ލަންޑަން (އޮގަސްޓް 14) - ފަހު ވަގުތު ޓޮޓެންހަމް ހޮޓްސްޕާސްގެ ހެރީ ކޭން ޖެހި ގޯލާ އެކު، އިނގިރޭސި ޕްރިމިއާ ލީގުގައި މިރޭ ޗެލްސީ އާއި ޓޮޓެންހަމް 2-2 އިން އެއްވަރުވިއިރު، ދެ ޓީމުގެ ކޯޗުން ކަމަށްވާ އެންޓޯނިއޯ ކޮންޓޭ އާއި ތޯމަސް ޓުޗެލްގެ ދެމެދުގައި އަރާރުމެއް ހިނގައި ދެ ކޯޗުންނަށް ރަތް ކާޑު ދައްކައިފި އެވެ.
ޗެލްސީން މި މެޗުގައި ލީޑުނެގީ 19 ވަނަ މިނިޓްގައި ކަލީދޫ ކުލިބާލީ ޖެހި ގޯލުންނެވެ. މާކް ކުކުރޭލާ ނެގި ކޯނަރަކުން އޭރިއާތެރެއިން ކުލިބާލީ އަށް ލިބުނު ބޯޅަ އޭނާ ވަނީ ވޮލީ އަކުން ގޯލުގެ ތެރެއަށް ބޯޅަ ފޮނުވާލައިފަ އެވެ. ޓޮޓެންހަމް އިން ނަތީޖާ ހަމަހަމަކުރީ މެޗުގެ 68 މިނިޓްގައި ޕިއޭ އެމީލް ހޮއިބިއާ ޖެހި ގޯލުންނެވެ. އޭރިއާ ރޮނގުކައިރިން ހޮއިބިއާ ތިރިތިރިން ޖެހި ބޯޅަ އަމާޒުވީ ގޯލުގެ ތިރީ ކަަނަށެެވެ. އެ އެޓޭކް ފެށިިއިރު، ޗެލްސީގެ ކައި ހަވާޓްޒް އަށް ޓޮޓެންހަމްގެ ރޮޑްރީގޯ ބެންޓަންކޫރު ފައުލުކުރި ކަމަށް ބުނެ، ޗެލްސީން ވަރަށް ބޮޑަށް އެޕީލްކުރި އެވެ.
ގޯލު ޖެހި ފަހުން، ކޮންޓޭ ވަނީ އުފާފާޅުކުރުމުގެ ތެރެއިން ޗެލްސީ ބެންޗާ ދިމާލަށް ގޮސްފަ އެވެ. އެ ވަގުުތު ޓުޗެލް ވެސް ކޮންޓޭއާ ދިމާލަށް އައުމުން، މެޗުގެ ރެފްރީ ވަނީ ދެ ކޯޗުންނަށް ރީނދޫ ކާޑު ދައްކައިފަ އެވެ.
ޓޮޓެންހަމްގެ ކޭން މެޗުގެ ފަހު ވަގުތުގައި ޗެލްސީ ކޮޅަށް ގޯލު ޖަހަނީ.
މެޗުގައި ދެ ވަނަ ފަަހަރަށް ވެސް ލީޑުނެގީ ޗެލްސީންނެވެ. އެ ޓީމަށް މި ގޯލު ޖަހައިދިނީ 77 ވަނަ މިނިޓްގައި ރީސް ޖޭމްސް އެވެ. ރަހީމް ސްޓާލިން ދިން ބޯޅަ އޭރިއާތެރެއިން ހަމަޖެހިލާފައި ޖޭމްސް ވަނީ ގޯލުގެ ތެރެއަށް ފޮނުވާލައިފަ އެވެ.
ޗެލްސީ މޮޅުވާނެ ކަމަށް ނިންމައިގެން ހުއްޓައި، ޓޮޓެންހަމް އިން އެއްވަރުކުރީ އިތުރު ވަގުތުގެ ހަ ވަނަ މިނިޓްގަ އެވެ. އިވާން ޕެރިސިޗް ނެގި ކޯނަރަކުން ހެރީ ކޭން ވަނީ ބޮލުން ގޯލުގެ ތެރެއަށް ބޯޅަ ފޮނުވާލައިފަ އެޗެ.
މެޗުގެ ފަހު ކަށިގަނޑަށް ފަހު ޗެލްސީގެ ކޯޗު ޓުޗެލް އާއި ޓޮޓެންހަމްގެ ކޯޗު ކޮންޓޭ ސަލާމްކުރަން ގާތްވި ވަގުތު ދެ ކޯޗުންގެ މެދުގައި އަރާރުމެއް ހިނގައި، ދެ ކޯޗުން ދުރުކުރަން ޖެހުނީ ދެ ޓީމުގެ ކުޅުންތެރިންނާއި އޮފިޝަލުން ވެގެންނެވެ. އެ ވަގުތު މެޗުގެ ރެފްރީ ވަނީ ދެ ކޯޗުންނަށް ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ.
ޕްރިމިއާ ލީގުގައި މިރޭ ނޮޓިންހަމް ފޮރެސްޓުން ވަނީ 1-0 އިން ވެސްޓް ހޭމް ޔުނައިޓެޑް ބަލިކޮށްފަ އެވެ. ނޮޓިންހަމްގެ ޓައިވޯ އަވޯނިޔީގެ ގޯލުން އެ ޓީމު މޮޅުވި މި މެޗުގައި، ވެސްޓް ހޭމްގެ ޑެކްލަން ރައިސް ޖެހި ޕެނަލްޓީއެއް ނޮޓިންހަމްގެ ގޯލުގައިހުރި ޑީން ހެންޑަސަން ވަނީ މަތަކޮށްފަ އެވެ. ދެ ފަހަރު ޔޫރަޕްގެ ޗެމްޕިއަންކަން ހޯދާފައިވާ ނޮޓިންހަމް އިން 23 އަހަރު ފަހުން ޕްރިމިއާ ލީގުގައި ކުޅޭއިރު، މިއީ އެ ޓީމުން އެނބުރި ޕްރިމިއާ ލީގަށް އައި ފަހުން ހޯދި ފުރަތަމަ މޮޅެެވެ.
