އެފްއޭއެމް ދެ ވަނަ ޑިވިޝަން ފުޓްބޯޅަ މުބާރާތުގެ ފުރަތަމަ މެޗުން މިއަދު ހަވީރު ކްލަބް ޕީކޭ އަތުން 4-1 އިން ޓެންޓް މޮޅުވިއިރު، މިރޭ ކެޕިޓަލް ސިޓީން ކުޅެން އޮތް މެޗަށް ގަވާއިދު ބުނާ ވަރަށް ޓީމު ހަމަނުވުމުން އިދިކޮޅަށް ނުކުތް ދިވެހި ސިފައިންގެ ކްލަބަށް މެޗު ލިބިއްޖެ އެވެ.
ސޯޅަ ޓީމާ އެކު މި ފަހަރުގެ ދެ ވަނަ ޑިވިޝަން ކުރިއަށްދާއިރު، އެ ޓީމުތައް ވަނީ ދެ ގްރޫޕަށް ބަހާލައިފަ އެވެ. މިއަދު ގަލޮޅު ދަނޑުގައި ކުޅެން ނިންމީ ގްރޫޕް އޭގެ ދެ މެޗެވެ.
ހަވީރު ކުޅުނު މެޗުގައި ޓެންޓުން ވަނީ ފުރަތަމަ 30 މިނިޓް ތެރޭ ދެ ގޯލު ޖަހައިފަ އެވެ. އެ ގޮތުން މެޗުގެ 18 ވަނަ މިނިޓްގައި ޓެންޓަށް ލީޑުނަގައިދިނީ ޓީސީ ސްޕޯޓްސް ކްލަބަށް ކުރިން ކުޅުނު އަރާޝް އައްސަދު އެވެ. އަދި 29 ވަނަ މިނިޓްގައ ސްރީ ލަންކާ ގައުމީ ޓީމުގެ މުހައްމަދު ފަސަލް ވަނީ ލީޑުފުޅާކޮށްދީފަ އެވެ. އެކަމަކު، ފުރަތަމަ ހާފުގެ އިތުރު ވަގުތުގައި އަހުމަދު އަބްދުލް އަޒީޒް ވަނީ ޕީކޭ އަށް ގޯލެއް ޖަހައިދީފަ އެވެ.
ދެ ވަނަ ހާފްގެ ކުޅުން ފެށިތާ ހަތަރު މިނިޓް ތެރޭ އަރާޝް ވަނީ ޓެންޓްގެ ތިން ވަނަ ގޯލު ޖަހައި، އެ ޓީމަށް ދެ ގޯލުގެ ލީޑެއް އަލުން ނަގައިދީފަ އެވެ. ޓެންޓްގެ ފަހު ގޯލު ޖެހީ ބަދަލަކަށް ކުޅެން އެރި ޒުވާން ކުޅުންތެރިޔާ، ޔޫޝައު ބިން އަލީ ނަޝީދު އެވެ. އޭނާ އަކީ މި އަހަރުގެ 19 އަހަރުން ދަށުގެ ޔޫތު ޗެމްޕިއަންޝިޕްގައި މާޒިޔާ އަށް ކުޅުނު ކުޅުންތެރިއެކެވެ.
ގްރޫޕް އޭގެ ދެ ވަނަ މެޗުގައި މިރޭ ސިފައިންގެ ކްލަބާ ދެކޮޅަށް ކުޅެން އޮތް ކެޕިޓަލް ސިޓީ ޓީމާއި އޮފިޝަލުން ގަވާއިދު ބުނާ ވަރަށް ހަމަނުވި އެވެ. މެޗު ކުޅެން އެގާރަ ކުޅުންތެރިން ހަމަވި ނަމަވެސް ޓީމުގެ އޮފިޝަލެއް ނެތުމުން، މެޗު ރެފްރީއާ އެކު މަޝްވަރާކުރުމަށް ފަހު އެ އޮންނަ ގަވާއިދުގެ ތެރެއިން އެފްއޭއެމްގެ ކޮމްޕެޓިޝަން ޑިޕާޓްމަންޓުން އިއުލާނުކުރީ މެޗުން ސިފައިންގެ ކްލަބް މޮޅުވީ ކަމަށެވެ. އަދި ސިފައިންނަށް ފައިދާ ދެ ގޯލާއި ތިން ޕޮއިންޓް ދިނުމަށެވެ.
ގަލޮޅު ދަނޑާއި ޓާފް އެއް ނަމްބަރު ދަނޑުގެ އިތުރުން ވިލިމާލޭ ޓާފްގައި މި ފަހަރުގެ ދެ ވަނަ ޑިވިޝަންގެ މެޗުތައް ކުރިއަށްދާއިރު، މުބާރާތުގެ ފޯމެޓް ރޭވިފައި އޮތީ ކޮންމެ ގްރޫޕެއްގެ ގަދަ ދެ ޓީމެއް ސެމީ ފައިނަލަށް ދާ ގޮތަށެވެ.
ސެމީ ފައިނަލަށް ފަހު ފައިނަލުން ފުރުސަތު ލިބޭ ދެ ޓީމެއް ޕްރިމިއާ ލީގުގެ ކޮލިފިކޭޝަނަށް ހޮވޭނެ އެވެ. ޕްރިމިއާ ލީގުގެ ކޮލިފިކޭޝަން ބުރުގައި ކުޅޭނީ މިހާރު ކުރިއަށްދާ ޕްރިމިއާ ލީގުގެ ފުލަށް ދާ ދެ ޓީމާއި ދެ ވަނަ ޑިވިޝަންގެ ޗެމްޕިއަން އަދި ރަނަރަޕް އެވެ. އެ ހަތަރު ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ނަތީޖާ ރަނގަޅު ދެ ޓީމެއް އަންނަ ސީޒަނުގެ ޕްރިމިއާ ލީގުން ފުރުސަތު ލިބޭނެ އެވެ.
މާދަމާ ހަވީރު ކުޑަހެންވޭރު ޔުނައިޓެޑާއި ބުރު ސްޕޯޓްސް ކްލަބްގެ މެޗު ކުޅޭއިރު، މާދަމާރޭ އޮންނާނީ ބިސްބުރު އާއި ޖޭޖޭ ސްޕޯޓްސް ކްލަބް އެވެ.
އާފިއު މުހައްމަދުގެ ކޯޗުކަމުގައި ކުޅޭ ބުރު ސްޕޯޓްސް ކްލަބަކީ މި ފަހަރުގެ މުބާރާތަށް އެންމެ ވަރުގަދަ އަށް ތައްޔާރުވި އެއް ޓީމެވެ. ޖޭޖޭ ސްޕޯޓްސް ކްލަބަކީ ވެސް ފާއިތުވި އަހަރުތަކުގައި ދެ ވަނަ ޑިވިޝަނަށް ރަނގަޅު ޓީމެއް އެކުލަވާލައިގެން ނުކުތް ކްލަބެކެވެ. މި ފަހަރުގެ ދެ ވަނަ ޑިވިޝަނުގައި އެ ޓީމުން ވާދަކުރަނީ ކްލަބް އީގަލްސްގެ އެސިސްޓަންޓް ކޯޗަކަށް މަސައްކަތް ކުރި އަހުމަދު ނިމާދު (ނިމާ)ގެ ކޯޗުކަމުގަ އެވެ.
