ފައިނަލުގައި އަނަންތަރާ ކިހާވަށް މޯލްޑިވްސް ބަލިކޮށް، އިންޓަ ރިސޯޓް ވޮލީބޯލް ޗެމްޕިއަންސް ލީގުގެ ޗެމްޕިއަންކަން ޖެހިޖެހެން ހަތަރު ވަނަ ފަހަރަށް ބަނޑޮސް މޯލްޑިވްސް އިން ހޯދައިފި އެވެ.
ބަނޑޮސް ވޮލީ ކޯޓުގައި މިއަދު ހަވީރު ކުޅުނު ރިސޯޓް ވޮލީބޯޅަ ޗެމްޕިއަންސް ލީގުގެ ފައިނަލް ބަނޑޮހުން ކާމިޔާބުކުރީ އަނަންތަރާ ކިހާވަށް މޯލްޑިވްސް ސީދާ ތިން ސެޓުންނެވެ. ފައިނަލް މެެޗުގެ ސެޓުތައް އެ ޓީމުން ގެންދިޔައީ 25-20، 25-20 އަދި 25-21 އިންނެވެ.
މެޗުގެ ފުރަތަމަ ސެޓު ފަށައިގެން މެދުތެރެއާ ހަމައަށް ދިޔައީ ވާދަވެރިކޮށެވެ. ނަމަވެސް ބަނޑޮހުގެ ކެޕްޓަން އަދި ތަޖުރިބާކާރު ސެޓަރު އިޝާން މުހައްމަދު (ބަޓިސް) އާއި ބިދޭސީ ކުޅުންތެރިޔާ ކަވިޝްކަގެ މޮޅު ކުޅުމާ އެކު އެޓިމުން މި ސެޓު ކާމިޔާބުކުރި އެވެ.
ދެ ވަނަ ސެޓުގައި ކަވިޝްކަ އެކޭ އެއްގޮތަށް ބަނޑޮހުގެ ހުސައިން ރަޒާން ވެސް ބާރު ހަމަލާތަކެއް ފޮނުވާލި އެވެ. އަނަންތަރާ ޓީމުން ދެ ވަނަ ސެޓާ ތިން ވަނަ ސެޓުގައި އަހުމަދު ފާޒިލް ރަނގަޅު ހަމަލާތަކެއް ފޮނުވާލި އެވެ. ނަމަވެސް މި ދެ ސެޓުގައި ވެސް ފަހުކޮޅު ތަފާތު ދައްކައި ބަނޑޮހުން ޗެމްޕިއަންކަން ހޯދި އެވެ.
އިންޓަ ރިސޯޓް ވޮލީބޯޅަ ޗެމްޕިއަންސް ލީގުގެ ފައިނަލުގައި ބަނޑޮސް މޯލްޑިވްސް އާއި އަނަންތާރާ ވާދަކުރި ފައިނަލް މެޗުގެ ތެރެއިން - ފޮޓޯ: އިސްމާއިލް ތޯރިގް
ބަނޑޮސް މޯލްޑިވްސް އަކީ މިދިޔަ ހަތަރު އަހަރު ރިސޯޓް ވޮލީބޯޅަ މުބާރާތުގެ ޒޯން އެކެއްގެ ޗެމްޕިއަން ޓީމެވެ.
ތަޖުރިބާކާރު ކޯޗު މުހައްމަދު ސާޖިދު (ކާއްޓޭ)ގެ ކޯޗުކަމުގެ ދަށުން އިންޓަ ރިސޯޓް ވޮލީގެ މިދިޔަ ހަތަރު މުބާރާތުގައި ބަނޑޮހުން ވަނީ އަށް ތަށި ހޯދައިފަ އެވެ.
ފައިނަލް މެޗުގެ މޮޅު ކުޅުންތެރިޔަކީ ބަނޑޮހުގެ ސްރީ ލަންކާ ކުޅުންތެރިޔާ ކަވިޝްކަ މަދުޝަންކާ އެވެ.
ޗެމްޕިއަންސް ލީގުގެ ފައިނަލުން ބަނޑޮސް ޖާގަ ހޯދީ ހަތަރު ޓީމް ވާދަކުރި ލީގު ބުރުގެ އެއް ވަނަ ހޯދައިގެންނެވެ. އެ ޓީމު ބަލިވީ ވަން އެންޑް އޮންލީ ރީތިރަށް އަތުންނެވެ. ނަމަވެސް ލީގު ބުރުގައި ވައްކަރު މޯލްޑިވްސް އާއި އަނަންތަރާ ބަލިކުރި އެވެ.
ލީގު ބުރުގެ ތިން ވަނަ ޓީމުގެ ގޮތުގައި ސެމީ އިން ޖާގަ ހޯދި ނަމަވެސް އެ ޓީމުން ވަނީ ސެމީ ފައިނަލުގައި ވައްކަރު މޯލްޑިވްސް 3-1 ސެޓުން ބަލިކޮށްފަ އެވެ. މިއީ ޒޯން ބުރާއި ޗެމްޕިއަންސް ލީގުގެ ބުރުގައި ވައްކަރާ ދެކޮޅަށް އަނަންތަރާ ކުޅުނު ހަތަރު މެޗުގެ ތެރެއިން އެ ޓީމު މޮޅުވި ހަމައެކަނި މެޗު ވެސް މެ އެވެ.
