ލަންޑަން (ސެޕްޓެމްބަރު 7) - ޗެމްޕިއަންސް ލީގުގައި ރޭ ކްރޮއޭޝިއާގެ ޑިނަމޯ ޒަގްރެބް އަތުން ޗެލްސީ ބަލިވުމާ އެކު، އެ ޓީމުގެ ކޯޗުކަމުން ތޯމަސް ޓުޗެލް ވަކިކޮށްފި އެވެ.
ޗެލްސީން މި ގޮތަށް ނިންމީ ރޭ އެ ކްލަބްގެ ބޯޑު މެމްބަރުންގެ ބައްދަލުވުމެއްގައި ކްލަބްގެ ވެރިޔާ، އެމެރިކާގެ މަހުޖަނު ޓޮޑް ބޯލީގެ ހުށަހެޅުން ގަބޫލުކުރަން ބޯޑު މެމްބަރުންގެ މެޖޯރިޓީން ތާއީދުކުރުމުން ކަމަށް އެމެރިކާގެ މީޑިއާ ރިޕޯޓްތައް ބުނެ އެވެ.
މި ސީޒަންގެ ޗެމްޕިއަންސް ލީގުގައި ޗެލްސީ ކުޅުުނު ފުރަތަމަ މެޗުގައި ރޭ ޑީނަމޯ ޒަގްރެބް އަތުން ރަށުން ބޭރުގައި ބަލިވީ 1-0 އިންނެވެ. ކުރިން ޕީއެސްޖީ އާއި ބޮރޫޝިއާ ޑޯޓްމަންޑްގެ ކޯޗުކަން ކުރި ޓުޗެލް ،49، ޗެލްސީގައި ހޭދަކުރީ 20 މަސް ދުވަހެވެ.
ޗެެލްސީން ނެރުނު ބަޔާނެއްގައި ބުނެފައިވަނީ ޗެލްސީގެ ކޯޗު ބަދަލުކުރުމަށް މިއީ "އެންމެ ރަނގަޅު ވަގުތު" ކަމަށް ކްލަބުގެ ވެރިންނަށް ގަބޫލްކުރެވޭ ކަމަށެވެ.
އިނގިރޭސި ލީގުގައި ޗެލްސީ އެންމެ ފަހުން ކުޅުނު 16 މެޗުގެ ތެރެއިން މޮޅުވެފައިވަނީ އެންމެ ހަތް މެޗުންނެވެ. މި ސީޒަންގައި ޗެލްސީ ލީގުގައި ކުޅުނު ހަ މެޗުގެ ތެރެއިން ދެ މެޗުން ވަނީ ބަލިވެފަ އެވެ.
ޕީއެސްޖީގެ ކޯޗުކަމުން ވަކިކޮށްފައި ހުއްޓައި، ޗެލްސީގެ ކޯޗުކަމާ ޓުޗެލް ހަވާލުވީ 2021 ވަނަ އަހަރުގެ ޖެނުއަރީ މަހު އެވެ. އޭގެ ހަތަރު މަސް ފަހުން ޗެލްސީ ވަނީ ޗެމްޕިއަންސް ލީގުގެ ތަށި އުފުލާލައިފަ އެވެ. އަދި އޭގެ ފަހުން ޓުޗެލްގެ އިރުޝާދުގެ ދަށުން ޗެލްސީން ވަނީ ފީފާ ކްލަބް ވޯލްޑް ކަޕާއި ޔުއޭފާ ސުޕަ ކަޕް ކާމިޔާބުކޮށްފަ އެވެ. އެކަމަކު، މިދިޔަ ސީޒަނުގައި އެފްއޭ ކަޕާއި ލީގު ކަޕް ފައިނަލުން ވީ ބައްޔެވެ.
"ޗެމްޕިއަންސް ލީގާއި ޔުއެފާ ސުޕަ ކަޕް އަދި ފީފާ ކްލަބް ވޯލްޑް ކަޕް ކާމިޔާބުކޮށްފައިވާ ޓުޗެލް އަށް މި ކްލަބުގެ ތާރީހުން ހައްގުވާ މަގާމު ލިބޭނެ،" ޗެލްސީގެ ބަޔާނުގައި ބުނެފައިވެ އެވެ.
ޗެލްސީގެ ކޯޗުގެ ޒިންމާތަކާ ވަގުތީ ގޮތުން ހަވާލުވާނީ ޓުޗެލްގެ ކޯޗިން ސްޓާފުގައި ހިމެނޭ ކޯޗުންތަކެވެ.
ކުރިން މައިންޒާއި ޑޯޓްމަންޑަށް ވެސް ކޯޗުކޮށްދިން ޓުޗެލްގެ ކޯޗުކަމުގައި މި ސީޒަނުގައި ޗެލްސީން ވަނީ ޓްރާންސްފާ މާކެޓްގައި 291 މިލިއަން ޑޮލަރު ހަރަދުކޮށްފަ އެވެ. އެކަމަކު، އެ ވަރުގެ އިންވެސްޓްމަންޓަކަށް ފަހު ޗެލްސީގެ ނަތީޖާތަށް އެކަށީގެންވާ ގޮތަށް ނުދާތީ ޗެލްސީގެ ވެރިން ނިންމީ ޓުޗެލް ވަކިކުރާށެވެ.
އާ ކޯޗެއް ހޯދުމުގެ މަސައްކަތް ޗެލްސީން ކުރަމުން އަންނައިރު، އެ ޓީމުން މި ވަގުތު އެންމެ ބޮޑަށް ބޭނުންވަނީ ބްރައިޓަންގެ ކޯޗު ގްރަހަމް ޕޮޓާ އެވެ. އެކަމަކު، އޭނާ ނުލިބިއްޖެނަމަ ކުރިން ސައުތެމްޓަނާއި ޓޮޓެންހަމް އަދި ޕީއެސްޖީ އަށް ކޯޗުކޮށްދިން މައުރީސިއޯ ޕޮޗެޓީނޯ ނޫނީ ރެއާލް މެޑްރިޑަށް ތިން ޗެމްޕިއަންސް ލީގު ކާމިޔާބު ކޮށްދިން ޒިނެދިން ޒިދާނަށް ހުށަހަޅާނެ ކަމަށް ރިޕޯޓްތައް ބުނެ އެވެ.
ޓުޗެލް އަކީ މި ފަހަރުގެ އިނގިރޭސި ޕްރިމިއާ ލީގު ފެށި ފަހުން ވަޒީފާ ގެއްލުނު ދެ ވަނަ ކޯޗެވެ. މީގެ ކުރިން ބޯންމައުތުން ވަނީ އެ ޓީމުގެ ކޯޗަކަށް ހުރި ސްކޮޓް ޕާކާ މަގާމުން ދުރުކޮށްފަ އެވެ.
