އަންނަ ހޯމަ ދުވަހު އިންޑިއާގެ ބުބަނޭޝްވަރުގައި ފަށާ 20 އަހަރުން ދަށުގެ ސާފް ޗެމްޕިއަންޝިޕްގައި ވާދަކުރާ ޒުވާން ގައުމީ ޓީމުގެ ފެންވަރު ރަނގަޅު ކަމަށާއި އަމާޒަކީ ފައިނަލް ކުޅުން ކަމަށް ޓީމުގެ ކޯޗު އަހުމަދު ޝާކިރު (ޝާކިއްޓެ) ބުނެފި އެވެ.
ފަސް ގައުމުގެ މެދުގައި ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް ފައިނަލް ކުޅޭ ގޮތަށް ފޯމެޓް ރޭވިފައި އޮތް މި ފަހަރުގެ 20 އަހަރުން ދަށުގެ ސާފް ޗެމްޕިއަންޝިޕްގައި ރާއްޖެ އާއި އިންޑިއާގެ އިތުރުން ދެން ވާދަކުރަނީ، ބަންގްލަދޭޝް އާއި ސްރީ ލަންކާ އަދި ނޭޕާލް އެވެ.
ރާއްޖޭގެ ޓީމު މުމްބާއީ މަގުން އިއްޔެ، ބުބަނޭޝްވަރަށް ގޮސްފައިވާއިރު، ފަރިތަކުރުންތައް ބާއްވަން ދެ ދުވަހެއް ވަރު ލިބޭނެ އެވެ.
"އަދަދު" އަށް ދިން އިންޓަވިއުއެއްގައި ޝާކިއްޓެ ބުނީ އޭޕްރީލް މަހުން ފެށިގެން 20 އަހަރުން ފަށުގެ ޓީމުގެ ޕްރެކްޓިސްތައް ފަށައިގެން ކުރިއަށްގެންދިޔައިރު، ކްލަބްތަކުން ދިން އެއްބާރުލުން ފާހަގަކުރާ ކަމަށެެވެ.
ޒުވާން ގައުމީ ޓީމުގައި ތިބީ ކްލަބްތަކުގެ ސީނިއާ ލެވަލްގައި ވެސް ކުޅޭ ކުުޅުންތެރިން ކަމަށާއި ދިވެހި ޕްރިމިއާ ލީގުގެ މެޗުތައް ކުޅޭ ދުވަސްތަކުގެ ތެރޭގައި ގައުމީ ޓީމުގެ ޕްރެކްޓިހަށް ވެސް އެ ކުޅުންތެރިން ރިލީސްކޮށްދިނުމަކީ ޒުވާން ގައުމީ ޓީމުގެ ތައްޔާރީ އަށް ފަސޭހަވި ސަބަބެއް ކަމަށް ޝާކިއްޓެ ފާހަގަކުރި އެވެ.
"އަސްލު ހަގީގަތުގައި ތިބުނިހެން، މިއީ އެންމެ ގިނަ މެޗު ފުރަތަމަ ޑިވިޝަނުގައި ކުޅެފައިތިބި ކުޅުންތެރިންނަށް ބަލާއިރު، މި ލެވަލްގެ މުބާރާތަކަށް ރާއްޖޭން ދާނެ އެންމެ މޮޅު އެއް ޓީމު. އެކަމަކު، މި ޓީމު އެކުގައި ޕްރެކްޓިސް ކޮށްލަން މި ޖެހުނީ ކްލަބްތަކުގެ ޕްރެކްޓިސްތައް ވެސް ދާ ދަނޑިވަޅެއްގައި ވީމަ ހުރިހާ ކަމެއް އެންމެ ބޭނުންވާ ގޮތަށް ނުވެދާނެ،"
އެހެން ނަމަވެސް ހަގީގަތުގައި ފެންވަރަށް ބަލާއިރު މިއީ ރަނގަޅު ޓީމެއް، އަމާޒަކީ ފައިނަލް، މި ޓީމަށް ކުރެވޭނެ ވަރުގެ ކަމެއް އެއީ،" " ގައުމީ ފުޓްބޯޅަ ޓީމުން 2018 ވަނަ އަހަރު ސާފް ޗެމްޕިއަންޝިޕް ކާމިޔާބުކުރި ޓީމުގެ އެސިސްޓަންޓަކަށް ހުރި ޝާކިއްޓެ ބުންޏެވެ.
