ލަންޑަން (އޮގަސްޓް 19) - ޗެލްސީގެ ސަޕޯޓަރަކު ޓޮޓެންހަމް ހޮޓްސްޕާސްގެ ފޯވާޑް ސޮން ހެއުން މިންއާ ނަސްލީ ގޮތުން ދިމާކުރި މައްސަަލައެއް ބަލަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
މިދިިޔަ އާދިއްތަ ދުވަހު، އިނގިރޭސި ޕްރިމިއާ ލީގުގައި ޗެލްސީ ދަނޑުގައި 2-2 އިން ޓޮޓެންހަމާ އެއްވަރުވި މެޗުގައި ޗެލްސީގެ ސަޕޯޓަރަކު، ސޮންއާ ނަސްލީ ގޮތުން ދިމާކުރި މައްސަލަ ފެންމަތިވީ މީގެ ދެ ދުވަހެއް ކުރިންނެވެ. އެ މެޗުގައި އެ ހާދިސާ ހިނގައިދިޔަ، އެ މަންޒަރު ދައްކުވައިދޭ ފޮޓޯއެއް ވެސް ސޯޝަލް މީޑިއާގައި އަންނަނީ ދައުރު ވަމުންނެވެ.
ޗެލްސީން ވަނީ ސޮންއާ ނަސްލީ ގޮތުން ދިމާކުރި މި މައްސަލައިގައި އެ ކްލަބްގެ ސަޕޯޓަރެއް ހޯދުމުގެ މަސައްކަތް ކުރަމުން އަންނަ ކަމަށް ބުނެފަ އެވެ. އަދި ނަސްލީ ގޮތުން ދިމާކުރުން ފަދަ ސީރިއަސް ކަންކަމުގައި އެ ކްލަބުން އަމަލުކުރަނީ "ޒީރޯ ޓޮލަރަންސް" އުސޫލުން ކަމަށާއި އެންމެ ހަރުކަށި އަދަބު ދޭނެ ކަމަށް ވެސް ޗެލްސީން ވަނީ ބުނެފަ އެވެ.
މީގެ ކުރިން ވެސް ޗެލްސީން ވަނީ އެ ކްލަބްގެ ސަޕޯޓަރުންގެ ތެރެއިން ނަސްލީ ގޮތުން ދިމާކުރުމުގެ މައްސަލަ ސާބިތުވާ ސަޕޯޓަރުންނަށް ފިޔަވަޅު އަޅައިފަ އެވެ.
އެ ގޮތުން އާންމު ގޮތެއްގައި ސަޕޯޓަރުންނަށް ދެނީ ސީޒަނެއްގެ ސަސްޕެންޝަނެއް ނޫނީ މުޅި އުމުރަށް ޗެލްސީގެ މެޗެއް ބަލަން ދަނޑަށް ނުވަދެވޭ ގޮތަށް އަދަބު ދިނުމެވެ.
މި ފަހަރުގެ ޓްރާންސްފާގައި ޗެލްސީއާ ގުޅުނު އިނގިރޭސި ވިންގް، ރަހީމް ސްޓާލިން، 2019 ވަނަ އަހަރު މެންޗެސްޓާ ސިޓީ އަށް ކުޅުނުއިރު، ޗެލްސީ ދަނޑުގައި އޭނާއާ ނަސްލީ ގޮތުން ދިމާކޮށްލި އެވެ. އެ މައްސަލައިގައި ޗެލްސީގެ ގިނަ ސަޕޯޓަރުންތަކަކަށް ވަނީ އެކި ވަރުގެ އަދަބު ދީފަ އެވެ.
