މިހާރު ކުރިއަށްދާ މޯލްޑިވްސް ޕްރޯގެ ޖޫނިއާ ބައިގެ ފައިނަލުން ރާއްޖޭގެ އާމިން މޫސާ ޖާގަ ހޯދައިފި އެވެ.
ވިޒިޓް މޯލްޑިވްސް ޕްރޯގެ މިއަދުގެ ހީޓުތައް ފަށާފައިވަނީ ޖޫނިއާ ބައިގެ ސެމީ ފައިނަލް ހީޓުތަކާއިއެކުގަ އެވެ. ސެމީ ފައިނަލު ހީޓުތައް ކާމިޔާބުކޮށް ފައިނަލުން ޖާގަ ހޯދީ އާމިން މޫސާ އާއި ކެނެރީ އައިލެންޑްސްގެ ގެބްރިއެލް މޮލީނާ އެވެ.
ސެމީ ފައިނަލު ފުރަތަމަ ހީޓުގައި ވާދަކުރީ ރާއްޖޭގެ ޒުވާން ދެ ބޯޑަރުންކަމަށްވާ އާމިން މޫސާ އާއި ޝިމާލް ޝަމީމް (ޝިމައްލެ) އެވެ. މި ހީޓު އާމިން ކާމިޔާބުކުރީ 7.50ގެ ޖުމްލަ ސްކޯ އެއް ހޯދައިގެންނެވެ. ރާއްޖޭގެ ޖޫނިއާ ޗެމްޕިއަން ޝިމައްލެ އަށް ލިބުނީ 7.00ގެ ސްކޯ އެކެވެ.
ރާއްޖޭގެ އާމިން ޖޫނިއާ ބައިގެ ފައިނަލަށް ދިޔުމުން އޭނާގެ ކޮއްކޮ އިޔާން އާމިން އަށް މަރުޚަބާ ކިޔަނީ / ފޮޓޯ: އަދަދު
މި ހީޓުގެ ކުރީކޮޅު އާމިން ލީޑުގައި އޮތް ނަމަވެސް ފަހު 10 މިނެޓަށް ދިޔައިރު ޝިމައްލެ އެޅި ރާޅުން ހޯދި ސްކޯއާއިއެކު އޭނާ ކުރިއަށް ޖެހިލި އެވެ. އާމިން ފައިނަލަށް ދިޔައީ އެންމެ ފަހު މިނެޓުގައި ލިބުނު ރާޅުން ހޯދި ސްކޯއާ އެކުގަ އެވެ.
ފައިނަލުގައި އާމިން އާ ދެކޮޅަށް ނުކުންނަ ގެބްރިއެލް ކުރި ހޯދީ ރާއްޖޭގެ ޖަރީޝް ޖިހާދުގެ މައްޗަށެވެ. ގެބްރިއެލް މި ހީޓުގައި 12.25ގެ ސްކޯ އެއް ހޯދިއިރު، ޖަރީޝް އަށް ލިބުނީ 3.05ގެ ސްކޯ އެކެވެ.
މުބާރާތުގައި މިއަދު ކުރިއަށް ހުރި ހީޓުތަކަށް ބަލާއިރު، ފިރިހެން އޯޕަން ބަޔާއި، އަންހެން އޯޕަން ބައި އަދި ޑްރޮޕް ނީ ކެޓަގަރީގެ ހީޓުތައްވެސް މިއަދު ކުރިއަށްދާނެ އެވެ.
