އަޒަރުބައިޖާންގެ ބާކޫގައި މިމަހުގެ 15 އިން ސެޕްޓެމްބަރު އެކަކަށް އޮންނަ 53 ވަނަ ވޯލްޑް ޝޫޓިން ޗެމްޕިއަންޝިޕްގައި ރާއްޖޭގެ ޒިޔާން ޟިޔާއު ވާދަކުރަން ތައްޔާރުވެއްޖެ އެވެ.
އިންޓަނޭޝަނަލް ޝޫޓިން ސްޕޯޓް ފެޑެރޭޝަން (އައިއެސްއެސްއެފް) އިން އިންތިޒާމްކޮށްގެން ބާއްވާ މި މުބާރާތުގައި ދުނިޔޭގެ 104 ޤައުމަކުން 55 ކެޓަގަރީއަކާއި 12 އިންޑިވިޖުއަލް އިވެންޓެއްގައި 1260 އެތުލީޓުން ވާދަކުރާނެވެ އެވެ.
މިފަހަރުގެ މުބާރާތުގައި ރާއްޖެއިން ވާދަކުރަނީ އެންމެ ފަހުން ބޭއްވި މޯލްޑިވްސް ސްޕޯޓްސް އެވޯޑުގައި ރާއްޖޭގެ އެންމެ މޮޅު ފިރިހެން ޝޫޓަރުގެ މަގާމު ހޯދި ގައުމީ ޝޫޓިން ޓީމްގެ އުއްމީދީ އެތުލީޓު ޒިޔާން އެވެ. ވޯލްޑް ޗެމްޕިއަންޝިޕްގައި ޒިޔާން ވާދަކުރާނީ 10 މީޓަރު އެއަރ ޕިސްޓަލް ކެޓަގަރީގަ އެވެ.
10 މީޓަރު އެއަރ ޕިސްޓަލް ކެޓަގަރީގައި ޒިޔާން ވާދަކުރާއިރު މި ކެޓަގަރީގެ ގައުމީ ރެކޯޑުވެސް އޮންނަނީ ޒިޔާންގެ އަތުގަ އެވެ. އޭނާ އެންމެ ފުރަތަމަ އެ ރެކޯޑު މުގުރާލީ 2019 ވަނަ އަހަރު އޮތް އޭޝިއަން ޝޫޓިން ޗެމްޕިއަންޝިޕްގަ އެވެ. އޭގެ ފަހުން 2019 ގައި ނޭޕާލްގައި އޮތް ސައުތު އޭޝިއަން ގޭމްސްގައި ޒިޔާން ވަނީ ވަނީ އަމިއްލަ ރެކޯޑު އާ ކޮށްފަ އެވެ. މިއަހަރުގެ މާޗު މަހު ޖަކާޓާގައި އޮތް އޭޝިއަން ރައިފަލް/ޕިސްޓަލް ކަޕް 2023 ގައި ވާދަކޮށް ޒިޔާން ވަނީ 569ގެ ސްކޯއަކާއިއެކު އަމިއްލަ ރެކޯޑު އާކޮށްފަ އެވެ.
ޒިޔާން އާއިއެކު ކޯޗެއްގެ ގޮތުގައި ބައިވެރިވާނީ ގައުމީ ޓިމްގެ ކޯޗު ހަސަން އަބްދުލް ގަފޫރު އެވެ.
2024ގައި ޕެރިސްގައި އޮންނަ އޮލިމްޕިކްސް ސްކޮލާޝިޕް ލިބިފައިވާ ޒިޔާން އަށް މިފަހަރުގެ ވޯލްޑް ޗެމްޕިއަންޝިޕަކީ މުހިންމު މުބާރާތެކެވެ. މި މުބާރާތުން ޕެރިސް އޮލިމްޕިކްސް އަށް ކުޅުންތެރިން ކޮލިފައިވުމަށް ޕޮއިންޓްސް ލިބޭނެ އެވެ.
އަނެއްކޮޅުން މިއީ ރާއްޖޭގައި މިވަގުތު ހުރި އެންމެ ހުނަރުވެރި އެއް ޝޫޓަރު ކަމަށްވާ ޒިޔާން އަށް އޭޝިއަން ގޭމްސްގެ ކުރިން ލިބޭނެ މުހިންމު ތަޖުރިބާއަކަށް ވާނެ އެވެ.
އަންނަ މަހު ޗައިނާގެ ހަންޒޫގައި 19 ވަނަ އޮންނަ އޭޝިއަން ގޭމްސް އަށް ޝޫޓިން ޓީމުން އަންނަނީ ދުރާލާ ތައްޔާރުވަމުންނެވެ. އެ މުބާރާތުގައި ރަނގަޅު ކާމިޔާބެއް ލިބޭނެކަމަށް މޯލްޑިވްސް ޝޫޓިން އެސޯސިއޭޝަނުން އުއްމީދުކުރެ އެވެ.
ރާއްޖޭގެ ގައުމީ ފިރިހެން ޓީމް އެންމެ ފަހުން ވާދަކުރީ އިންޑޮނޭޝިއާގެ ޖަކާޓާގައި މިއަހަރުގެ ކުރީކޮޅު ކުރިއަށްދިޔަ އޭޝިއަން ރައިފަލް/ޕިސްޓަލް ކަޕް 2023ގަ އެވެ. އެ މުބާރާތުގައި ގައުމީ ޓީމްގެ ޝޫޓަރުންވަނީ ހަތަރު ގައުމީ ރެކޯޑެއް އާކޮށްފަ އެވެ.
