ލަންޑަން (ޖުލައި 21) - ސެވިއްޔާ އަށް ކުޅެމުން އަންނަ ފްރާންސް ގައުމީ ޓީމުގެ ޑިފެންޑަރު ޖޫލްސް ކޫންޑޭ ގަންނަން ޗެލްސީން ކުރަމުން އަންނަ މަސައްކަތް ވަރުގަދަކޮށްފި އެވެ.
ކޫންޑޭ، 23، ގަންނަން މީގެ ކުރިން ޗެލްސީން ކުރި ދެ ބިޑެއް ސެވިއްޔާ އިން އަނބުރާ ފޮނުވާލީ އެވެ. ފުރަތަމަ ޗެލްސީން ހުށަހެޅީ 40 މިލިއަން ޑޮލަރުގެ ޑީލެކެވެ. އެ ޑީލަށް ފަހު ދެން ހުށަހެޅި 53 މިލިއަން ޑޮލަރުގެ ބިޑަށް ވެސް ސެވިއްޔާގެ ރުހުން ނުލިބުނެވެ. އެކަމަކު، ޗެލްސީން މިހާރު ވަނީ 65 މިލިއަން ޑޮލަރުގެ ބިޑެއް ހުށަހަޅައިފަ އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން މިއީ ސެވިއްޔާ އިން ކޫންޑޭ ވިއްކާލަން ބަލާއިރު ހިތްހަަމަޖެހޭ ވަރުގެ ފީ އެކެވެ.
ފްރާންސްގެ ބޯޑޯ ދޫކޮށް 2019 ވަނަ އަހަރު ސެވިއްޔާ އަށް ބަދަލުވި ކޫންޑޭ އަކީ ފަހަކަށް އައިސް އެއް ލެވަލެއްގައި ކުޅެމުން އަންނަ މަދު ޑިފެންޑަރުންގެ ތެރެއިން އެއް ކުޅުންތެރިއެކެވެ. ކޫންޑޭ ގަންނަން އެ ފަހަރު ސެވިއްޔާ އިން 27 މިލިއަން ޑޮލަރު ހަރަދުކުރި އެވެ.
މި ފަހަރުގެ ޓްރާންސްފާ މާކެޓްގައި ކޫންޑޭ ހޯދުމުގެ ރޭހުގައި ޗެލްސީގެ އިތުރުން ބާސެލޯނާ އިން ވެސް ވާދަކުރެ އެވެ. އެކަަމަކު، ރަސްމީ ސިފައެއްގައި ކޫންޑޭ އަށް ބިޑްކުރަން ބޭނުންވާ ފައިސާ އަދި ބާސެލޯނާ އަށް ހަމަނުޖެހެ އެވެ.
ޗެލްސީން ވަނީ މި ފަހަރުގެ ޓްރާންސްފާ މާކެޓްގައި މެންޗެސްޓާ ސިޓީގެ ރަހީމް ސްޓާލިން އާއި ނަޕޯލީގެ ކަލީދޫ ކުލިބާލީގެ ސޮއި ހޯދައިފަ އެވެ. މި ދެ ކުޅުންތެރިން ގަންނަން ޗެލްސީގެ އާ ވެރިޔާ ޓޮޑް ބޯލީގެ .ލީޑަޝިޕުން ޖުމްލަ އެކު 100 މިލިއަން ޑޮލަރަށް ވުރެ އިތުރަށް ހަރަދުކުރާނެ އެވެ.
ޕްރީ ސީޒަން ޓުއާގެ ތެރެއިން ދިން އިންޓަވިއުއެއްގައި ޗެލްސީގެ ކޯޗު ތޯމަސް ޓުޗެލް ވަނީ މި ފަހަރުގެ ޓްރާންސްފާ މާކެޓް ނިމުމުގެ ކުރިން އެ ކްލަބުން އަދިވެސް ކުޅުންތެރިންތަކެއް ގެންނާނެ ކަމުގެ އިޝާރާތެއް ދީފަ އެވެ.
