ލަންޑަން (ޖެނުއަރީ 15) - ޔޫކްރެއިންގެ ޝަކްޓާ ޑޮނެސްކަށް ކުޅެމުން އައި ވިންގް، މިކައިލޯ މުޑްރިކް، ގެންދަން މަސައްކަތް ކުރަމުން އައި އާސެނަލްގެ ޑީލް ހައިޖެކްކޮށް، ޗެލްސީން ޖުމްލަ އެކު، 108 މިލިއަން ޑޮލަރު ދައްކަން ޖެހޭ އެއްބަސްވުމެއްގެ ދަށުން މުޑްރިޑްގެ ސޮއި ހޯދައިފި އެވެ.
އެކަމަކު، ޗެލްސީން މުޑްރިކް ގަންނަން މަޝްވަރާތައް ފެށިތާ މާގިނަ ދުވަހެއް ނުވެ، އެ ޑީލް ނިންމީ އެވެ. އެއީ އެންމެ ފުރަތަމަ 70 މިލިއަން ޑޮލަރު ދިނުމަށް ފަހު، ބާކީ 38 މިލިއަން ޑޮލަރު، އެކި ފަހަރު މަތިން ބަހާލައިގެން ދޭ ގޮތަށެވެ.
މުޑްރިކް ވަނީ ޗެލްސީއާ އެކު އަށް އަހަރުގެ ކޮންޓްރެކްޓެއްގައި ސޮއިކޮށްފަ އެވެ. އިނގިރޭސި ޕްރިމިއާ ލީގުގައި މިރޭ ކްރިސްޓަލް ޕެލަސް އަތުން 1-0 ޗެލްސީ މޮޅުވި މެޗު ބަލަން މުޑްރިކް ވަނީ ދަނޑަށް ގޮސްފަ އެވެ. މި މެޗުގެ ދެ ހާފުގެ ދެމެދުގައި ޗެލްސީގެ ކުޅުންތެރިއެއްގެ ގޮތުގައި ޓީމުގެ ސަޕޯޓަރުންނަށް މުޑްރިކް ތައާރަފުކުރުން އޮތެވެ.
"ޗެލްސީ އަށް ސޮއިކުރެވުނީތީ އަހަރެން މި ހުރީ ވަރަށް އުފަލުން. (ޗެލްސީ) މިއީ ވަރަށް ބޮޑު ކްލަބެއް. ޕްރިމިއާ ލީގަކީ ވަރަށް ގަޔާވާ ލީގެއް. މިއީ އަހަރެންގެ ކެރިއަރުގެ މި ހިސާބުގައި އަހަރެން ވަރަށް ގަޔާވާ ޕްރޮޖެކްޓެއް،" މުޑްރިކް ބުންޏެވެ.
މުޑްރިކް ޗެލްސީގެ ދަނޑުގައި އެ ޓީމުގެ ކުޅުންތެރިއެއްގެ ގޮތުގައި ތައާރަފްކުރަނީ.
މުޑްރިކް ވަނީ ޝަކްޓާ ފުރަތަމަ ޓީމަށް 44 މެޗުން 12 ގޯލު ޖަހައިދީފަ އެވެ.
ޗެލްސީގެ ކޯޗު ގްރަހަމް ޕޮޓާ ބުނީ މުޑްރިކް އަކީ ކުރިއަށް އޮތް ގިނަ އަހަރުތަކެއްގައި ޗެލްސީ އަށް ބޭނުންކުރެވޭނެ ވަރަށް ކުރިއެރުން ހޯދޭނެ ފެންވަރު ހުރި ކުޅުންތެރިއެއް ކަމަށެވެ.
މުޑްރިކް ހޯދަން މަސައްކަތް ކުރި އާސެނަލަށް އެ ޑީލް ނުނިންމުމާ ބެހޭގޮތުން، އެ ޓީމުގެ ކޯޗު މިކޭލް އާޓެޓާއާ ސުވާލުކުރުމުން ބުނީ، މި ވަގުތު އާސެނަލްގައި ތިބި ކުޅުންތެރިންނާ މެދު ހިތްހަމަޖެހޭ ކަމަށާއި ޓީމު ކުރިއަރުވަން ދެން ގެންނަން ޖެހޭ ކުޅުންތެރިން ހޯދުމުގެ މަސައްކަތް އަބަަދުވެސް ކުރަމުން އަންނަ ކަމަށެވެ. އަދި ވަކި ކުޅުންތެރިއަކު ނުލިބުމަކީ "ހުރިހާ ކަމެއްގެ ނިމުމެއް ނޫން" ކަމަށް އާޓެޓާ ވަނީީ ބުނެފަ އެވެ.
ޖެނުއަރީ ޓްރާންސްފާ މާކެޓްގައި އެންމެ އެކްޓިވްކޮށް ފެންނަނީ ޗެލްސީ އެވެ. އެ ޓީމުން ވަނީ މި ފަހަރުގެ ޓްރާންސްފާގައި އެކަނި ވެސް ފަސް ކުޅުންތެރިއަކު ގެނެސްފަ އެވެ.
މުޑްރިކްގެ ކުރިން ޗެލްސީން ގެނައީ އައިވަރީ ކޯސްޓްގެ ފޯވާޑް، ޑޭވިޑް ޑަޓްރޯ ފޮފާނާ، މޮނާކޯ އިން ގަތް ފްރާންސްގެ ޑިފެންޑަރު، ބެނޮއިޓް ބާޑިއަޝިލް، ބްރެޒިލްގެ ވަސްކޮޑަ ގަމާ އިން ގަތް ބްރެޒިލްގެ މިޑްފީލްޑަރު އަންދްރޭ ސަންޓޯސް އަދި ހަ މަސް ދުވަހުގެ ލޯން އެއްބަސްވުމެއްގެ ދަށުން އެތުލެޓިކޯ މެޑްރިޑުން ގެނައި، ޔާއޯ ފެލިކްސް އެވެ.
