މާދަމާ ކިރްގިސްތާންގައި ފަށާ އޭއެފްސީ އޭޝިއަން ފުޓްސަލް ކަޕްގެ ކޮލިފައިންގައި ރާއްޖެ ހިމެނޭ ގްރޫޕްގައި އޮތް ތިން ގައުމަކީ ވެސް ވަރުގަދަ ޓީމުތަކެއް ކަމަށާއި މިއީ ރާއްޖެ އަށް ރަނގަޅު ކުޅުމެއް ދައްކާލަން ލިބިގެންދިޔަ ފުރުސަތެއްގެ ގޮތުގައި ދެކޭ ކަމަށް ގައުމީ ފުޓްސަލް ޓީމުގެ ހެޑް ކޯޗު އަބްދުﷲ ނަސީރު (އަބޯ) ބުނެފި އެވެ.
ރާއްޖެ ހިމެނެނީ ކިރްގިސްތާން އާއި އިރާން އަދި ލެބަނަންއާ އެކު ގްރޫޕް ސީގަ އެވެ. ފުރަތަމަ މެޗުގައި ރާއްޖެ ކުޅޭނީ މާދަމާ އިރާންއާ އެވެ. އެ މެޗު ފަށާނީ ރާއްޖެ ގަނޑިން ތިނެއް ޖަހާއިރު އެވެ.
ކޮލިފައިންގެ ކުރިން މިއަދު ބޭއްވި ނޫސްވެރިންގެ ބައްދަލުވުމުގައި އަބޯ ބުނީ ރާއްޖޭގައި ރަސްމީ ފުޓްސަލް ކުޅޭނެ އިންޑޯއެއް ނެތް ކަމަށާއި އެހެން ކަމުން އާޓިފިޝަލް ޓާފެއްގައި ޕްރެކްޓިސް ކުރުމަށް ފަހު، 10 ވަރަކަށް ދުވަހު ސޯޝަލް ސެންޓަރު އިންޑޯގައި ފަރިތަކޮށްލަން ލިބުނު ކަމަށެވެ.
އެކަމަކު، އަބޯ ބުނީ މި މުއްދަތަކީ މި ލެވަލްގެ މުބާރާތަކަށް އެންމެ އެކަށީގެންވާ ތައްޔާރީތަކެކޭ ނުބުނެވޭނެ ކަމަށެވެ.
ގައުމީ ފުޓްސަލް ޓީމަށް ޖޯޒީ ހަވާލުކުރުމަށް ބޭއްވި ރަސްމިއްޔާތުގެ ތެރެއިން.--- ފޮޓޯ: މުހައްމަދު ޝާބިން/ އަދަދު
"ފަރިތަކޮށްލަން ރަނގަޅު ފްރެންޑްލީ މެޗުތަކެއް، ނޫނީ އެންމެ ރަނގަޅު ޓްރެއިނިންތަކެއް ނުލިބޭ. ދެން އަހަރެމެން ގްރޫޕްގައި މި އޮތް ތިން ގައުމު ވެސް ވަރަށް ވަރުގަދަ، އެހެންވީމަ އަހަރެމެން ބޭނުމީ މި ފުރުސަތުގައި ކުޅެވުނު އެންމެ ރަނގަޅަކަށް ކުޅެން،" އަބޯ ބުންޏެވެ.
މިދިޔަ އަހަރުގެ ކޮލިފިކޭޝަންގައި ރާއްޖެ ފުރަތަމަ މެޗުގައި އިރާން އަތުން ބަލިވީ 17-0 އިންނެވެ. ދެ ވަނަ މެޗުން ކިރްގިސްތާން އަތުން 7-1 އިން ރާއްޖެ ބަލިވިއިރު، ތިން ވަނަ މެޗުން ވަނީ ތުރުކުމެނިސްތާން އަތުން 7-0 އިން ބަލިވެފަ އެވެ.
މިއަދުގެ ނޫސްވެރިންގެ ބައްދަލުވުމުގައި އަމާޒުވި ސުވާލަކަށް ދިން ޖަވާބުގައި އަބޯ ބުނީ މިދިޔަ އަހަރުގެ ކޮލިފައިންގައި ކުޅުނު ޓީމަށް ބަދަލުތަކެއް އައިސްފައިވާ ކަމަށެވެ. އެ ގޮތުން ހަތަރު ވަރަކަށް ބަދަލު މި ފަހަރުގެ ޓީމަށް ވަނީ އަތުވެފަ އެވެ.
މިދިޔަ އަހަރުގެ އޭޝިއަން ކަޕް ކޮލިފިކޭޝަން އަށް ދިއުމުގެ ކުރިން ރާއްޖޭގެ ފުޓްސަލް ޓީމަށް ތައިލެންޑްގެ އިންވިޓޭޝަނަލް މުބާރާތެއް ކުޅެލަން ލިބުނެވެ. އެކަމަކު، މި ފަހަރު ޓީމުން ޓްރެއިނިން ކޭމްޕެއް ބޭނުން ކަމަށް ހާމަކުރި ނަމަވެސް އެ ފުރުސަތެއް ނުލިބުނެވެ އަދި މުބާރާތަށް ފުރަން ކަނޑައެޅި ތާރީހު ލަސްވެ، އެންމެ ފަހުން މެޗުތައް ކުޅެން ކިރްގިސްތާނަށް ދެވޭގޮތްވީ މުބާރާތް ފެށެން އެއް ދުވަހަށް ވެފައި ވަނިކޮށެވެ.
