އަންނަ ހުކުރު ދުވަހު މާލޭ ރާޅުގަނޑު ސަރަހައްދުގައި ފަށާ "ވިޒިޓް މޯލްޑިވްސް ޕްރޯ 2022" ބޮޑީބޯޑިން އިންޓަނޭޝަނަލް މުބާރާތުގައި ވާދަކުރުމަށް ދުނިޔޭގެ ޗެމްޕިއަންކަން ހަތަރު ފަހަރު ހޯދާފައިވާ، ބްރެޒިލްގެ އިޒަބެލާ ސޫސާ ރާއްޖެ އަތުވެއްޖެ އެވެ.
މި މަހު 29 އިން އަންނަ މަހުގެ ހަތް ވަނަ ދުވަހަށް މާލޭގައި އޮންނަ "ވިޒިޓް މޯލްޑިވްސް ޕްރޯ 2022"ގައި ދުނިޔޭގެ ޗެމްޕިއަން ބޮޑީބޯޑަރުންނާ އެކު ރާއްޖޭގެ ބޮޑީބޯޑަރުން ވެސް ވާދަކުރާނެ އެވެ.
މުބާރާތުގައި ވާދަކުރުމަށް އައި އެންމެ ފުރަތަމަ އެތުލީޓަކީ ދުނިޔޭގެ އަންހެން ބޮޑީބޯޑިން ޗެމްޕިއަންކަން ހަތަރު ފަހަރު ހޯދާފައިވާ ބްރެޒިލްގެ އިޒަބެލާ އެވެ.
އިޒަބެލާ، 33، ވަނީ ދުނިޔޭގެ ޗެމްޕިއަންކަން 2010، 2012، 2013 އަދި 2016ގައި ހޯދާފަ އެވެ. އޭނާ ވަނީ ބޮޑީބޯޑިން ޔޫރަޕިއަން ޓުއާގެ ޗެމްޕިއަންކަން ވެސް ދެ ފަހަރަށް ހޯދާފަ އެވެ.
ހަތަރު ކެޓަގަރީއަކުން ދުނިޔޭގެ މަތީ ފަންތީގެ އެތުލީޓުން ވާދަކުރާ މި އިވެންޓުގެ ކަންކަން އިންޓަނޭޝަނަލް ބޮޑިބޯޑިން ކޯޕަރޭޝަން (އައިބީސީ) އިންވެސް އަންނަނީ ވަރަށް ގާތުން ބަލަމުންނެވެ. މިގޮތުން މުބާރާތުގެ ޓެކްނިކަލް ޓީމްގައި ހިމެނޭ އައިބީސީގެ ސީއީއޯ އަދި ވޯލްޑް ޓުއާ މެނޭޖަރު ގްލެން ކުއެވޭސް ވަނީ މިއަދު މާލެ އައިސްފަ އެވެ.
އައިބީސީގެ ސީއީއޯ ގްލެން ކުއޭވޭސް ވެލާނާ އިންޓަނޭޝަނަލް އެއާޕޯޓުގައި:
އަންނަ ހަފްތާ ބަންދުގައި ފަށާ މޯލްޑިވްސް ޕްރޯއަކީ ވޯލްޑް ޓުއާގެ ލެގެއް އޭޝިއާ ސަރަހައްދުގައި ބާއްވާ ފުރަތަމަ ފަހަރެވެ. އަދި މިއީ ޓުއާގައި ހިމެނޭ މުބާރާތްތަކުގެ ތެރެއިން ދެ ވަނަ އަށް އެންމެ ފައިސާގެ އިނާމް ވެސް ބޮޑު މުބާރާތެވެ. އެ ގޮތުން އިނާމް ފައިސާގެ ގޮތުގައި 70،000 ޑޮލަރު ހަތަރު ކެޓަގަރީ އަކަށް ބަހާލެވޭނެ އެވެ.
މުބާރާތުގެ ޕާޓްނަރުން އިއުލާންކޮށްފައިވާއިރު، މުބާރާތުގެ ރަސްމީ ޓްރެއިލާ ވެސް ވަނީ ދާދިފަހުން ލޯންޗުކޮށްފަ އެވެ. މި ޓްރެއިލާގައި ރާއްޖޭގެ ދިރިއުޅުމުގެ ކަންކަމާއި ގުދުރަތީ ރީތިކަން ދައްކުވައިދޭ މަންޒަރުތައް ހިމެނޭއިރު، ބޮޑީބޯޑަރުން ރާޅުތަކުގެ ތެރޭގައި އުޅޭ ހިތްގައިމު ވީޑިއޯތައް ވެސް ހިމެނެ އެވެ.
ޓްރެއިލާ ލޯންޗު ކުރުމާ އެކު ކައުންޓްޑައުން ފަށާފައިވާއިރު، މުބާރާތުގެ ލޯގޯވެސް ވަނީ ރަސްމީކޮށް ލޯންޗުކޮށްފަ އެވެ.
މުބާރާތުގައި ވާދަކުރުމަށް ބޭރުގެ އެތުލީޓުން ރާއްޖެ އަންނަން ފަށާފައިވާއިރު، ދިވެހި އެތުލީޓުންވެސް އަންނަނީ ތައްޔާރީތައް ވަމުންނެވެ. މިގޮތުން މުބާރާތުގައި ވާދަކުރާ ގައުމީ ޓީމް ހޮވުމަށް ސެލެކްޝަން ޓްރަޔަލްސްތަކެއްވެސް މިދިޔަ މަހުވަނީ ކުރިއަށް ގެންގޮސްފަ އެވެ.
ދިވެހި އެތުލީޓުން މުބާރާތުގައި ބައިވެރިވުމުގެ މުއްދަތު މިއަދުގެ ނިޔަލަށް ވަނީ ހަމަވެފަ އެވެ. ބިދޭސީ ބޮޑީބޯޑަރުން މުބާރާތުގައި ވާދަކުރުމުގެ ސުންގަނޑި ހަމަވާނީ ބުދަ ދުވަހުގެ ނިޔަލަށެވެ.
