމީ ސާފިން ޓީމުގެ ގިނަ އެތުލީޓުންނާއި އޮފިޝަލުން ފޮޓޯ އަކަށް ހުއްޓިލައިގެން.--- ފޮޓޯ: މިރާޝް ނާޝިމް / އަދަދު ސްޕޯޓްސް
މި އިވެންޓްގައި ވާހަަކަ ދައްކަވަމުން، މޯލްޑިވްސް ސާފިން އެސޯސިއޭޝަންގެ ރައީސް، މުހައްމަދު ސޮބާހު (ޗޭ) ވިދާޅުވީ، މި ފަހަރު ރާއްޖޭން މުބާރާތުގައި ވާދަކުރަނީ، ރާއްޖޭގެ އެންމެ ކާމިޔާބު ސާފަރު، ހުސެއިން އަރީފް (އިބޫ) ކޯޗިން ޓީމުގައި ހިމަނައިގެން، އޭނާގެ އިރުޝާދުގެ ދަށުން ކަމަށެވެ.
އޭނާ ވަނީ، މި މުބާރާތުގެ ކަންކަމުގައި ސްޕޮންސަރުން ދެމުން އަންނަ އެއްބާރުލުމަށް ވަރަށް ބޮޑަށް ޝުކުރުއަދާކޮށްފަ އެވެ.
އޭޝިއަން ސާފިން ޗެމްޕިއަންޝިޕުގައި ވާދަކުރާ ރާއްޖޭގެ ގައުމީ ސާފިން ޓީމު:
- އަހުމަދު އާގިލް (ކެޕްޓަން)
- ހޫދު އަހުމަދު
- އިސްމާއިލް މިގްލާލް
ސީނިއާ ޓީމް ބީ:
- ހަސަން ނާސިހް
- އިސްމާއިލް ރަޝީދު (ސްމައިލީ)
- އަހުމަދު ހިޝާމް ޝަހީމް
އަންހެން ގައުމީ ޓީމު:
- އާޔާ ނަސީމް
- ޝާޒިޔާ ސައީދު
ޖޫނިއާ ގައުމީ ޓީމު:
- ސައްޔިދު ސަލާހުއްދީން (ކެޕްޓަން)
- ޔަސިން އަހުމަދު ނާޝިދު
- ޔޫސުފް ކަޔާން ހަމްދާން ޒަކީ
ޖޫނިއާ ޓީމް ބީ:
- ކަޔާން އަބްދުالله އަރީފް
- އަހުމަދު ޒަޔާން
- މުހައްމަދު އިނާން އަބްދުލް ހަންނާން
ރާއްޖޭގެ ކުޅިވަރު ތާރީހުގައި ވެސް ޖެހިޖެހިގެން ދެ ވަނަ ފަހަރަށް އެއް ރަށެއްގައި އޭޝިއާ ލެވަލްގެ މުބާރާތެއް ހޯސްޓްކުރުމުގެ ފުރުސަތު ލިބިގެން ގޮސްފައި މި ވަނީ، ތުލުސްދޫ އަށެވެ. ތުލުސްދޫ އިން ފުރަތަމަ ފަހަރަށް މިދިޔަ އަހަރު، އޭޝިއަން ސާފިން ޗެމްޕިއަންޝިޕް ހޯސްޓްކުރިއިިރު، ކަންކަން ރަނގަޅަށް ހަމަޖެހިފައި ހުރުުމުގެ ނަތީޖާ އަކީ، މި ފަހަރު ވެސް މުބާރާތް ހޯސްޓް ކުރުމުގެ ފުރުސަތު ލިބުމެވެ.
