ލަންޑަން (އޮގަސްޓް 15) - އިނގިރޭސި ޕްރިމިއާ ލީގުގައި ރޭ ޓޮޓެންހަމް ހޮޓްސްޕާސްއާ ދެކޮޅަށް ކުޅުނު މެޗުގައި އެ ޓީމުގެ ކޯޗު އެންޓޯނިއޯ ކޮންޓޭއާ ދެމެދުގައި ކަންތައްތަކެއް ހިނގީ މެޗުގެ އޮއެވަރު ދިޔަ ގޮތުން ޖަޒުބާތުގައި ޖެހިގެން ކަމަށް ޗެލްސީގެ ކޯޗު ތޯމަސް ޓުޗެލް ބުނެފި އެވެ.
ޗެލްސީގެ ދަނޑު ސްޓެމްފޯޑް ބްރިޖުގައި ޓޮޓެންހަމާ 2-2 އިން އެއްވަރުވި މި މެޗުގައި ދެ ފަހަރެއްގެ މަތިން ޓުޗެލް އާއި ކޮންޓޭގެ އަރާރުމެއް ފެނިގެންދިޔަ އެވެ. އެ ގޮތުން އެންމެ ފުރަތަމަ ޓޮޓެންހަމުން 1-1 އިން އެއްވަރުކުރި ވަގުތުގައި ޓެކްނިކަލް އޭރިއާ ކައިރީގައި ކަންތައްތަކެއް ހިނގިއިރު، ދެން މެޗު ނިމިގެން ކޮންޓޭ އާއި ޓުޗެލް ސަލާމްކުރަން ކައިރި ވަގުތުގައި ހިނގި ކަންތައްތަކެއްގެ ސަބަބުން ދެ ކޯޗުން ދުރުކުރީ ދެ ޓީމުގެ ކުޅުންތެރިންނާ ސްޓާފުން އެއް ވެގެންނެވެ.
މެޗަށް ފަހު ޓުޗެލް ބުނީ ސީޒަންގެ ކުރީކޮޅުގައި މި ފަދަ މެޗެއް ފެންނާނީ މަދު ފަހަރަކު ކަމަށާއި ހޫނު ގަދަ ދުވަހެއްގައި ކުޅުނު މި މެޗުގައި ފެނިގެންދިޔަ ކަންތައްތަކަކީ ވާދަވެރި މާހައުލެއްގައި ފެންނާނެ ހުރިހާ ކަމެއް ކަމަށެވެ.
"މިކަންކަން ހިނގާފައި މި އޮތީ މެޗުގެ އޮއެވަރު ދިޔަ ގޮތުން. ވީއޭއާރްގެ ޒަމާނެއްގައި ބަލައިގަންނަން ނުޖެހޭ ދެ ގޯލު ޓޮޓެންހަމުން ޖަހާފައި އެ އޮތީ. ފުރަތަމަ ގޯލުގައި ޖެހިއިރު، ކައި އަށް ފައުލުކޮށްފައި އޮތީ، ދެން ދެ ވަނަ ގޯލު ޖެހިއިރު، ރިޗާލިސަން އޮތީ އޮފްސައިޑްގައި، ދެން، އަހަންނަށް ނޭނގޭ ފުޓްބޯޅަ ދަނޑުގައި ބޮލުގެ އިސްތަށިގަނޑުގައި ހިފުން ހުއްދަވެފައި އޮތް ގޮތެއް،" ޓުޗެލް ބުންޏެވެ.
ޓޮޓެންހަމް އިން 68 ވަނަ މިނިޓްގައި ހޮއިބިއާ ގޯލު ޖެހިއިރު، ޗެލްސީގެ ކައި ހަވާޓްޒް އަށް ޓޮޓެންހަމްގެ ރޮޑްރީގޯ ބެންޓަންކޫރު ފައުލުކުރި ކަމަށް ޗެލްސީން އެޕީލްކުރި އެވެ. އަދި އިތުރު ވަގުތުގެ ހަ ވަނަ މިނިޓްގައި ހެރީ ކޭން ޓޮޓެންހަމަށް އެއްވަރުކޮށްދިން ގޯލު ޖެހިއިރު، ޓޮޓެންހަމްގެ ޑިފެންޑަރު ރޮމޭރޯ ވަނީ ޗެލްސީގެ ފުލްބެކް، މާކް ކުކުރޭލާ އިސްތަށިގަނޑުގައި ހިފަހަައްޓައި އޭނާ އަށް ހުރަސް އަޅައިފަ އެވެ.
ވީއޭއާރް އިން ބަލާފައި ވެސް މީގެއިން އެއްވެސް ހާލަތެއްގައި ނިންމުން އައީ ޗެލްސީއާ އެއްކޮޅަކަށް ނޫނެވެ.
ފާއިތުވި އަހަރުތަކުގައި ޗެލްސީގެ ސަޕޯޓަރުން ވަނީ އެ ޓީމުގެ މެޗުތަކަށް ރެފްރީ، އެންތަނީ ޓޭލާ އަރައިފިނަމަ ގިނަ ނިންމުންތައް ދަނީ ޗެލްސީއާ ދެކޮޅަށް ކަމަށް ބުނެ، އޭނާ ޗެލްސީ މެޗުތަކަށް ނާރުވަން އަޑުއުފުލައިފަ އެވެ. ރޭގެ މެޗުގައި ވެސް ޓޭލާގެ ގިނަ ނިންމުންތައް ހުރީ ޓޮޓެންހަމް ކޮޅަށް ކަމަށް ޗެލްސީން ބުނަމުންދާއިރު، ޓުޗެލް ބުނީ ސަޕޯޓަރުންނެކޭ އެއްގޮތަށް ޗެލްސީ ކުޅުންތެރިން ވެސް އެދެނީ ޓޭލާ އެ ޓީމުގެ މެޗުތަކަށް ނޭރުމަށެވެ.
ޓުޗެލްއާ ދެމެދު ހިނގި ކަންތައްތަކާ ބެހޭގޮތުން ކޮންޓޭ ބުނީ އެއީ މީޑިއާގައި އޭނާ ދައްކަން ބޭނުންވާ ވާހަކަތަކެއް ނޫން ކަމަށެވެ. އެކަމަކު، ކޮންޓޭ ވަނީ ފަހުން އޭނާގެ ސޯޝަލް މީޑިއާގައި މަޖާޒީ ގޮތަކަށް އޭނާ އާއި ޓުޗެލްގެ ފޮޓޯއެއް ހިއްސާކޮށްފަ އެވެ.
