މެޑްރިޑް (އޭޕްރީލް 17) - މީގެ ހަ ދުވަސް ކުރިން، ސްޕެނިޝް ލީގުގައި ބާސެލޯނާ ވަނީ އަމިއްލަ ދަނޑުގައި ޖިރޯނާއާ އެއްވަރުވެފަ އެވެ. ލީގުގައި މި ހަފްތާގައި ގެޓަފޭ ދަނޑުގައި ރޭ ލަނޑެއް ނުޖެހި 0-0 ބާސެލޯނާ އެއްވަރުވިއިރު، މި މެޗު ކުޅުނު ދަނޑުގެ ވިނަގަނޑު އެންމެ ރަނގަޅު ހާލަތުގައި ނެތް ކަމަށް ބުނެ، ބާސެލޯނާގެ ކޯޗު ޒަވީ ހެނާންޑޭޒް ހިތްހަމަނުޖެހުން ފާޅުކޮށްފި އެވެ.
"ޝަކުވާއެއް ކުރަނީކީއެއް ނޫން. އެކަމަކު، ދަނޑުގެ ވިނަގަނޑު އޮތީ ހަރުކޮށް، ބޭނުންވާ ސްޕީޑުގައި ޕާހެއް ނުޖެހޭ. އެކަމާ ހެދި ވަރަށް ގެއްލުން ލިބުނު. ދެން، އެއީ ހުރިހާ ގޯހަކަށް ނަަހަދައި އަހަރެމެންގެ ކުުޅުމުގައި ހުރި ގޯސް ކަންކަން ވެސް ރަނގަޅުކުރަން ޖެހޭ،" ރޭގެ މެޗަށް ފަހު ބާސެލޯނާގެ ކީޕަރު ޓާ ސްޓެގެން ދަނޑުގެ ގޯސް ވާހަކަދެއްްކުމުން އެ ކަމާ ވިއްދައި، ޒަވީ ވެސް ދަނޑުގެ ޝަކުވާތައް އޮއްސާލި އެވެ.
ލީގުގައި ޖެހިޖެހިގެން ދެ މެޗުގައި ބާސެލޯނާ އަށް ޕޮއިންޓް ގެއްލުނަސް އެ ޓީމު އެއް ވަނައިގައި އޮތީ ރަނގަޅު ލީޑަކާ އެކު އެވެ. އެއީ 11 ޕޮއިންޓުގެ ލީޑެކެވެ.
ބާސެލޯނާ އަށް 29 މެޗުން 73 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލް މެޑްރިޑަށް ވަނީ 29 މެޗުން 62 ޕޮއިންޓް ލިބިފަ އެވެ. އެންޓޮއިން ގްރީޒްމަންގެ ދެ ގޯލާ އެކު، ރޭ އަލްމެރިއާ އަތުން 2-1 އިން މޮޅުވި އެތުލެޓިކޯ މެޑްރިޑް ތިން ވަނައިގައި އޮތީ 29 މެޗުން 60 ޕޮއިންޓް ހޯދައިގެންނެވެ.
ގެޓަފޭ ކުޅުންތެރިއަކު ކައިރިން ބާސެލޯނާގެ ލެވަންޑޯސްކީ (ކ) ބޯޅަ ފޮނުވާލަން މަސައްކަތް ކުރަނީ.
ލަނޑު ޖަހާނެ ރަނގަޅު ފުރުސަތުތަކެއް ގެޓަފޭ އިން ވެސް ހޯދި މި މެޗުގައި ބާސެލޯނާ އިން 25 ވަނަ މިނިޓްގައި ލަނޑެއް ޖެހުމާ ގާތަށް ޖެހިލި އެވެ. އެ ގޮތުން ބާސެލޯނާގެ ރަފީނިއާ ހުސްކޮށް ވަދެ ޖެހި ބޯޅަ ދަނޑީގައި ޖެހިފައި ނުކުތް ވަގުތު އެ ޓީމުގެ ފުލްބެކް، ރަފީނިއާ ޖެހި ރީބައުންސް ބޯޅަ އަމާޒުވީ ގޯލުގެ ދަނޑިއަށެވެ.
ފުރަތަަމަ ހާފުގައި ބާސެލޯނާގެ ރޮބަޓް ލެވަންޑޯސްކީ ބޮލުން ޖެހި ބޯޅަ ގެޓަފޭ ކީޕަރު ޑޭވިޑް ސޮރިއާ ވަނީ އަތަށް ނަގައިފަ އެވެ.
ދެ ވަނަ ހާފުގެ ކުރީކޮޅުގައި ބާސެލޯނާގެ ޖޯޑީ އަލްބާ ނެގި ހުރަހަކަށް އަރައި ލެވަންޑޯސްކީ ބޮލުން ޖެހި ބޯޅަ ދިޔައީ ދަނޑިކައިރިން ބޭރުންނެވެ. މެޗުގެ 75 ވަނަ މިނިޓްގައި އޭރިއާބޭރުން ރަފީނިއާ ޖެހި ބޯޅަ ވެސް ކީޕަރު ސޮރިއާ ވަނީ ހުއްޓުވައިފަ އެވެ.
މެޗު ނިމެން ތިން މިނިޓަށް ވެފައި ހުއްޓައި، ކައުންޓަ އެޓޭކުގައި ގެޓަފޭ އަށް މޮޅުވާން ރަނުގެ ފުރުސަތެއް ލިބިގެންދިޔަ އެވެ. އެ ގޮތުން، އޭރިއާތެރެއިން ގެޓަފޭގެ ބޯހާ މަޔޮރާލް ޖެހި ބޯޅަ ދިޔައީ ދަނޑިކައިރިން ބޭރުންނެވެ.
