ޖަރުމަނުގައި މިހާރު ކުރިއަށްދާ ޔޫރޯ 2024 ގެ ފުރަތަމަ ދެ ހަފުތާގެ ކުޅުން ނިމުނުއިރު, މި ދެ ހަފުތާ ފާހަގަވެގެން އައީ ގިނަ ރެކޯޑްތަކެއް ފެނިގެންދިޔަ ދެ ހަފުތާގެ ގޮތުގަ އެވެ. މި ފަހަރުގެ މުބާރާތް ފެށުމުގެ ކުރިންވެސް ބެލެވިފައި އޮތީ މިއީ ޔޫރޯގެ ތާރީހު ބަދަލުކޮށްލާނެ މުބާރާތެއްގެ ގޮތުގަ އެވެ.
މި ފަހަރުގެ ޔޫރޯގައި އެންމެ ފުރަތަމަ މުގުރާލި ރެކޯޑަކީ ޔޫރޯގެ ތާރީހުގައި ފެނިގެންދިޔަ އެންމެ އަވަސް ގޯލެވެ. ވަރުގަދަ އިޓަލީގެ ޑިފެންސް އަށް ހައިރާން ކަމެއް ދިނުމަށްފަހު 23 ސިކުންތުގެ ތެރޭގައި މި ގޯލު ކާމިޔާބު ކުރީ އަލްބޭނިއާގެ ނަދެމް ބައިރާމީ, 25 އެވެ. މީގެ ކުރިން މި ރެކޯޑް އޮތީ, ރަޝިޔާގެ ޑިމީޓްރީ ކިރީޗެންކޯ އަތުގަ އެވެ. އޭނާ މި ރެކޯޑް ހެދީ އެއް މިނެޓު ހަތް ސިކުންތުން ގޯލު ޖަހައިގެންނެވެ.
މި ފަހަރުގެ ޔޫރޯގައި މިހާތަނަށް އެންމެ ގިނަ ރެކޯޑުތަކެއް ފެނިގެންދިޔައީ ޕޯޗުގަލްގެ ކުޅުންތެރިންގެ ފަރާތުންނެވެ. އެގޮތުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ މިހާތަނަށް ދެ ރެކޯޑެއް ހަދާފައިވާއިރު, ޑިފެންޑަރު ޕެޕޭ ވެސް ވަނީ ރެކޯޑެއް ހަދާފަ އެވެ.
ރޮނާލްޑޯގެ ރެކޯޑުތަކަށް ބަލާއިރު, މި ފަހަރުގެ މުބާރާތާ އެކު, އޭނާ ވެގެންދިޔައީ ހަ ޔޫރޯ އެއްގައި ކުޅުނު ފުރަތަމަ ކުޅުންތެރިޔާ އަށެވެ. އުމުރުން 39, އަހަރުގެ ރޮނާލްޑޯގެ ފުރަތަމަ ޔޫރޯ އަކީ 2004 ވަނަ އަހަރު އަމިއްލަ ގައުމުގައި ބޭއްވި ޔޫރޯ އެވެ. އެ ފަހުން ބޭއްވި ހުރިހާ ޔޫރޯ އެއްގައި ރޮނާލްޑޯ ކުޅެފައިވެ އެވެ. އަދި 2016 ވަނަ އަހަރުގެ މުބާރާތުގެ ޗެމްޕިއަންކަންވެސް ހޯދައިފައިވެ އެވެ.
ރޮނާލްޑޯގެ ދެ ވަނަ ރެކޯޑަކީ, ޔޫރޯގައި އެންމެ ގިނަ އެސިސްޓް ހެދި ކުޅުންތެރިޔާގެ ރެކޯޑެވެ. ތުރުކީ ކޮޅަށް ޕޯޗުގަލް އިން 3-0 ގެ ނަތީޖާ އަކުން ކުރިހޯދި މެޗުގެ ތިންވަނަ ގޯލު ބްރޫނޯ ފެނާންޑޭސް ޖެހިއިރު, މިއީ ރޮނާލްޑޯ ދިން ޕާހަކުން ބްރޫނޯ ފެނާންޑޭސް ޖެހި ގޯލެކެވެ. މިއާ އެކު ރޮނާލްޑޯ މި މުބާރާތުގައި ހެދި އެސިސްޓްގެ އަދަދު ނުވަ އަކަށް ވަނީ އަރައިފަ އެވެ. ރޮނާލްޑޯ އަކީ ޔޫރޯގައި އެންމެ ގިނަ ގޯލު ޖެހި ކުޅުންތެރިޔާ ވެސް މެއެވެ. އޭނާ ވަނީ މި މުބާރާތުގައި މިހާތަނަށް 14 ގޯލު ޖަހައިފަ އެވެ.
ޕެޕޭގެ ރެކޯޑަށް ބަލާއިރު, މި ފަހަރުގެ ޔޫރޯއާ އެކު, ޕެޕޭ ވެގެންދިޔައީ ޔޫރޯގައި މެޗެއް ކުޅުނު އެންމެ ދުވަސްވީ ކުޅުންތެރިޔާ އަށެވެ. އުމުރުން 41 އަހަރުގެ ޕެޕޭ ވަނީ ޕޯޗުގަލުން ގްރޫޕް ސްޓޭޖުގައި ކުޅުނު ދެ މެޗުގައި ވެސް މޮޅު ކުޅުމެއް ދައްކާފަ އެވެ. މީގެ ކުރިން މި ރެކޯޑް އޮތީ ހަންގޭރީގެ ކީޕަރު ގަބޫ ކިރާއީ އަތުގަ އެވެ. އޭނާ ރެކޯޑު ހެދީ 40 އަހަރުގައި ޔޫރޯ ކުޅެގެންނެވެ.