ޒުވާން ގައުމީ ޓީމުގެ ކެޕްޓަނުންނާއި ވައިސް ކެޕްޓަން އަދި ކޯޗާއި މެނޭޖަރު ފޮޓޯ އަކަށް ހުއްޓިގެން: (ކ.ވ)، ވައިސް ކެޕްޓަން، ނަފްކޮ، ކޯޗު ޝާކިއްޓެ، ކެޕްޓަން ހުމެއިދު، މެނޭޖަރު އަބީރު އަދި ވައިސް ކެޕްޓަން މީސަމް
އިދިކޮޅުގައި އޮތް ޓީމުތަކަށް ބަލާއިރު، އެންމެ ވަރުގަދަކޮށް ފެންނަނީ އިންޑިއާ ކަމަށް ޝާކިއްޓެ ފާހަގަކުރީ އެ ޓީމުން މުބާރާތް ކުޅޭ ދަނޑުގައި ޕްރެކްޓިސް ކުރަން ލިބުނު މުއްދަތު ރަނގަޅުވެފައި "ހޯމް" އެޑްވާންޓޭޖް އޮންނާނެތީ އެވެ. ނޭޕާލުން ވެސް އެ ގައުމުގެ ފުޓްބޯޅަ ފެޑެރޭޝަނުން ހަމަޖައްސައިދިން "އިން ހައުސް" ކޭމްޕެއްގައި އެކުގައި ޕްރެކްޓިސް ކުރަމުން އަންނަތާ ގިނަ ދުވަސްތަކެއްވެފައިވާއިރު، އެ ޓީމު ވެސް މި ލެވަލްގައި ރަނގަލު ވާނެކަމަށް ޝާކިއްޓެ ގަބޫލުކުރެ އެވެ.
ބަންގްލަދޭޝާއި ލަންކާ އިން ޓީމު އެކުލަވާލައިގެން ޕްރެކްޓިސްތަކެއް ކުރަމުން އަންނަ ކަމަށާއި އެކަމަކު، މި ވަގުތު ފެންނަ ފެނުމަށް ބަލާއިރު، އެ ދެ ޓީމާ މެދު ސީދާ އެއްޗެއް ބުނެވޭނީ ފުރަތަމަ މެޗުތައް ބަލާލުމުން ކަމަށް ޝާކިއްޓެ ބުންޏެވެ.
"ފަސޭހައެއް ނުކޮށްލާނަން އެއްވެސް މެޗެއް. ކޮންމެ މެޗަކަށް ވެސް މި ކުޅުންތެރިން ނުކުންނާނީ މޮޅެއް ހޯދަންކަން އެނގެނީ،" ޝާކިއްޓެ ބުންޏެވެ.
ފުރަތަަމަ މެޗުގައި އަންނަ ހޯމަ ދުވަހު ރާއްޖޭން މުބާރާތުގެ ފުރަތަމަ މެޗުގައި ނޭޕާލާ ދެކޮޅަށް ކުޅޭނެ އެވެ. ދެ ވަނަ މެޗުގައި މި މަހު 29 ވަނަ ދުވަހު ބަންގްލަދޭޝާ ބައްދަލުކުރާނެ އެވެ. އޭގެ ދެ ދުވަސް ފަހުން، މި މަހު 31 ވަނަ ދުވަހު ލަންކާއާ ކުޅުމަށް ފަހު، ލީގު ބުރުގެ ފަހު މެޗުގައި އަންނަ މަހު ދެ ވަނަ ދުވަހު އިންޑިއާއާ ކުޅޭނެ އެވެ.
ސާފް 20 އަހަރުން ދަށުގެ މުބާރާތުގައި ރާއްޖޭގެ ކެޕްޓަނަކަށް ހަމަޖައްސާފައިވަނީ ކްލަބް އީގަލްސްގެ ޑިފެންޑަރު ހުމެއިދު ހުސެއިން އެވެ. ވައިސް ކެޕްޓަނުންނަކީ ޓީސީގެ އަހުނަފް މުހައްމަދު ތަސްނީމް (ނަފްކޮ) އާއި ސުޕަ ޔުނައިޓެޑް ސްޕޯޓްސް (ސަސް)ގެ ގޯލުކީޕަރު ޔޫސުފް މީސަމް އަބްދުﷲ އެވެ.
