ރިސޯޓު ޗެމްޕިއަންސް ލީގުގެ ފައިނަލުގައި ރީތި ރަށް ބަލިކޮށް ބަނޑޮހުން ޗެމްޕިއަންކަން ދިފާއު ކޮށްފި އެވެ.
މިއީ، ބަނޑޮހުން ރިސޯޓް ޗެމްޕިއަންސް ލީގުގެ ތަށި ޖެހިޖެހިގެން ހޯދި ފަސް ވަނަ ފަހަރެވެ.
އިންޓަ ރިސޯޓު ވޮލީބޯޅަ މުބާރާތުގެ މާލެ ޒޯންގެ ޗެމްޕިއަންކަން ރީތި ރަށުން ހޯދީ ބަނޑޮސް ބަލިކޮށެވެ. އެކަމަކު، ރިސޯޓު ޗެމްޕިއަންސް ލީގުގެ ފައިނަލުގައި ބަނޑޮހުން ވަނީ 3-2 ސެޓުން މެޗު ކާމިޔާބު ކޮށް ބަދަލު ހިފައިފަ އެވެ.
މި މުބާރާތުގެ ފައިނަލް މެޗުގެ ފުރަތަމަ ސެޓުގައި ބަނޑޮހުގެ ފަރާތުން އާދައިގެ ކުޅުމެއް ފެނިގެންދިޔައިރު, މި ސެޓު ރީތި ރަށުން ވަނީ 25-19 އިން ކާމިޔާބު ކޮށްފަ އެވެ. އެކަމަކު، ފުރަތަމަ ސެޓާ ހިލާފަށް ދެ ވަނަ ސެޓުގައި ރީތި ރަށުގެ ފަރާތުން ފެނިގެންދިޔަ އާދައިގެ ކުޅުމާއެކު ދެ ވަނަ ސެޓު ބަނޑޮހުން ވަނީ ފަސޭހަކަމާ އެކު 25-13 އިން ކާމިޔާބު ކޮށްފަ އެވެ.
މެޗުގައި ފެނިގެންދިޔަ އެންމެ ވާދަވެރި ކުޅުން ފެނިގެންދިޔައީ ތިން ވަނަ ސެޓުގަ އެވެ. މި ސެޓުގައި ދެ ޓީމަށް ވެސް ބޮޑު ލީޑަކާ އެކު ކުޅެވޭ ގޮތް ނުވިއިރު، މި ސެޓު ބަނޑޮހުން ކާމިޔާބުކުރީ 26-24 އިންނެވެ. އެކަމަކު، ހަތަރު ވަނަ ސެޓުގައި ބަނޑޮހުން އާދައިގެކޮށް ފެނުނުއިރު، މި ސެޓު ރީތި ރަށުން ކާމިޔާބުކުރީ 25-21 އިންނެވެ.
މެޗުގެ ފަހު ސެޓުގައި ރީތި ރަށުގެ ކުޅުން ދަށްވިއިރު, މި ސެޓު ބަނޑޮހުން ކާމިޔާބުކުރީ 15-8 އިންނެވެ.
މި މުބާރާތުގެ އެންމެ މޮޅު ކުޅުންތެރިޔަކަށް ބަނޑޮހުގެ އިސްމާއިލް ސާޖިދު (ކުޑަ ކާއްޓޭ) ހޮވުނުއިރު، އެންމެ މޮޅު ކޯޗަކީ، ބަނޑޮހުގެ ކޯޗު ހުސެން ޝަރީފް (ނަލަ ހުސެން) އެވެ.
މުބާރާތުގެ ޑްރީމް ޓީމަށް ބަލާއިރު، ހިމެނެނީ ރީތިރަށުގެ އަލީ ހުޒާމް (ހުޒަންޓެ)، އާދަމް ނަސީމް (އެޑަމް)، ހަސަން އިބްރާހިމް، އަހުމަދު ނަބީލްގެ އިތުރުން، ބަނޑޮހުގެ އިބްރާހިމް ފަޒީލް، މާރިފް އަލީ ނަސީރު އަދި މުހައްމަދު ރިމާޒް އެވެ. އެންމެ އުންމީދީ ކުޅުންތެރިއަކީ، ޔައިޝް މުހައްމަދު ޝިހާމް އެވެ.
