އެމްޕީއެލް އެފްއޭއެމް ދެ ވަނަ ޑިވިޝަން ފުޓުބޯޅަ މުބާރާތުގައި މިއަދު ހަވީރު ކުޅެން އޮތް މެޗަށް ބިސް ބުރު ސްޕޯޓްސް ކްލަބްގެ ކުޅުންތެރިން މެޗު ކުޅެވޭ ވަރަށް ދަނޑަށް ހާޒިރު ނުވުމުން މެޗު ވިކްޓަރީ ސްޕޯޓްސް ކްލަބަށް ލިބިއްޖެ އެވެ.
މިއީ، މި ފަހަރުގެ ދެ ވަނަ ޑިވިޝަން ފުޓްބޯޅަ މުބާރާތުގައި ޓީމެއް ހަމަނުވެގެން މެޗު އިދިކޮޅު ޓީމަށް ލިބުނު ދެ ވަނަ ފަަހަރެވެ. މީގެ ކުރިން، ކްލަބް ޓީނޭޖް މެޗަށް ހާޒިރުނުވާތީ، ނިއު ރޭޑިއަންޓް ސްޕޯޓްސް ކްލަބަށް ވަނީ މެޗުގެ ތިން ޕޮއިންޓާއި ފައިދާ ދެ ގޯލު ލިބިފަ އެވެ. އެފްއޭއެމް އިން މި މައްސަލައިގައި ނިންމާފައިވަނީ، ޓީނޭޖް، 30،000 ރުފިޔާ އިން ޖޫރިމަނާ ކުރުމަށެވެ.
ބިސް ބުރަށް މިއަދުގެ މެޗަށް ޓީމު ހަމަނުވުމުން، ވިކްޓަރީ އަށް ވެސް ތިން ޕޮއިންޓް ލިބޭނެ އެވެ. އެއާ އެކު، ވިކްޓަރީން މި ފަހަރުގެ ދެ ވަނަ ޑިވިޝަނުގެ ގްރޫޕްގެ ސީގެ މެޗުތައް ނިންމާލާފައިިމިވަނީ ހުރިހާ މެޗަކުން މޮޅުވެގެންނެވެ. ވިކްޓަރީން ވަނީ ކުޅުނު ހަތަރު މެޗުން 12 ޕޮއިންޓް ހޯދައިފަ އެވެ.
މި ގްރޫޕްގެ ދެ ވަނައިގައި އޮތީ ތިން މެޗުން ހަ ޕޮއިންޓާ އެކު، ލެގޫންސް ސްޕޯޓްސް ކްލަބް އެވެ. ތިން ވަނައިގައި އޮތީ ހަތަރު މެޗުން ހަ ޕޮއިންޓް ހޯދާފައިވާ ކްލަބް ޕީކޭ އެވެ. ހަަތަރު ވަނައިގައި އޮތް ލޮރެންޒޯ ސްޕޯޓްސް ކްލަބަށް ވަނީ ތިން މެޗުން ތިން ޕޮއިންޓް ލިބިފަ އެވެ. މި ގްރޫޕްގެ ދެ ވަނަ ކަނޑައެޅޭނީ ލޮރެންޒޯ އާއި ލެގޫންސް ކުޅޭ މެޗުންނެވެ.
މި ގްރޫޕްގެ ފުލަށް ދިޔައީ ހަތަރު މެޗުން ވެސް ބަލިވި ބިސް ބުރު އެވެ.
ވިކްޓަރީގެ އިތުރުން، މި ފަހަރުގެ އެމްޕީއެލް އެފްއޭއެމް ދެ ވަނަ ޑިވިޝަން ފުޓްބޯޅަ މުބާރާތުގެ ކުއާޓާ ފައިނަލުން ފުރުސަތު ހޯދާފައިވަނީ، ނިއު ރޭޑިއަންޓް، ޓެންޓް ސްޕޯޓްސް ކްލަބް، މަސް އޮޑި ސްޕޯޓްސް ކްލަބް އަދި ކުޑަހެންވޭރު ޔުނައިޓެޑް އެވެ.
ފަނަރަ ޓީމު ވާދަކުރާ މި ފަހަރުގެ ދެ ވަނަ ޑިވިޝަން ފުޓްބޯޅަ މުބާރާތުގެ ކުއާޓާ ފައިނަލުން ފުރުސަތު ލިބޭނީ ތިން ގްރޫޕުން ވެސް ގަދަ ދެ ޓީމުގެ އިތުރުން، އެ ތިން ގްރޫޕްގެ ތިން ވަނަ އަށް ދާ ޓީމުތަކުގެ ތެރެއިން އެންމެ ރަނގަޅު ދެ ޓީމެކެވެ.
