ދެ ވަނަ ޑިވިޝަން ފުޓްބޯޅަ މުބާރާތުގައި ރޭ ޓެންޓް ސްޕޯޓްސް ކްލަބް އަތުން 1-0 އިން މޮޅުވެ، ބުރު ސްޕޯޓްސް ކްލަބް މުބާރާތުގެ ސެމީ ފައިނަލްގެ ޖާގައެއް ކަށަވަރު ކުރުމާ ގާތަށް ޖެހިލައިފި އެވެ.
މި އަހަރުގެ ދެ ވަނަ ޑިވިޝަން މުބާރާތަށް އެންމެ ވަރުގަދަ އަށް ތައްޔާރުވި އެއް ޓީމު ކަމަށްވާ ބުރު ވަނީ ގުރޫޕް އެކެއްގައި މިހާތަނަށް ކުޅުނު ފަސް މެޗުން ވެސް މޮޅުވެފަ އެވެ. ބުރު ތާވަލްގެ އެއް ވަނައިގައި 15 ޕޮއިންޓާ އެކު އޮތްއިރު، އެ ޓީމުން ވަނީ ޖުމްލަ 18 ލަނޑު ޖަހައިފަ އެވެ. ބައިކޮޅަށް ވަނީ އެންމެ ދެ ލަނޑެވެ.
މި ގުރޫޕްގައި ބުރަށް ބާކީ ދެ މެޗު އޮތްއިރު، ސެމީ ފައިނަލްގެ ޖާގައެއް މުޅިން ކަށަވަރު ކުރުމަށް އެ ޓީމަށް ބޭނުންވަނީ އެންމެ ޕޮއިންޓެކެވެ.
ގަލޮޅު ދަނޑުގައި ރޭ ކުޅުނު މެޗުގައި ބުރުގެ ހަމައެކަނި ލަނޑު ދެ ވަނަ ހާފުގައި ޖެހީ ބްރެޒިލްގެ ޑިފެންޑަރު ބްރޫނޯ އަރަބަލް ޕަސަމާނީ އެވެ. ބުރަށް ލިބުނު ހިލޭޖެހުމަކުން އެ ޓީމުގެ ކުޅުންތެރިއެއް ޕެނަލްޓީ އޭރިޔާ ތެރެއަށް ހުރަސްކޮށްލި ބޯޅަ، ބްރޫނޯ ގޯލަށް އަމާޒުކޮށްލީ ބޮލުންނެވެ.
ކެޕިޓަލް ސިޓީ އާއި ޖޭޖޭ ސްޕޯޓްސް ކްލަބް ކުޅުނު މެޗުގެ ތެރެއިން.--- ފޮޓޯ: އިމޭޖަސް.އެމްވީ
މުބާރާތުގައި މިއަދު ހަވީރު ޖޭޖޭ ސްޕޯޓްސް ކްލަބް ވަނީ 6-0 އިން ކެޕިޓަލް ސިޓީ ސްޕޯޓްސް ކްލަބް ބަލިކޮށްފަ އެވެ.
މެޗުގައި އިތުރު ލަނޑުތަކެއް ޖެހުމަށް ބުރުން ގިނަ ފުރުސަތުތަކެއް ތަނަވަސްކުރި އެވެ. އެކަމަކު، އެ ޓީމަށް ލިބުނު ފުރުސަތުތަކުގެ ބޭނުމެއް ނުހިފުނެވެ. ކައުންޓާ އެޓޭކްގައި، ޓެންޓަށް ވެސް ފުރުސަތުތަކެއް ލިބުނެވެ. ހާއްސަކޮށް، މެޗުގެ ފަހުކޮޅު އެ ޓީމުން މެޗުގެ ނަތީޖާ އެއްވަރުކުރުމަށް ކުރިއަށް ޖެހި މަސައްކަތްކުރި އެވެ.
މި ގުރޫޕްގެ ދެ ވަނަގައި ކުޑަ ހެންވޭރު ޔުނައިޓަޑް އޮތީ ފަސް މެޗު ކުޅެގެން ލިބުނު ނުވަ ޕޮއިންޓާ އެކު އެވެ. މި ގުރޫޕްގައި ދެން އޮތް ޓެންޓާއި، ދިވެހި ސިފައިންގެ ކްލަބާއި ޖެޖޭ ސްޕޯޓްސް ކްލަބު އަދި ކްލަބު ޕީކޭ ވަނީ ހަ ޕޮއިންޓް ހޯދައިފަ އެވެ. މި ހަތަރު ޓީމަށް ވެސް ބާކީ ތިން މެޗު އެބައޮތެވެ.
ހަތް ވަނައިގައި އޮތީ ފަސް މެޗުން ނުވަ ޕޮއިންޓް ހޯދާފައިވާ ބިސް ބުރު ސްޕޯޓްސް ކްލަބެވެ. ތާވަލްގެ ފުލުގައި އޮތީ މިހާތަނަށް ކުޅުނު ފަސް މެޗުން ވެސް ބަލިވި ކެޕިޓަލް ސިޓީ ސްޕޯޓްސް އެވެ.
