ގައުމީ ޓީމުގެ ތައްޔާރީތަކަށާއި އޭއެފްސީ ކަޕްގައި ކުޅޭ މާޒިޔާގެ ތައްޔާރީތަކަށް މެދުކަނޑާލައިފާ އޮތް ދިވެހި ޕްރިމިއާ ލީގުގެ ކުޅުން މިއަދު ފަށަން ހަމަޖެހިފައި އޮތް ނަމަވެސް މިއަދު މެޗުތައް ނުކުޅޭކަން ޔަގީންވެއްޖެ އެވެ.
އެންމެ ފަހުން ލީގު މެޗެއް ކުޅެފައި ވަނީ އޮގަސްޓް 29 ވަނަ ދުވަހުގެ ރެއެވެ. އޭގެ ފަހުން ލީގުގެ ކުޅުން މެޗު ކަނޑާލީ އޭއެފްސީ ކަޕްގައި މާޒިޔާ ކުޅޭ މެޗުތަކަށާއި، ވޯލްޑް ކަޕް/އޭޝިއަން ކަޕްގެ ކޮލިފައިންގައި ބަންގްލަދޭޝްއާ ދެކޮޅަށް ރާއްޖެ ކުޅޭ ދެ މެޗަށެވެ.
ލީގުގެ ޝެޑިއުލް އެންމެ ފަހުން އެފްއޭއެމުން އާންމުކުރީ އޮގަސްޓް 19 ވަނަ ދުވަހު އެވެ. މި ޝެޑިއުލްގައި ވާގޮތުން، އިންޓަނޭޝަނަލް ބްރޭކަށް ފަހު މިއަދު ހަވީރު ލީގު އަލުން ފަށަން ހަމަޖެހިފައި އޮތީ ކްލަބް އީގަލްސް އާއި ޔުނައިޓެޑް ވިކްޓަރީ ކުޅޭ މެޗުންނެވެ. ނަމަވެސް މި މެޗު މިއަދު ނުކުޅޭކަން ދެ ކުލަބުގެ އޮފިޝަލުންވެސް ވަނީ ޔަގީންކޮށްދީފަ އެވެ.
ލީގުގެ ކުޅުން ފެށުމާ ގުޅޭގޮތުން އެފްއޭއެމްއާ ސުވާލުކުރުމުން އެކަމަށް ޖަވާބެއް ނުލިބެ އެވެ. އަޑު އިވޭ ގޮތުގައި ލީގުގެ ކުޅުން 10 ދުވަހަށް ވަނީ ފަސްކޮށްފަ އެވެ.
އެންމެ ފަހުން ލީގުގެ ކުޅުމާ ގުޅޭގޮތުން އެފްއޭއެމުން އެއްޗެއް ބުނެފައިވަނީ މަނީ ލޯންޑަރިންގެ ތުހުމަތުގައި ފުލުހުން ކުރިއަށްގެންދާ ތަހުހީގާ ގުޅޭގޮތުން ނެރުނު ބަޔާނުގަ އެވެ.
ޕްރޮސެކިއުޓާ ޖެނެރަލްގެ އޮފީހުން އަންގައިގެން ފުލުހުން ވަނީ ކޯޓު އަމުރެއްގެ ދަށުން އެފްއޭއެމަށްވަދެ، އެ އިދާރާގެ ލިޔެކިޔުންތަކާ ހާޑް ޑްރައިވްތަކެއް ގެންގޮސްފަ އެވެ. މިކަމުގެ ސަބަބުން އެފްއޭމުން ރާވާ ހިންގާ މުބާރާތްތައް ކުރިއަށް ގެންދެވެން ނެތް ކަމަށް އެ އިދާރާއިން ވަނީ ބުނެފަ އެވެ.
އެފްއޭއެމަށް ފީފާ އާއި އޭއެފްސީން އަދި އެނޫން ވެސް ގޮތްގޮތުން ދޭ ފައިސާ، އެތަނުގެ ވެރިން ނަހަމަ ގޮތުގެ ބޭނުން ކުރާ ކަމުގެ ތުހުމަތުގައި ފުލުހުން ކުރަމުން އަންނަ ތަހުގީގާ ގުޅޭގޮތުން އެފްއޭއެމުން ނެރެފައިވާ ބަޔާނުގައި ބުނެފައިވަނީ އެއްވެސް ފައިސާއަކަށް ހިޔާނާތްތެރިވެފައިނުވާނެކަމަށެވެ.