ސޯޝަލް އިންޑޯގައި ބޭއްވި ގައުމީ ފުޓްސަލް ޓީމުގެ ފަރިތަކުރުންތަކުގެ ތެރެއިން.--- ފޮޓޯ: މުހައްމަދު ޝާބިން/ އަދަދު
ކޮލިފައިން ފުރަތަމަ މެޗުގައި އިރާނާ ދެކޮޅަށް ކުޅުމަށް ފަހު، ހޯމަ ދުވަހު ބައްދަލުކުރާނީ ލެބަނަންއާ އެވެ. އަދި ގްރޫޕްގެ ފަހު މެޗުގައި ބުދަ ދުވަހު ކިރްގިސްތާނާ ކުޅޭނެ އެވެ.
މި ފަހަރު ގައުމީ ފުޓްސަލް ސްކޮޑުގައި ހިމެނެނީ މުހައްމަދު އިމްރާން (އިންމި)، ސާމިން މުހައްމަދު ނަސީރު، އަލީ ހާފިޒް (ހާއްޕެ)، ހުޒައިފަތު ރަޝީދު (ހުޒޭ)، ހުސެއިން ޝަރީފް (އޮންލީ)، އަބްދުﷲ ޝާފިއު (ޝާއްޕެ)، އިޝާން އިބްރާހިމް (ސައްޓު)، ހުސެއިން ސުހައިލް (ސޮކޭ)، އިސްމާއިލް ވަޖީހު (ވައްޖެ)، ޔާމީން މުހައްމަދު (ޔާންޓެ)، އަލީ ޝިޔާހު (ޝިޔާ)، އަލީ މާއިސް (މައްޓު)، ޒައިދާން އަހުމަދު (އަސޫ) އަދި ފައްޔާޒް ފަޔާޒް (ފައިއްޓެ) އެވެ.
ޓީމުގެ ކެޕްޓަނުންނަކީ އިންމި، ހާއްޕެ އަދި އަސޫ އެވެ.
އެންމެ ފުރަތަމަ، މިދިިޔަ މަހު ކުރީކޮޅުގައި 40 ކުޅުންތެރިންގެ ޕްރިލިމިނަރީ ސްކޮޑެއް ނެގުމަށް ފަހު، ދެން ވަނީ 20 ކުޅުންތެރިންނަށް ސްކޮޑު ކުޑަކޮށްފަ އެވެ. އަދި އެ އަށް ފަހު، މުބާރާތަށް ދާ 14 ކުޅުންތެރިން ނަގައި، ސްކޮޑު ފައިނަލް ކުރީ އެވެ.
ގައުމީ ފުޓްސަލް ޓީމުގެ ސްކޮޑުގައި ހިމެނޭ ކުޅުންތެރިންނާއި އޮފިޝަލުން ފޮޓޯ އަކަށް ހުއްޓިލައިގެން.--- ފޮޓޯ: މުހައްމަދު ޝާބިން/ އަދަދު
ޕީއެސްއެމް ސްޕޯޓްސް އަށް ދިން އިންޓަވިއުއެއްގައި އަބޯ ބުނެފައިވަނީ މި ފަހަރު ނެގި ފުޓްސަލް ޓީމަށް ބަދަލުތަކެއް ގެންނަން ނިންމީ ކުރިއަށް ވުރެ ޓީމު ވަރުގަދަ ކުރަން ބޭނުންވާތީ ކަމަށެވެ. އަދި މިހާރު މި އޮތް ގައުމީ ފުޓްސަލް ޓީމަކީ ރާއްޖޭން ނެގޭނެ އެންމެ ވަރުގަދަ ޓީމު ކަމަށާއި އެ ޓީމު ބަލިކުރެވޭ ވަރުގެ ޓީމެއް ރާއްޖޭން ނުނެގޭނެ ކަމަށް އަބޯ ބުނެފައިވެ އެވެ.
"އެކަމަކު، އަޅުގަނޑުމެން މި ތައްޔާރުވަނީ ރާއްޖޭގެ ޓީމުތަކާ ދެކޮޅަށް ކުޅޭކަށް ނޫން. ބޭރު ގައުމުތަކާ ކުޅެން. އިންޝާﷲ ކުރިއަށް ވުރެ ރަނގަޅުވާނެ ކަމަށް މި ބަލަނީ،" އަބޯ ބުންޏެވެ.
(އަބޯ) އަށް އެހީތެރިވުމުގެ ގޮތުން އެސިސްޓަންޓް ކޯޗުންގެ ގޮތުގައި ތިބީ އަހުމަދު ވިޝާލް (އަންދު) އާއި އަހުމަދު ތޯހާ އެވެ. މީގެ އިތުރުން، ގޯލްކީޕަރު ޓްރެއިނަރަކީ އިބްރާހިމް އަހުމަދު އެވެ. އަދި ޓީމު އޮފިޝަލަކަށް އަހުމަދު ޝަހުމް މުހައްމަދު ހުރިއިރު، ޓީމުގެ މެނޭޖަރަކީ އަލީ ނަދީމް (ކޮކޯ) އެވެ.
