އޭޝިއާ ސަރަހައްދުގައި ބާއްވާ ވޯލްޑް ޓުއާގެ ފުރަތަމަ މުބާރާތް ކަމަށްވާ "ވިޒިޓް މޯލްޑިވްސް ޕްރޯ 2022" ހުޅުވުމުގެ ރަސްމިއްޔާތު ބާއްވައިފި އެވެ.
ދުނިޔޭގެ އެކި ގައުމުތަކުން 150 އަށް ވުރެ ގިނަ ބޮޑީބޯޑަރުން ވާދަކުރާ އައިބީސީ ވޯލްޑް ޓޫއާގެ މުބާރާތުގެ ހުޅުވުމުގެ ރަސްމިއްޔާތު ޝަރަފްވެރިކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެވެ.
ބައިނަލްއަގްވާމީ ފެންވަރުގެ އެންމެ މަތީ ފަންތީގެ މުބާރާތާއި ގުޅޭގޮތުން މޯލްޑިވްސް ބޮޑީބޯޑިން އެސޯސިއޭޝަންގެ ޖެނެރަލް ސެކެޓްރީ ހަސަން ރަޝީދު (ރަޝް) ބުނީ މި މުބާރާތުގެ ސަބަބުން ރާއްޖެ ހުޅުވިގެންމިދަނީ ސާފް ޓުއަރިޒަމްގެ ބޮޑީބޯޑިންގެ އާ މާކެޓެއް ކަމަށާއި، މިއީ ރާއްޖޭގެ ބޮޑީބޯޑަރުން އަބަދުވެސް ދެކެމުން އަންނަ ހުވަފެނެއް ކަމަށެވެ.
މިއަދުގެ އިވެންޓްގެ ތެރެއިން ބޮޑީބޯޑިން އެސޯސިއޭޝަންގެ ޖެނެރަލް ސެކްރެޓަރީ ރަޝް ވާހަކަ ދައްކަނީ،--- ފޮޓޯ: މުހައްމަދު ޝާބިން/ އަދަދު
މި މުބާރާތް ރާއްޖެ ގެނައުމަށް އެމްބީބީއޭ އިން ކުރި މަސައްކަތް ކާމިޔާބުކޮށް މުބާރާތް ބޭއްވުމަށް މަގުފަހިކޮށްދެއްވުމުގައި ރައީސް އިބްރާހިމް މުހައްމަދު ސޯލިހާއި ސަރުކާރުގެ ވުޒާރާތަކުން ދެއްވި އެހީތެރިކަން ރަޝް ފާހަގަކުރި އެވެ.
"އަބަދުވެސް ބޮޑީބޯޑަރުންގެ އުއްމީދަކީ ވޯލްޑް ޓުއާ އިވެންޓެއްގައި ވާދަކޮށް ރަނގަޅު ވަނައެއް ހޯދުން. މިއަދު، މި ހުޅުވާލެވޭ ދޮރަކީ ދިވެހިރާއްޖޭގެ ބޮޑީބޯޑަރުންނަށް ވޯލްޑް ޓުއާގައި ވާދަކޮށް ރާއްޖޭގެ ނަން ފަވާލަން ލިބޭ އަގުހުރި ފުރުސަތެއް. މިއަދު ތި ފެންނަނީ 2020 ވަނަ އަހަރުން ފެށިގެން އައިބީސީއާ އެކު ކުރެވުނު ބުރަ މަސައްކަތުގެ ފޮނި މީރުކަން" ރަޝް ބުންޏެވެ.
ރަޝް ބުނީ މުޅި މުޅި ރާޅާ އަޅާ އާއިލާގެ އުއްމީދަކީ ރާއްޖޭގެ ރާޅާ އެޅުންތެރިން ބައިނަލްއަގްވާމީ މައިދާނުގައި ވެސް ވިދާލުން ކަމަށެެވެ، މީގެ އިތުރުން ވަރުނުލާ ރާޅުގަނޑަކީ ގައުމީ ރާޅާ އެޅުމުގެ "ސްޓޭޑިއަމް"ގެ ގޮތުގައި ތަރައްގީ ކުރެވި މި ފަސްގަނޑުގައި ގިނަ ބައިނަލްއަގްވާމީ މުބާރާތްތަކެއް ބޭއްވުން ކަމަށެވެ.
ވިޒިޓް މޯލްޑިވްސް ޕްރޯ ހުޅުވުމުގެ ރަސްމިއްޔާތުގެ ތެރެއިން.--- ފޮޓޯ: މުހައްމަދު ޝާބިން/ އަދަދު
ވިޒިޓް މޯލްޑިވްސް ޕްރޯ 2022 ހުޅުވުމުގެ ރަސްމިއްޔާތުގައި ވާހަކަދައްކަވަމުން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މެނޭޖިން ޑިރެކްޓަރު ތޮއްޔިބު މުހައްމަދު ވިދާޅުވީ ކުޅިވަރުގެ ތެރެއިން ރާއްޖެ މަގުބޫލު މަންޒިލަކަށް ހެދުމަށް ކުރެވޭ މަސައްކަތުގައި މިކަހަލަ މުބާރާތްތައް ވަރަށް މުހިންމު ކަމަށެވެ. އަދި މި މުބާރާތް ކާމިޔާބުކަމާ އެކު ކުރިއަށް ގެންދިޔުމަށް އެހީތެރިވާ ހުރިހާ ފަރާތްތަކަށް އޭނާ ޝުކުރު އަދާކުރެއްވި އެވެ.
"މި އިވެންޓުގެ މެއިން ސްޕޮންސަރަކަށް ވިޒިޓް މޯލްޑިވްސް ވާން ނިންމި މައިގަނޑު ސަބަބަކީ މި ކުޅިވަރާއިއެކު ރާއްޖެ މަގުބޫލު މަންޒިލެއްގެ ގޮތުގައި ކުރިއެރުވޭނެތީ. ރާއްޖެ ކަހަލަ ގައުމެއްގައި މި ކަހަލަ ކުޅީވަރެއް ކުރިއެރުންވެސް މުހިންމު. އަބަދުވެސް އަޅުގަނޑުމެން ތިބޭނީ އެމްބީބީއޭއާ އެކުގައި." ތޮއްޔިބު ވިދާޅުވި އެވެ.
މުބާރާތުގެ ހުޅުވުމުގެ ރަސްމިއްޔާތު މިއަދު ކުރިއަށްދިޔަ ކަމުގައިވިޔަސް ހީޓުތައް ފެށުމަށް މިހާރު ހަމަޖެހިފައިވަނީ އަންނަ އާދިއްތަ ދުވަހުގަ އެވެ. މުބާރާތުގެ ފޯރި އިތުރު ކުރުމަށްޓަކައި ކޮންމެ ރެއަކު ވަރުނުލާ ރާޅުގަނޑު ސަރަހައްދުގައި މިޔުޒިކް ޝޯތައް ކުރިއަށްދާނެ އެވެ.
