ކްރިކެޓް ކުރިއަރުވައި ބައިނަލްއަގްވާމީ ފެންވަރުގައި ރާއްޖެ އަށް ކާމިޔާބު ހޯދޭނެ މަގު ކޮށަން، ފެންވަރު ރަނގަޅު ކްރިކެޓް ސްޓޭޑިއަމް އެއް އެކުވެނީގައި ތަރައްގީ ކުރަން ނިންމާފައިވާ ކަމަށް ކުޅިވަރާ ބެހޭ ވަޒީރު އަބްދުالله ރާފިއު (ރާއްޕެ) ވިދާޅުވެއްޖެ އެވެ.
އިއްޔެ ނިމުނު ޓީ20 ޕްރެޒިޑެންޓްސް ކަޕްގެ އިނާމު ދިނުމުގެ ރަސްމިއްޔާތުގައި ވާހަކަ ދައްކަވަމުން ރާފިއު ވިދާޅުވީ, މި ރީޖަން އަކީ ދުނިޔޭގެ ފެންވަރުގެ ކުރިކެޓް ކުޅުންތެރިން އުފެދިފައިވާ ސަރަހައްދެއް އެއް ކަމަށެވެ. އެހެންވެ، ރާއްޖޭގައި ވެސް ރަނގަޅު ވަސީލަތްތަކާ އެކު، އެ ފެންވަރުގެ ކުޅުންތެރިން ނޫފެދޭންވީ ސަބަބެއް ނެތް ކަމަށް ރާފިއު ވިދާޅުވި އެވެ.
ރާފިއު ވިދާޅުވީ، އަންނަ އަހަރު ކްރިކެޓް ކުޅުންތެރިންނަށް ހާއްސަކޮށް ފެންވަރު ރަނގަޅު ކްރިކެޓް ސްޓޭޑިއަމް އެއް އެކުވެނީގައި އަޅަން ސަރުކާރުން ނިންމާފައިވާ ކަމަށެވެ.
"މިހާރު އޮތް އެންމެ ދަތިކަމަކީ ކްރިކެޓް ކުޅޭނެ ވަކިން ހާއްސަ ތަނެއް މާލެ ސަރަހައްދުގައި ނެތުން. އަޅުގަނޑުމެން ގަބޫލު މިކުރަނީ ވީހާވެސް ގިނައިން ޕްރެކްޓިސް ކުރުން. އެހެން ކަމުން ސަރުކާރުގެ ވިސްނުމަކީ, މި ގްރައުންޑް (އެކުވެނި) ކްރިކެޓް ގްރައުންޑް އެއްގެ ގޮތައް އެ ސައިޒަށް ފައްތައިގެން, ކްރިކެޓް ކުޅޭނެ ގޮތައް އިންތިޒާމުކޮށްގެން, ކުޅެވޭނެ އިންތިޒާމު މި ތަނުގައި ސްޓޭޑިއަމް އެއް އަޅައިގެން ކުރިއަށް ގެންދެވުމަށް" ރާފިއު ވިދާޅުވި އެވެ.
ކްރިކެޓް ކުރިއެރުވުމަށް ކައިރި ގައުމުތަކާއެކު ވެސް ގިނަ މަޝްވަރާތަކެއް ކުރެވެމުން އަންނަ ކަމަށާއި، އެގޮތުން ލަންކާއިން ވެސް މިހާރު ރާއްޖޭގައި ކްރިކެޓް ކުރިއެރުވުމަށް އެއްބާރުލުން ދޭނެ ކަމުގެ ފެހި ސިގްނަލް ދީފައިވާ ކަމަށް ރާފިއު ވިދާޅުވި އެވެ.
މިދިޔަ ސަރުކާރުގައި، އިންޑިއާ އިން ރާއްޖެ އަށް ދޫކުރަން އެއްބަސްވެފައިވާ 800 މިލިއަން ޑޮލަރު (12 ބިލިއަން ރުފިޔާ)ގެ ކްރެޑިޓްލައިނުގެ ދަށުން ހުޅުމާލޭގައި ކްރެޑިޓް ސްޓޭޑިއަމެއް އަޅަން ވާހަކަ ދެކެވުނެވެ. އެކަމަކު، ފަހުން އެކި ކަހަލަ ކަންތައްތަކެއް މަޝްވަރާތަކުގެ ތެރޭގައި ދިމާވެގެން، އެ ކްރިކެޓް ދަނޑުގެ އަމަލީ މަސައްކަތް ފެށޭގޮތެއްނުވި އެވެ. އަދި މި ސަރުކާރުން ހުޅުމާލޭގައި އަޅާ ފުޓްސަލް ކޮމްޕްލެކްސް އަޅަން ހަމަޖެހިފައިވަނީ، ކްރިކެޓް ސްޓޭޑިއަމަށް ކުރިން ހަމަޖެއްސި ބިމުގައި ކަމަށް މައުލޫމާތު ލިބިފައިވެ އެވެ.
