ބާސެލޯނާ (މެއި 24) - ބާސެލޯނާގެ ކޯޗުކަމުން ވަކިވާނެ ކަމަށް ނިންމުމަށް ފަހު، އެ ނިންމުން ބަދަލުކޮށް، ބާސެލޯނާގައި މަޑުކުރި ކޯޗު، ޒަވީ ހެނާންޑޭޒް ވަކިކުރުމަށް ފަހު އެ ޓީމުގެ ކޯޗަކަށް ޖަރުމަނުގެ ކުރީގެ ކޯޗު ހަންސީ ފްލިކް ހަމަޖައްސައިފި އެވެ.
މިދިޔަ ޖެނުއަރީ މަހު ޒަވީ، ވަނީ މި ސީޒަން ނިމުމުން ބާސެލޯނާގެ ކޯޗުކަން ދޫކޮށްލާނެކަން އިއުލާނުކޮށްފަ އެވެ. އެކަމަކު، ތަކުރާރުކޮށް ބާސެލޯނާ އިން ކުރިއަށްގެންދިޔަ މަޝްވަރާތަކަށް ފަހު، ޒަވީ އެ ނިންމުން ބަދަލުކުރި އެވެ. މީގެ މަހެއްހާ ދުވަސްކުރިން ޒަވީ، އިއުލާނުކުރީ އިތުރު އެއް
އަހަރު ބާސެލޯނާގައި މަޑުކުރަން އެއްބަސްވެވިފައިވާ ކަމަށެވެ. އެހެން ނަމަވެސް، އެންމެ ފަހުން ބާސެލޯނާ އިން ކުޅުނު މެޗަށް ފަހު، ޒަވީ، ނޫސްވެރިންގެ ބައްދަލުވުމުގައި ދެއްކި ވާހަކަތަކެއްގެ ސަބަބުން އޭނާ ވަކިކުރަން ބާސެލޯނާގެ ބޯޑު މެމްބަރުން ވަނީ ހުށަހަޅައިފަ އެވެ.
އެއާ އެކު، މިއަދު ބާސެލޯނާ އިން ޒަވީއާ އެކު ބޭއްވި ބައްދަލުވުމުގައި ވަނީ އޭނާ މަގާމުން ދުރުކުރަން ނިންމާފައިވާކަން އަންގައިފަ އެވެ. އެ ގޮތަށް އެންގީ، ބާސެލޯނާގެ ރައީސް ޖޮއާން ލަޕޯޓާ އާއި ސްޕޯޓިން ޑިރެކްޓަރު، ޑެކޯ އެވެ.
މަގާމުން ވަކިކުރަން ނިންމި ކަމުގައި ވިޔަސް، ރަސްމީކޮށް އެކަން ފުރިހަމަކުރާނީ، އާދިއްތަ ދުވަހު ކުޅޭ ސްޕެނިޝް ލީގު ފަހު މެޗަށް ފަހު އެެވެ. އެހެންކަމުން، ޒަވީ، ބާސެލޯނާ އަށް ކޯޗުކޮށްދޭނެ ފަހު މެޗަކީ، ސެވިއްޔާއާ ދެކޮޅަށް ކުޅޭ މެޗެެވެ.
ބާސެލޯނާގެ ކޯޗަކަށް ޒަވީ ހަަމަޖެއްސީ، 2021 ވަނަ އަހަރު ނޮވެމްބަރު މަހު އެވެ.
ޖަރުމަނުގެ ކޯޗު ފްލިކް: އޭނާ ވަނީ ބާސެލޯނާއާ ހަވާލުވާން އެއްބަސްވެފައި.
ފްލިކް ހުރީ ބާސެލޯނާގެ ހުށަހެޅުމެއްގެ އިންތިޒާރުގައި
ބާސެލޯނާ އިން ޒަވީ ވަކިކޮށް، އެ ޓީމުގެ ކޯޗަކަށް ގެންނަން ނިންމި ފްލިކް އަކީ، ޖަރުމަނު ގައުމީ ޓީމާއި ބަޔާން މިއުނިކްގެ ކުރީގެ ކޯޗެވެ.
ފްލިކް، 59، ޖަރުމަނު ގައުމީ ޓީމުގެ ކޯޗުކަމުން މިދިޔަ އަހަރުގެ ސެޕްޓެމްބަރު މަހު ވަކިކުރިއިރު، އެ ފަހުން އޭނާ ޓީމަކާ ހަވާލެއްނުވެ އެވެ. އަލުން ބަޔާންއާ ހަވާލުވާން ވެސް ފްލިކަށް ފުރުސަތު ލިބުނުއިރު، އޭނާ ބޭނުމެއް ނުވި އެވެ. އަނެއްކޮޅުން، ޗެލްސީގެ ކޯޗުކަން ހުށަހަޅަން ކުރި މަޝްވަރާގައި ވެސް ފްލިކް ބައިވެރިއެއްނުވި އެވެ.
ރިޕޯޓްތައް ބުނާގޮތުން، ފްލިކްގެ ފޯކަސް ހުރީ ބާސެލޯނާއާ ހަވާލުވުމަށެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން، ބާސެލޯނާއާ އެކު ފްލިކް މަޝްވަރާކޮށްފައިވަނީ ތިން އަހަރުގެ ކޮންޓްރެކްޓެއްގައި ސޮއިކުރާ ގޮތަށެވެ.
ފްލިކް ވަނީ ބަޔާން އަށް ކޯޗުކޮށްދިންއިރު، ސީޒަނުގެ ހުރިހާ މުބާރާތެއްގެ ތަށި އެ ޓީމަށް ހޯދައިދީފަ އެވެ. އޭރު އެ ޓީމަށް ކުޅުނު އެއް ކުޅުންތެރިޔާ، ރޮބަޓް ލެވަންޑޯސްކީ މި ވަގުތު ހުރީ ބާސެލޯނާގަ އެވެ.
