އެފްއޭ ކަޕް ފުޓްބޯޅަ މުބާރާތުގެ ކުއާޓާ ފައިނަލުގައި މިރޭ ދަ ގްރާންޑޭ ސްޕޯޓްސް ކްލަބް 2-1 އިން ބަލިކޮށް ކްލަބް ވެލެންސިއާ އިން މުބާރާތުގެ ސެމީ ފައިނަލުން ޖާގަ ހޯދައިފި އެވެ.
އަންނަ ބުރާސްފަތި ދުވަހުގެރޭ ކުޅޭ ސެމީ ފައިނަލް މެޗުގައި ވެލެންސިއާއާ ދެކޮޅަށް ކުޅޭނެ ޓީމެއް އެނގޭނީ ކުއާޓާ ފައިނަލްގެ ފަހު މެޗަށް ފަހު އެވެ. ކުއާޓާ ފައިނަލްގެ ފަހު މެޗުގައި ހޯމަ ދުވަހުގެރޭ ކްލަބް އީގަލްސް އިން ސުޕަ ޔުނައިޓެޑް ސްޕޯޓްސް (ސަސް)އާ ކުޅޭނެ އެވެ. ސަސް އިން ކުއާޓާގެ ޖާގަ ހޯދީ ފުރަތަމަ ބުރުގައި ބިސް ބުރު ސްޕޯޓްސް ކްލަބް އަތުން 10 ގޯލުން މޮޅުވެގެންނެވެ.
ގަލޮޅު ދަނޑުގައި މިރޭ ކުޅުނު މެޗުގެ 14 ވަނަ މިނިޓްގައި ވެލެންސިއާ އަށް ލީޑުނަގައިިދިނީ އަސްހަދު އަލީ (އަޑުބަރޭ) އެވެ. މިއީ އަބްދުﷲ ޔާމީން (ޔާނު) ދިން ބޯޅައެއް ހިފައިގެން އޭރިއާތެރެއަށް ވަދެ އަޑުބަރޭ ފުރަތަމަ އެ ޓީމު އެހެން ކުޅުންތެރިއަކަށް ދޭން ޖައްސާލި ބޯޅަ ދަ ގްރާންޑޭ ކުޅުންތެރިއަކު ފައިގައި ޖެހިފައި އަލުން އަޑުބަރޭ އަށް ލިބުމުން ޖެހި ގޯލެކެވެ.
އޭގެ ހަތަރު މިނިޓް ފަހުން، ވެލެންސިއާގެ ލީޑުފުޅާކޮށްދިނީ ޓީމުގެ ކެޕްޓަން، ހަސަން ސުފިއާނު (ސޫފީ) އެވެ. މެޗުގެ 18 ވަނަ މިނިޓްގައި ވެލެންސިއާގެ މުހައްމަދު އުމެއިރު ކޯނަރަކުން ނެގި ބޯޅަ ދަ ގްރާންޑޭގެ ލެބަނަން ކީޕަރު މުހައްމަދު ތަހާ އަތުން ޖައްސާލި ބޯޅަ ލިބުނީ އޭރިއާތެރެއިން ސޫފީ އަށެވެ. އޭނާ އެއް ފަހަރުން ފޮނުވާލި ބޯޅަ ދަ ގްރާންޑޭގެ ޑިފެންޑަރުންގެ ތެރެއިން ގޮސް އަމާޒުވީ ގޯލުގެ ދާގަނޑަށެވެ.
ގްރާންޑޭގެ ނައުފަލް (ކ) ކައިރިން ވެލެންސިއާގެ އަޑުބަރޭ ބޯޅަ ހިފައިގެންދަނީ.--- ފޮޓޯ: އިމޭޖަސް.އެމްވީ
ދެ ވަނަ ހާފްގެ ކުޅުން ފެށިގެން 10 މިނިޓް ތެރޭ ދަ ގްރާންޑޭގެ އާޖެންޓީނާ ފޯވާޑް ހޫގޯ ނިކޮލަސް ވަނީ ގޯލެއް ޖަހައިފަ އެވެ. ކޯނަރެއްގައި އޭރިއާތެރެއަށް ހުރަސްވި ބޯޅަ ހޫގޯ ބޮލުން ފޮނުވާލުމުން ގޯލަށް ބޯޅަ ވަނީ ވެލެންސިއާގެ ގޯލުގައި ހުރި އާދަމް އިމްއާން އަތުގައި ޖެހިފަ އެވެ. ގްރާންޑޭ އިން މެޗުގެ ބާކީ ބައިގައި އިތުރު ގޯލެއް ޖެހެތޯ ގްރާންޑޭ އިން ކުރި މަސައްކަތުގައި މެޗުގެ އިތުރު ވަގުތުގައި އެ ޓީމަށް ކުޅޭ ކޮލަމްބިއާގެ ޑިފެންޑަރު، ޖޯޖް އިވާން ސައިސޭޑޯ ވެއްޓިގެންފައި ޖަހަން އުޅުނު ބޯޅަ ފައިގައި ރަނގަޅަށް ލައްވާލާ ގޮތެއްނުވި އެވެ.
މިއީ މި ސީޒަނުގައި ދަ ގްރާންޑޭ އަތުން ވެލެންސިއާ ހޯދި ފަސް ވަނަ މޮޅެވެ. އެއީ ލީގުގެ ތިން މެޗާއި ޕްރެޒިޑެންޓްސް ކަޕް އަދި އެފްއޭ ކަޕްގަ އެވެ. މި ސީޒަނުގެ ޕްރެޒިޑެންޓްސް ކަޕްގެ ޗެމްޕިއަންކަން ހޯދި ވެލެންސިއާ އަކީ މި ވަގުތު މުބާރާތުގައި އޮތް ޓީމުތަކުގެ ތެރެއިން އެންމެ ފަހުން މި މުބާރާތް ކާމިޔާބުކުރި ޓީީމެވެ. ވެލެންސިއާ އިން 2016 ވަނަ އަހަރު އެފްއޭ ކަޕް ކާމިޔާބުކުރީ ޓީސީ ސްޕޯޓްސް ކްލަބް ފައިނަލުގައި ބަލިކުރުމަށް ފަހު އެވެ. އޭޖެ ޖެހިގެން އައި ފަހަރު ޓީސީ ބަލިކޮށް ނިއު ރޭޑިއަންޓުން އެފްއޭ ކަޕް ކާމިޔާބުކުރި އެވެ. އެ އަހަރަށް ފަހު، އެފްއޭ ކަޕް އެއްކޮށް ފުރިހަމަކޮށްފައެއް ނުވެ އެވެ.
މިރޭގެ މެޗާ އެކު ދަ ގްރާންޑޭ އިން ދެން ތައްޔާރުވާނީ އަންނަ ސީޒަނުގައި ފުރަތަމަ ޑިވިޝަންގެ ޖާގަ ކަށަވަރުކުރަން ކުޅޭ ރެލިގޭޝަން ބުރަށެވެ. އެ ބުރުގައި ސަސް އާއި ގްރާންޑޭ ކުޅެން ޖެހޭނީ ދެ ވަނަ ޑިވިޝަނުގެ ޗެމްޕިއަނާއި ރަނަރަޕާ އެވެ.
