އެފްއޭއެމް ދެ ވަނަ ޑިވިޝަން ފުޓްބޯޅަ މުބާރާތުގައި މިއަދު ހަވީރު ކުޅުނު މެޗުގައި ޖޭޖޭ ސްޕޯޓްސް ކްލަބުން ފަަހަތުން އަރައި 4-3 އިން ބިސް ބުރު ސްޕޯޓްސް ކްލަބް ބަލިކުރިއިރު، މިރޭ ކުޑެހެންވޭރު ޔުނައިޓެޑްގެ މައްޗަށް 3-2 އިން ކުރިހޯދައި ބުރު ސްޕޯޓްސް ކްލަބުން މޮޅަކުން މުބާރާތް ފަށައިފި އެވެ.
މިއަދު ހަވީރު ކުޅުނު މެޗުގައި ޖޭޖޭ އިން ލީޑުނެގީ 16 ވަަނަ މިނިޓްގައި ހުސެއިން ނިޔާޒް މުހައްމަދު (ބޮކުރީ) ބޮލުން ޖެހި ގޯލުންނެވެ. ލީޑުފުޅާކުރަން ޖޭޖޭގެ ސަޔަމް ސައީދު އާއި މުހައްމަދު ފުހެއިދު (ޓޯޑް) އަށް ލިބުނު ބޯޅަތައް ގޯލަކަށް ނުހެދުނެވެ.
އެކަމަކު، ބިސް ބުރު ޓީމުގެ އީރާން ފޯވާޑް، އާމިރު މެމާރީ ހެދި ހެޓްރިކުން ފުރަތަމަ ހާފުގައި ބިސް ބުރުން ނަތީޖާ އަނބުރާލައި، ދެ ގޯލުގެ ލީޑެއް ނެގި އެވެ. ޖޭޖޭގެ ގޯލުގައި އިފްރާހް އަރީފް ހުއްޓައި، މެމާރީ ފުރަތަމަ ގޯލު ޖެހީ ހިލޭ ޖެހުމަކުންނެވެ. އަނެއް ދެ ގޯލު އޭރިއާތެރެއިން ލިބުނު ފުރުސަތުތަކުން ގޯލަށް ބޯޅަ ވައްދާލީ އެވެ.
ބިސް ބުރުން ގޯލު ޖެހުމަށް ފަހު އުފާފާޅުކުރަނީ.--- ފޮޓޯ: އިމޭޖަސް.އެމްވީ
ދެ ވަނަ ހާފުގައި ޖޭޖޭ އިން ވަނީ މޮޅަށް ކުޅެ ނަތީޖާ އަނބުރާލައިފަ އެވެ. އަހުމަދު ނިމާދު (ނިމާ)ގެ ކޯޗުކަމުގައި ކުޅުނު ޖޭޖޭގެ ގޯލުތައް ޖެހީ ބޮކުރީ އާއި އިސާމް މުހައްމަދު އަދި މުއާޒް އަލީ އެވެ. އިސާމް އާއި މުއާޒް ގޯލުތައް ކާމިޔާބުކުރީ މެޗުގެ ފަހު 10 މިނިޓް ތެރޭގަ އެވެ.
މި ފަހަރުގެ ދެ ވަނަ ޑިވިޝަނަށް ވަރުގަދަ އަށް ތައްޔާރުވި، އެންމެ ފަހުގެ ތިން ވަނަ ޑިވިޝަނުގެ ޗެމްޕިއަން، ބުރުން މިރޭ ފުރަތަމަ ހާފުގައި ދެ ގޯލުގެ ލީޑެއް ނެގި އެވެ. އެ ޓީމުގެ ފުރަތަމަ ގޯލު ޖެހީ ސާބިއާގެ ސްޓްރައިކަރު ސްޓެފަން ޑުރިކް އެވެ. އަނެއް ގޯލު ޖެހީ ކުރިން ފުރަތަމަ ޑިވިޝަނުގެ ކްލަބްތަކާއި ގައުމީ ޒުވާން ޓީމުތަކުން ފާހަގަވި މުހައްމަދު ތަސްނީމް (ތައްތި) އެވެ.
ކުޑަހެންވޭރުގެ މިސްރު ކުޅުންތެރިޔާ އިސްލާމް ފެކްރީ އެ ޓީމަށް ގޯލެއް ޖަހައިދީ އުންމީދެއް ހޯދައިދިން ނަމަވެސް އަހުމަދު ރަޝީދު (އައްމަޑޭ) ވަނީ ބުރުގެ ތިން ވަނަ ގޯލު ޖަހައިދީ އެ ޓީމަށް އަނެއްކާ ވެސް ދެ ގޯލުގެ ލީޑެއް ނަަގައިދީފަ އެވެ.
ގޯލު ޖެހުމަށް ފަހު ބުރުގެ ކުޅުންތެރިން އުފާފާޅުކުރަނީ.--- ފޮޓޯ: އިމޭޖަސް.އެމްވީ
އިތުރު ވަގުތުގެ ފަހު މިނިޓްގައި ކުޑަހެންވޭރުން އިތުރު ގޯލެއް ޖެހި އެވެ. ޕެނަލްޓީ އަކުން މި ގޯލު ޖެހީ ކުރިން ޓީސީ އަށް ކުޅުނު އަކްމަލް މުހައްމަދު އެވެ.
ސޯޅަ ޓީމާ އެކު ދެ ވަނަ ޑިވިޝަން ފެށި ނަމަވެސް މިހާރު ކްލަބް އޮންލީ ވަން އޮޕޮޗިއުނިޓީ ވަނީ މުބާރާތުން ވަކިވެފަ އެވެ. ގްރޫޕް އޭގެ ފުރަތަމަ މެޗުތައް ނިމިފައިވާއިރު، މާދަމާ އޮތީ ގްރޫޕް ބީގެ މެޗެކެވެ.
ދެ ވަނަ ޑިވިޝަނުގައި މާދަމާރޭކުޅޭ މެޗުގައި ބައްދަލުކުރާއނީ ބީޖީ ސްޕޯޓްސް ކްލަބް ކުޅޭނީ ވިކްޓަރީ ސްޕޯޓްސް ކްލަބެވެ. ދެ ޓީމަކީ ވެސް ކުރިން ފުރަތަމަ ޑިވިޝަނުގައި ވާދަކޮށްފައިވާ ދެ ޓީމެވެ. ވިކްޓަރީ ސަސްޕެންޝަނުން އެނބުރި އައިސް ރަސްމީ މެޗެއްގައި މި ކުޅެނީ ތިން އަހަރުގެ ތެރޭ ފުރަތަމަ ފަހަރަށެވެ. ދެ ވަނަ ޑިވިޝަނުގައި ނިއު ރޭޑިއަންޓް ކުޅޭ ފުރަތަމަ މެޗު އޮތީ ހޮނިހިރު ދުވަހުގެރޭ ކްލަބް ޓީނޭޖާ ދެކޮޅަށެވެ.
