އޭއެފްސީ އޭޝިއަން ފުޓްސަލް ކަޕްގެ ކޮލިފައިންގައި ރާއްޖޭގެ ގައުމީ ފުޓްސަލް ޓީމު ކުޅުނު ފުރަތަމަ މެޗުން ދުނިޔޭގެ ރޭންކިން ހަ ވަނަ، އިރާން އަތުން 18-2 އިން ބަލިވެއްޖެ އެވެ.
މިދިޔަ އަހަރުގެ ކޮލިފައިން ބުރުގައި ތިން މެޗުން ވެސް ރާއްޖެ އަށް ޖެހުނީ އެއް ގޯލެވެ. އެ ގޮތުން، އިރާން އަތުން 17-0 އިން ބަލިވިއިރު، ދެ ވަނަ މެޗުން ކިރްގިސްތާން އަތުން 7-1 އިން ބަލިވިއިރު، ތިން ވަނަ މެޗުން ތުރުކުމެނިސްތާން އަތުން ބަލިވީ 7-0 އިންނެވެ.
މިދިޔަ އަހަރުގެ ކޮލިފައިންގައި، ފުޓްސަލް ޓީމުން ޖެހި ހަމައެކަނި ގޯލު ޖެހީ ހުސެއިން ޝަރީފް (އޮންލީ) އެވެ. އެކަމަކު، މި ފަހަރު ފުރަަތަމަ މެޗުގައި އިރާން ކޮޅަށް މި ވަނީ ދެ ގޯލު ޖަހައިފަ އެވެ.
ކިރްގިސްތާންގެ ބިޝްކެކްގައި ކުރިއަށްދާ މި ފަހަރުގެ ކޮލިފައިން އަށް ރާއްޖޭން މިއަދު ކުޅުނު މެޗަށް ނެރުނު ފުރަތަމަ ފަސް ކުުޅުންތެރިންނަކީ ގޯލްކީޕަރު، ޒައިދާން އަހުމަދު (އަސޫ)، މުހައްމަދު އިމްރާން (އިންމި)، އޮންލީ، އަލީ ހާފިޒު (ހާއްޕެ) އަދި އިޝާން އިބްރާހިމް (ސައްޓު) އެވެ.
އިރާނުން ފުރަތަމަ ހާފު ނިންމާލީ 6-1 އިން ކުރީގައި އޮވެގެންނެވެ. ރާއްޖެ އަށް މި ހާފުގައި ގޯލު ޖަހައިދިނީ ހާއްޕެ އެވެ. ހާއްޕެ މި ގޯލު ޖެހީ ކީޕަރު ކުރިއަށް ނުކުތް ވަގުތު ހަމަޖެހިލައިފައި ގޯލުގެ ތެރެއަށް ބޯޅަ ފޮނުވާލައިގެންނެވެ. އިރާނުން 14 ގޯލު ޖަހާފައިވަނިކޮށް، ރާއްޖޭން ދެ ވަނަ ގޯލެއް ޖެހީ ބަދަަލަކަށް ކުޅެން އަރައި، ރަނގަޅު ކުޅުމެއް ދެއްކި އަލީ ޝިޔާހު (ޝިޔަޅޭ) އެވެ. މިއީ ހާއްޕެ، އިރާންގެ ތިން ކުޅުންތެރިން ކައިރިން ދެމިގަތުމަށް ފަހު، ހުސްކޮށްލާފައި ދިން ބޯޅައަކުން ޝިޔަޅޭ ޖެހި ގޯލެކެވެ.
މި މެޗުގައި ރާއްޖޭން ބަދަލުތަކެއް ގެނެސްގެން ކުޅެވޭތޯ މަސައްކަތް ކުރި ނަމަވެސް އިރާންގެ ތަފާތަކަށް ވީ މި ލެވަލްގައި ތަޖުރިބާހުރި ކުޅުންތެރިން ގިނަވުމާއި މި މުބާރާތާ ދިމާކޮށް، ބްރެޒިލްްގައި ކުރިއަށްދިޔަ މުބާރާތެއްގައި ކުޅެ ތަޖުރިބާ ހާސިލްކޮށްފައިވުމެވެ. އެ ގޮތުން، އިރާން ފުޓްސަލް ޓީމުން ވަނީ މިދިޔަ މަހު ބްރެޒިލްގައި ބޭއްވި މުބާރާތުގައި ވެސް ރަނގަޅު ކުޅުމެއް ދައްކައިފަ އެެވެ.
ރާއްޖެ އަށް ބައިނަލްއަގުވާމީ ލެވަލްގެ ފުޓްސަލް މުބާރާތްތަކަށް ދާއިރު ކުރިމަތިވާ ބޮޑު ގޮންޖެހުމަކީ ރާއްޖޭގައި ޓާފް ދަނޑުތަކުގައި ފުޓްސަލް ކުޅުމަށް ފަހު، އިންޓަނޭޝަނަލް މުބާރާތްތަކުގައި އިންޑޯ ސްޓޭޑިއަމެއްގައި ކުޅެން އެންމެ އެކަށީގެންވާ ވަރަށް ނުހޭނުމެެވެ. މި ފަހަރުގެ މުބާރާތާ ދިމާކޮށް ޓްރެއިނިން ކޭމްޕެއް ހޯދަން ޓީމުން މަސައްކަތް ކުރި ނަމަވެސް އެކަން ނުވި އެވެ. އެެހެން ނަމަވެސް މިދިޔަ އަހަރާ ހިލާފަށް މި ފަހަރު، ސޯޝަލް ސެންޓަރު އިންޑޯ ހޯލުގައި ޕްރެކްޓިސް ގެންދަން ފުރުސަތު ލިބިގެންދިޔަ އެވެ.
ރާއްޖޭން ކުޅޭ ދެ ވަނަ މެޗުގައި ހޯމަ ދުވަހު ބައްދަލުކުރާނީ ލެބަނަންއާ އެވެ. އަދި ގްރޫޕްގެ ފަހު މެޗުގައި ބުދަ ދުވަހު ކިރްގިސްތާނާ ކުޅޭނެ އެވެ.
